[1] Mä qawqha maranakatsti, Bautisir Juanax Judea wasararuw Diosan arunakap parlir misttanïna.
[2] Sarakïnwa: “¡Taqi jan wali luratanakamat kutikipstapxam, Diosan qhapaq markapaw jak'ankxi!” sasa.
[3] Isaías profetasti Bautisir Juanat akham qhanañchäna: “Wasaran mä jaqin jach'at art'asitapaw ist'asi: ‘Tatitun thakhip wakichapxam; chiqa thakhi jist'arapxam’ ” sasa.
[4] Juanan isipasti camello t'awrat luratänwa, lip'ichit lurat wak'ampiw wak'asirïna; jupax t'iju t'ijunakampi, wasaran utjir misk'impi manq'irïna.
[5] Jupan ukarusti, Jerusalenata, taqi Judea tuqinakatpacha, Jordán jawir jak'anakata arunakap ist'ir misttanipxäna.
[6] Jupanakasti juchanakap arsusipxäna, ukat Juanax Jordán jawiran jupanakar bautisäna.
[7] Kunapachatix Bautisiri Juanax fariseonakaru, saduceonakaru, bautisayasir jutapxatap uñjäna ukkhasti, jupax sänwa: “¡Katari jaqinaka! ¿Khitirak jumanakarusti Diosan jach'a mutuyäwipat jaltañ yatiyapxtamsti?
[8] Jichhasti jumanakax sumay sarnaqapxam, Tatitur kutikipstapxatamatsti aski luräwinak uñacht'ayapxam,
[9] janirak jumanakax ‘Abrahaman wawanakapäpxtwa’ sapxamti; nayasti sapxsmawa, Diosax aka qalanakatsa Abrahaman wawanakap sartayarakispawa.
[10] Ukampis hachax quqanak saphitpach tinksuyañatak niy wakicht'atäxiwa. Jan kuna achu churir quqasti phat'anukutawa, ukatsti ninar phichhantatarakiwa.
[11] Nayasti, chiqpachansa umampiw bautisapxsma, ukhamat jumanakax Tatitur kutikipstapxatam uñacht'ayañataki; ukampis khititix nayat qhipa jutki ukax Qullan Ajayumpi, ninampiw bautisapxätam. Jupasti nayat sipan juk'amp ch'amaniwa, nayasti janirakiw jupan wiskhup apañatakis askïkti.
[12] Jupasti aski jaqinakarux ñanqha jaqinak taypit irpsunini. Aski jaqinakarusti qhispiyaniwa, ukampis ñanqha lurir jaqinakarux jan jiwt'ir ninaruw jaquntani” sasa.
[13] Jesusasti Galilea uraqit Jordán jawiraruw jutäna, kawkhankkäntix Bautisir Juanax ukkharu, ukat jupamp bautisayasiñataki.
[14] Bautisiri Juanasti janiw Jesusar bautisañ munkänti, ukat säna: —Nayaw jumamp bautisayasiñaxaxa, ¿kamisarak jumasti nayampi bautisayasir juttasti? —sasa.
[15] Jesusasti ukxarux sarakïnwa: —Jichhax ukhamäpan sama, wakisiw Diosan munañap phuqhañasaxa —sasa. Ukat Juanax Jesusar bautisäna.
[16] Kunapachatix Jesusax bautisatäxasin umat mistunxän ukkhasti, alaxpachaw jist'artäna, ukatsti Qullan Ajayurux palomar uñtat jupxar saraqasinkir uñjäna.
[17] Alaxpachatsti mä aruw ist'asïna akham siri: “Akapï munat Wawaxaxa, khitirutix nayax ajlliskta ukaxa” sasa.