[1] Uka yatichäwinak arsuñ tukuyasinsti, Jesusax yatiqirinakaparuw säna:
[2] —Jumanakax niy yatipxtawa, akat pä ururux Pascua jach'a urüxaniwa, Jaqin Yuqapasti ch'akkatañatak katuntayatäniwa.
[3] Ukapachasti sacerdotenakan jilïrinakapampi, judionakan jilïrinakapampix, Caifasan utapan tantachasipxäna, jupasti sacerdotenakan jilïripänwa,
[4] jupanakasti k'arimpiw Jesusar katuntañ amtapxäna, ukhamat jiwayañataki.
[5] Ukampis sapxänwa: —Aka jach'a urunakan jan juparux katuntkañäniti, jaqinakaw ch'axwtaspa ukat jiwasatakiw sayt'asipxaspa —sasa.
[6] Jesusax Betania markan jikxatasïna, leproso sat Simonan utapana;
[7] ukan manq'kipansti, mä warmiw purinïna wali jila alan suma q'apkir qullas mä qirur apt'asita. Uka warmisti Jesusar jak'achasisin p'iqiparuw uka q'apkir qullampix warxatäna.
[8] Yatiqirinakapasti uk uñjasin wal thithipxäna, sapxarakïnwa: —¿Kunatarak ina ch'usar uka suma q'apkir qulla waranukusti?
[9] Ukax walja qullqiruw aljasisapäna, ukampisti t'aqhin jakirinakar yanapt'atäsapänwa —sasa.
[10] Jesusasti uk ist'asin jupanakaruw säna: —¿Kunatarak aka warmitak arusipxtasti? Jupan luratapax nayatak askiwa.
[11] T'aqhin jakirinakax jumanak taypin utjapuniniwa, ukampis nayax janiw jumanakampipunïkäti.
[12] Aka warmin q'apkir qullampi p'iqixar warxatatapampix, imäwixatakiw wakichaski.
[13] Qhanak sapxsma, kawkhanakantix aka qhispiyasiñ arunakax parlaskani ukawjanakanxa, aka warmin luratapax yatiyasirakiniwa, jupat amtasipxañapataki.
[14] Tunka payan yatiqirinak taypin mayniw utjäna, Judas Iscariote sutini, jupasti sacerdotenakan jilïrinakapamp parliriw saratayna,
[15] ukatsti sarakïnwa: —Jesusar katuyapxirisma ukax, ¿qawqha qullqirak churapxitasmasti? —sasa. Jupanakasti kimsa tunka qullqi churapxäna.
[16] Judasasti ukürutpach Jesusar kunjämat katuntayañatak thaqhaskäna.
[17] Jan levaduran t'ant'a manq'añ Pascua qallta urünwa, yatiqirinakapasti Jesusar jak'achasisin jiskt'apxäna: —¿Kawkhansa Pascua jayp'u manq'añ wakichapxirista? —sasa.
[18] Jupasti sänwa: —Markar sarapxam, jumanakan uñt'at jilatar thaqtapxam, ukatsti juparux sapxam: “Yatichirix akham siwa: Pachaxax jak'ankiwa; nayax utaman Pascua manq'äwi yatiqirinakaxampi manq'añ munta” —sasa.
[19] Yatiqirinakapasti Jesusan arsutaparjamaw lurapxäna, ukatsti Pascua jayp'un manq'añatakiw wakichapxäna.
[20] Arumjarusti Jesusax tunka payan yatiqiripampiw manq'añatak qunt'asïna;
[21] manq'kasasti jupanakaruw säna: —Qhanak sapxsma, jumanakat maynïriw nayar aljantitani —sasa.
[22] Yatiqirinakapasti wali llakt'ataw uñjasipxäna, ukatsti sapa mayniw juparux jiskt'asipxäna: —Tatay, ¿nayätti? —sasa.
[23] Jesusasti jupanakarux sarakïnwa: —Nayamp chika chuwar t'ant'a chilltaski ukaw katuyitani.
[24] Jaqin Yuqapax Qillqatarjamaw phuqhaski, ukampis ¡kunakïkan Jaqin Yuqapar katuntayir jaqitakixa! Jupan jan yuriñapax walïsapänwa —sasa.
[25] Aljantkani uka Judasasti, akham sasaw Jesusar jiskt'äna: —Yatichiri, ¿nayätti? —sasa. Jesusasti juparux sänwa: —Jïsa, jumätawa —sasa.
[26] Manq'apkipansti, Jesusax t'ant'a irtasin yuspagaräna, pachjasinsti yatiqirinakaparuw churäna: —Manq'apxam; akax nayan janchixawa —sasa.
[27] Ukxarusti mä qiru astäna, Diosar yuspagarasinsti jupanakaruw churäna, akham sasa: —Taqini aka qirut vino umt'apxam,
[28] akax machaq arust'äwi wilaxawa, ukasti walja jaqinakan juchanakap qhispiyañatak wartatäniwa.
[29] Nayax sapxsmawa, janiw mayampis aka uvan achupat umkxäti, kunürutix Awkixan qhapaq markapan jumanakampi machaq vino umkä ukürkama —sasa.
[30] Mä q'uchu q'ucht'asinsti, Olivos sat qulluruw sarxapxäna.
[31] Jesusasti jupanakarux sarakïnwa: —Taqpach jumanakaw jichhärmax nayat mayjt'asipxäta. Qillqatanakax siwa: ‘Awatiriruw jiwayä, ovejanakasti ananukutäniwa’ sasa.
[32] Ukampis jakatatkä ukkhasti, Galilearuw jumanakat nayra sarä —sasa.
[33] Pedrosti Jesusarux akham sänwa: —Taqpachanis jumarux jaytanukusipkpan, janipuniw nayax kunäkipansa jaytanukkämati —sasa.
[34] Jesusasti juparux sänwa: —Qhanak sisma, jichha arumaw jumax wallpa janïr art'kipan nayarux jan uñt'ir tuküta —sasa.
[35] Pedrosti saskakïnwa: —Jumampi chika jiwañaxas wakischinixa, janiw jumar jan uñt'irix tukkäti —sasa. Mayni yatiqirinakas uka pachparak sapxäna.
[36] Jesusasti Getsemaní sat chiqaruw yatiqirinakapamp saräna, jupanakarusti sarakïnwa: —Akawjar qunt'asipxam, nayasti khayawjar Diosat mayisiriw sarä —sasa.
[37] Ukatsti Pedrompiru, Zebedeon pani yuqapampiruw jupamp chik irpäna, ukansti wali llakt'ataw jikxatasïna.
[38] Ukat jupanakarux sarakïna: —Ajayuxax llakisiñatsa tukusirjamawa. Jumanakax akawjar qhiparapxam, janirak ikipxamti —sasa.
[39] Jesusasti mä juk'a nayraqatar sartasinxa, killt'asisin ajanup uraqkam puriyasaw Diosarux mayisïna akham sasa: “Awkixay, wakischi ukax aka t'aqhisiñ apaqt'ita, ukampis jan nayan munañaxäpati, jan ukasti juman munañamäpan” sasa.
[40] Ukatsti Jesusax yatiqirinakapan ukaruw kutt'anïna, jupanakarusti ikiskir jikxatäna, ukat Pedrorux säna: —¿Janit jumanakasti mä juk'a pachakis nayamp chika uñnaqapkasmasti?
[41] Jichhax jan ikipxamti, yant'äwir jan puriñatak Diosat mayisipxam. Chiqpachansa jumanakax aski lurañ munasipktawa, ukampis jan ch'amaniw jikxatasipxtaxa.
[42] Wasitat sararakikïnwa, ukatsti akham sasaw mayisïna: “Awkixay, t'aqhisiñaxatix wakisipunchixa, juman munañamax luraspan” sasa.
[43] Mayampi kutinisinsti, yatiqirinakapar ikiraskir jikxatarakikïna, jupanakan ikimp wali atipjatätap layku.
[44] Jupanakar jaytawayasinsti kimsïr kutiw Diosat mayisir saräna, uka kipka arunakampiw mayisirakïna.
[45] Ukatsti Jesusax yatiqirinakapan ukaruw kuttanxäna, jupanakarusti sarakïnwa: —¿Jichhakam ikisipkaktati? Pachax purinxiwa, Jaqin Yuqapan juchararanakan amparapar katuyatäñapataki.
[46] Sartapxam, sarapxañäni; nayar katuntayirix niyaw purinxi.
[47] Jesusax parlaskän ukhamaruw Judasax purinïna, jupasti Jesusan tunka payani yatiqiripat maynïrinwa, jupamp chikasti walja jaqinakaw espadanak apt'ata, lawanak ayt'ata purinipxäna. Jupanakarux sacerdotenakan jilïrinakapampi, markan jilïr jaqinakampiw khithanipxatayna.
[48] Jesusar aljantir Judasasti jupanakarux akham yatichanitayna: “Khitirutix nayax jamp'atkä, ukawa, juparuw katuntapxäta” sasa.
[49] Jesusar jak'achasisinsti, akham sasaw aruntäna: —¡Aski arumäpanay Yatichiri! —sasa. Ukat jamp'att'äna.
[50] Jesusasti Judasarux sänwa: —Jilata, kunarutix jutkta uk luraskakim —sasa. Ukapachaw jaqinakax Jesusar katuntapxäna.
[51] Jesusampïpkän jupanakat maynïriw espadap apsusin jilïr sacerdoten uywatapan jinchup thuquqayäna.
[52] Jesusasti juparux sänwa: —Uchañapar espadam imam. Espadampi nuwasirix, espadampi jiwayatäniwa.
[53] ¿Janit yatkta nayatix munirista ukax, Awkixat yanap mayirista, jupasti waranqa angelanakap nayar arxatir khithanitaspa uksti?
[54] Ukhamäspa ukasti, ¿kunjämatarak phuqhasiñapäki uka Qillqatanakasti phuqhasispasti? —sasa.
[55] Ukapachaw Jesusax jaqinakar jiskt'äna: —¿Kunatarak jumanakasti mä lunthatarjam espadanakampi, lawanakampi nayar katuntir jutapxtasti? Sapürurakis Tatitun utapan jumanakar yatichasipksmaxä, ukkhay katuntapxitasamänxa.
[56] Ukampis taqi akanakax profetanakan arsutanakap phuqhasiñapatakiw lurasi —sasa. Ukapachaw yatiqirinakax Jesusar sapak jaytawayasin jaltxapxäna.
[57] Jesusar katuntirinakasti, Caifasan utaparuw irpapxäna; jupasti sacerdotenakan jilïripänwa, utapansti kamachi yatichirinakampi, jilïr jaqinakampiw tantacht'atäsipkäna.
[58] Pedrosti jayatak Jesusarux arkäna, jilïr sacerdoten uta anqäxapar puriñkama. Mantasinsti, soldadonakamp chikaw qunt'asïna, kunjämarus ukax tukuyani uk yatiñataki.
[59] Sacerdotenakan jilïrinakapampi, Jilïr Tantachasïwinkir jaqinakampisti, Jesusar k'arimpi irkatirinak thaqhapxäna, ukhamat jiwayañatak juchañchatäñapataki,
[60] ukampis walja k'ari jaqinak irkatkipansa, janiw kunat juchañchañsa jikxatapkänti. Ukaruw pani k'ari irkatirimpi purinïna,
[61] jupanakasti sapxänwa: —Aka jaqix siwa: “Nayax Diosan utap t'unjirista, ukatsti kimsürut sayt'ayarakirista” —sasa.
[62] Sacerdotenakan jilïripasti sayt'asisin Jesusarux säna: —¿Janit kuns arskäta? ¿Kunatarak jumat ukham sapxisti? —sasa.
[63] Jesusasti janiw kuns arskänti. Ukat sacerdotenakan jilïripax jupar säna: —Jakkir Diosan sutipxaruw chiq arsuñamatak maysma. Sapxita: ¿Jumax Diosan Yuqapa Cristötati? —sasa.
[64] Jesusasti sarakïnwa: —Jumaw uk sasktaxa. Nayasti sapxaraksmawa, Jaqin Yuqaparux ch'aman Diosan kupïxapan qunt'atäskir uñjapxäta, alaxpachat qinayxan jutaskir uñjapxarakïta —sasa.
[65] Sacerdotenakan jilïripasti uk ist'asin mayjt'asiñat isinakap ch'iyanuqasïna, sarakïnwa: —Aka jaqin arunakapax Diosar ñanqhachir arunakawa. ¿Kunat juk'ampi irkatirinakas munasixa? Jumanakax uka ñanqha arunakap ist'apxtawa.
[66] ¿Jumanakax kamsapxtasa? —sasa. Jupanakasti sapxänwa: —Jupax juchaniwa, jiwayatäñapawa —sasa.
[67] Ukatsti ajanut thuskatapxäna, nuwjapxarakïna. Mayninakasti ajanut t'axllinuqapxäna,
[68] akham sasa: —Niyakixay jumax Cristöstaxa, ¡sapxita, khitis nuwtam! —sasa.
[69] Ukchañkamasti Pedrox uta anqäxan qunt'atäskänwa, ukapachaw mä uywat tawaqux jupar jak'achasisin säna: —Jumax Galileankir Jesusampi chika sarnaqirïtawa —sasa.
[70] Pedrosti taqi jaqinak nayraqatan jan uñt'iriw tuküna, sarakïnwa: —Janiw kunat parlatamsa yatkti —sasa.
[71] Ukatsti punku tuqir mistkipan yaqha uywat tawaqux jupar uñjasin ukankirinakan nayraqatapan sarakïna: —Aka jaqix Nazaretankir Jesusampi sarnaqiriwa —sasa.
[72] Pedrosti juramento lurasaw wasitat jan uñt'ir tuküna: —¡Janiw uka jaqirux uñt'kti! —sasa.
[73] Mä juk'ampjarusti, ukankirinakaw Pedror jak'achasisin sapxarakïna: —Jumax Jesusan arkirinakapat maynïrïskapuntawa; parlatamas qhanäskiwa —sasa.
[74] Ukapachaw jupax juramento luräna, ñanqha arumpiw sarakïna: —¡Janipuniw uka jaqirux uñt'kti! —sasa. Ukspachaw wallpax art'äna,
[75] Pedrosti ukkhakiw kunjämtix Jesusax siskatayna uk amtasïna: “Wallpax janïr art'kipana, kimsa kutiw nayarux jan uñt'ir tuküta” sasa. Uka chiqat mistusinsti, Pedrox walpun jachäna.