[1] Jesusax uka pachpa uruw utat mistusin quta lakan qunt'asïna.
[2] Walja jaqinakan tantthaptanipansti, Jesusax mä boter mantasin ukan qunt'asïna, jaqinakasti quta thiyarukiw qhiparapxäna.
[3] Ukatsti Jesusax uñtasïwinak tuqiw walja yatichäwinak yatichäna. Jupanakarux sarakïnwa: “Mä yapuchir jaqiw phawir mistüna.
[4] Phawkasinsti, mä yaqhip jathax thakhi jak'aruw purïna, ukatsti jamach'inakaw jutasin pallthapiwayxäna.
[5] Mä yaqhip jathasti, qalararawjaruw purirakïna, kawkhantix laq'ax juk'akïkän ukawjaru; uka jathasti juk'a laq'anïtap laykux jank'akiw mistunïna;
[6] inti lupt'anipansti, pharsuwayxänwa, jan suma saphinïtap laykusti, wañsuwayxänwa.
[7] Yaqhip jathasti, ch'aphinak taypiruw purïna, ch'aphinakasti jiltasin uka alirux chhaqtayäna.
[8] Ukampis ukat ukxar jathax suma laq'awjaruw purïna, ukatsti wali sum achu churäna, mayatxa patakaru, chikatanakasti suxta tunkaru, mayanakasti kimsa tunkaru.
[9] ¡Jumanakatix ist'añ munapxstaxa, ist'apxam!”
[10] Jesusan yatiqirinakapasti jupar jak'achasisin jiskt'apxäna: —¿Kunatarak uñtasïwinak tuqi jaqinakar yatichtasti? —sasa.
[11] Jesusasti jupanakarux sänwa: “Diosax jumanakar kunanakatix alaxpachan imantatäki ukanak yatiyapxtam, jupanakarusti janiw yatiyatäkiti.
[12] Khitinakatix utjirinïki ukanakarux juk'ampiw churasini, ukatsti juk'amp waljaw utjarapini; ukampis khitinakantix jan kunapas utjkani ukanakatxa, mä juk'a utjiripas apaqatäniwa.
[13] Ukat jumanakarux uñtasïwinak tuqi yatichapxsma; jupanakasti uñjkasinsa janiw uñjapkaniti, ist'kasinsa janiw amuyapkaniti.
[14] Ukhamasti, jupanakampix Isaías profetan arsutaparjamaw phuqhasiski: ‘Jumanakax ist'kasinsa janiw amuyapkätati, uñjkasinsa janiw uñjapkätati.
[15] Aka jaqinakan chuymapax qalaratawa, jinchunakapas jan ist'añatak llupantatawa, nayranakapas jan uñjañatak jist'antatawa; jan amuyt'apxañapataki, nayan ukar jan kuttaniñapataki, ukhamat nayan jupanakar jan qhispiyañaxataki’.
[16] “Ukampis jumanakax kusisiñanïpxtawa, nayranakamax uñjiwa, jinchunakamasti ist'iwa.
[17] Qhanak sapxsma, walja profetanaka, walja aski jaqinakaw kuntix jumanakax uñjapkta ukanak uñjañ munapxäna, ukampis jupanakax janiw uñjapkänti; ist'añ munapkän ukanaksa, janiw ist'apkänti.
[18] “Jichhasti kuntix uka uñtasïwix sañ munki uk ist'apxam.
[19] Khitinakatix Diosan suma yatiyäwip ist'apki ukat janirak amuyt'apki, ukanakax thakhir purkatayna uka jathamp sasiwa; supayasti jutasin chuymapar phawantat arunak apsuwayxi.
[20] Qalawjar purki uka jathaxa, khitinakatix jank'aki wali kusisiñampi katuqapki jupanakawa,
[21] jan suma saphinïpxatap laykusti, janiw sum sayt'asipkiti; kunapachatix Diosar arkapxatap layku t'aqhisiñanakasa, jan walt'añanakas jutchi, ukkhax jank'akiw uka suma arunakat mayjt'asxapxi.
[22] Ch'aphi taypir purir jathasti, suma arunak ist'ir jaqinakawa, akapach yänakat llakisitapampi, qamir yänakar munatapampiw atipjayasipxi. Taqi ukanakaw suma arunakar chhaqtayi, janirakiw chuymanakapan jiltaykiti.
[23] Ukampis suma laq'ar purir jathax, Diosan arunakap ist'irinakawa, jupanakax sum amuyt'apxi, ukatsti mä suma achu churapxaraki, mayatxa patakaru, mayatsti suxta tunkaru, yaqhipasti kimsa tunkaru.”
[24] Ukatsti Jesusax yaqha uñtasïwit jupanakar parlt'äna: “Diosan qhapaq markapax kunjämatix mä jaqix yapupar suma jathampi phawantki ukar uñtatawa;
[25] ukampis taqinin ikiñapkamaw mä uñisir jaqix jutasin jan wali qura jathampi trigo yapur phawantawayi.
[26] Kunapachatix trigox alsunisin puqurxäna ukkhasti, uka jan wali qurax ukampi chikarakiw uñstäna.
[27] Ukapachaw yapuchirinakax yapunir sapxäna: ‘Phawanktas ukax suma jathänwa. ¿Kawkitarak uka jan wali qurasti uñstisti?’ sasa.
[28] Yapunisti jupanakarux sänwa: ‘Mä uñisir jaqiw uk lurpacha’ sasa. Yapuchirinakasti jiskt'asipkakïnwa: ‘¿Uka jan wali qura jik'irir sarapxiristti?’ sasa.
[29] Yapunisti sänwa: ‘Janiwa, uka quranak jik'irkasinxa trigomppach jik'irapxasma.
[30] Paypach aliskpan sama, kunapachatix yawthapiñ pachax purinkan ukkhaw uka quranak nayraqat apthapir khithä, ukatsti marqa marqa wakicht'asin ninar phichhantayä, trigorusti pirwaruw sum imayarakï’ ” sasa.
[31] Jesusasti yaqha uñtasïwit jupanakarux yatichäna: “Diosan qhapaq markapax kunjämatix mä jaqix yapupar mostaza jatha satantki ukar uñtatawa.
[32] Chiqpachansa mostaza jathax taqi jathanakat sipan sinti jisk'akiwa; ukampis alsunisin jiltki ukkhasti, panqar yapun taqi alinakat sipan jach'awa, mä jach'a quqjamaw tukuraki, ukarusti, jamach'inakaw juti, layminakaparuw tapachasipxi” sasa.
[33] Ukatsti yaqha uñtasïwit jupanakarux parlarakïna: “Diosan qhapaq markapax mä levadurjamawa, kunjämatix mä warmix walja jak'ur mä juk'a levadurampi chaptasax taqpach masa puqtayki ukar uñtatawa.”
[34] Jesusax taqi ukanakatxa, uñtasïwi tuqipuniw jaqinakarux amuyt'ayäna, jan uñtasïwimpisti janiw kunsa yatiykänti.
[35] Taqi akanakasti kunjämtix profetax qillqkatayna ukarjamaw phuqhasiskäna: “Uñtasïwinak tuqiw parlä; kunanakatix uraqi qalltäwitpach imantatäkän ukanak yatiyä.”
[36] Taqi jaqinakar khithanukxasinsti, Jesusax utaruw sarxäna, ukan yatiqirinakapax jupar jak'achasisin jiskt'apxäna: —Uka jan wali qurat uñtasïwix kuntix sañ munki uk yaticht'apxita —sasa.
[37] Ukapachaw Jesusax jupanakarux säna: “Suma jatha satirix Jaqin Yuqapawa,
[38] yapusti aka uraqiwa. Suma jathasti Diosan ajllit wawanakapawa, jan wali jathäki ukasti supayan wawanakapawa,
[39] jan wali jathampi phawantirix pachpa supayawa. Yawthapiñ pachasti akapach tukuskan uka uruwa, yapu apthapiristi angelanakawa.
[40] Kamisatix jan wali quranakax apthapisin ninar phichhantataxa, ukhamarakiw akapachan tukusiñap urun lurasini.
[41] Jaqin Yuqapasti angelanakaparuw khithanini, Diosan markapat mayninakar juchar tinkuyirinakaru, jan wal lurir jaqinakar apthapiri.
[42] Jupanakarux nina aqkir hornoruw jaquntapxani, ukan wararipxani, laka ch'aksa t'urusipxani.
[43] Diosan munañap phuqhirinakasti, intjamaw Awkipan qhapaq markapan qhanapxani. ¡Jumanakatix ist'añ munapxstaxa, ist'apxam!
[44] “Diosan qhapaq markapax uraqin imantat qurir uñtatawa. Mä jaqix uka imantat quri jikxati, ukatsti pachparuw imanti; ukatsti kusisitaw taqi kunatix jupan utjki ukanak aljantasin uka uraqi alasxi.
[45] “Diosan qhapaq markapax kunjämatix mä alakipa jaqix suma llijkir qalanak thaqki ukamp sasiwa;
[46] kunapachatix wali jila alan llijkir mä qala jikxatki ukkhasti, taqi yänakap aljantasin uka llijkir qal alasxi.
[47] “Diosan qhapaq markapax kunjämatix mä qänax qutar jaquntatax kunayman chawllanak katsuxa ukamp sasiwa.
[48] Chawllan phuqhantat qänarusti, chawlla katurinakax wañaruw qatatsupxi, ukatsti uka chawllanak ajllirpayapxi; suma chawllanaksti walayaruw imxapxi, jan walinaksti willirpayxapxiwa.
[49] Uka pachparakiw akapachan tukusiñap urun lurasini: angelanakaw aski jaqinakampi, jan wali jaqinakamp jaljir mistupxani,
[50] jan wali jaqinakarusti nina aqkir hornoruw jaquntapxani. Ukapachaw wararipxani laka ch'aksa t'urusipxani.”
[51] Jesusasti jupanakaruw jiskt'äna: —¿Jumanakax taqi ukanak amuyapxtati? —sasa. Jupanakasti sapxänwa: —Amuyapxtwa —sasa.
[52] Ukat Jesusax jupanakar säna: —Kunapachatix kamachi yatichirix Diosan qhapaq markapat sum yatxi ukkhaxa, utani jaqjamawa, jupasti imat yänakapatxa, machaq yänaka, mirq'i yänak apsunki ukar uñtatawa —sasa.
[53] Kunapachatix Jesusax uñtasïwinak tuqi yatichañ tukuyxän ukkhasti, uka chiqat sarawayxänwa,
[54] ukatsti Nazaret markaparuw purxäna, ukansti sinagogan yatichañ qalltäna. Ist'apkän uka jaqinakasti wal muspharasipxäna, sapxarakïna: —¿Kawkitarak aka jaqisti ukham yatiñ kankañ yatiqanpachasti? ¿Kunjämatarak uka muspharkañanak lurpachasti?
[55] ¿Janit jupasti José k'ullu khithun yuqapäkisti? ¿Janit taykapasti María satäkisti? ¿Janit jupasti Santiago, José, Simón, Judas ukanakan jilapäkisti?
[56] ¿Janirakit kullakanakapasti jiwasanak taypin jakapkisti? ¿Kawkitpunirak taqi akanaksti yatiqanpachasti? —sasa.
[57] Jupanakasti janiw Jesusan yatichatanakap ist'añ munapkänti. Ukat Jesusax jupanakar säna: —Taqi chiqan mä profetarux sum katuqapxi, ukampis markapansa, utapansa janiw sum katuqapkiti —sasa.
[58] Jaqinakan jupar jan iyawsapxatap laykusti, janiw kuna muspharkañanaksa uka chiqan lurkänti.