[1] ¡Munasitaxay, jiwitakïtawa! ¡Kunja munkañätasa! Nayranakamax pä palomar uñtatawa, ajanu imxatat qhipäxar imantata; ñik'utamasti Galaad qullunakan ananaqtir cabritonakar uñtatawa.
[2] Laka ch'akhanakamax sumakamakiwa, t'awra yawiratäñatak jichha jariqat ovejanakar uñtata.
[3] Laka ispillumax wila juch'usa ch'ankhar uñtatawa, parlatamasti wali munkañarakiwa. Ajanumasti velom qhipäxanxa, payar jaljata granada achur uñtatawa.
[4] Kunkamasti Davidan torreparuw amtayitu, k'uthat qalanakat lurata; waranqa escudonakampi k'achachata, jan axsarir jaqinakan escudonakapa.
[5] Ñuñunakamax pä tarujanakar uñtatawa, ispa taruja qallunakar uñtataw lirio panqaranak taypin manq'aski.
[6] Janïr urun qhanjtankipana, ch'amakanakas janïr chhaqtkipana, mirrax utjki uka ch'umir sarxä, inciensox utjki uka qullur sarxä.
[7] ¡Munasitaxay, jumax jiwakipunïtawa; kayut p'iqikama munkañätawa! ¡Janiw juman kuna jan walis utjkiti!
[8] Munasitaxay, Líbano qullut nayamp chik saraqanim; nayamp chik Líbano qullut saraqanim. Amaná qullutpach qhirwanak uñatatam, Senir, Hermón qullunakatpach uñatatam; leonanakan putunakapatpacha, leopardonakan qullunakapatpacha uñatatarakim.
[9] Kullakitay, nayan munasitaxa, chuymax lunthatista; mä kuti uñtatamampikiw chuymax lunthatista; kunkaman warkuntat wallqamampikiw chuymax lunthatista.
[10] ¡Kullakitay, nayan munasitaxay, kunja sumas juman munart'asiñamaxa! ¡Munart'asiñamax vinot sipan juk'amp muxsawa, q'aphir qullanakamas yaqha suma q'apkir qullanakat sipan juk'amp sumarakiwa!
[11] Munasitaxay, laka ispillumat misk'iw ch'umasinki. ¡Laxram manqhansti misk'impi, lechempiw utji! ¡Isinakaman q'aphipax Líbano qullun suma q'aphipjamawa!
[12] Jumax kullakitay, nayan munasitaxay, suma uyuchrantat panqar yapütawa, chimpuntat uma jalsütawa;
[13] .granadonak achki uka panqar yapur uñtatätawa; alheña panqaranakax utjki,
[14] nardo, azahar, suma q'apkir caña, canela, kunayman incienso quqanaka, mirra, áloe quqanaka utjir panqar yapur uñtatätawa; ¡Ukanxa taqi suma q'apkir qullanakaw utji!
[15] Panqar yapunkir jalsu umätawa. Líbano qullutpach saraqanir jakkir umätawa.
[16] Amsta thaya, ¡sartasim! Aynach thaya, ¡aksar thayt'anim! ¡Panqar yapuxar thayt'anipxam, suma q'aphinakap taqi tuqir phusanukupxam! Munasitaxay, panqar yapumar jutam, suma muxsa achunakap manq'asim.