[1] Tatitux Moisesaruw sarakïna:
[2] “Israelitanakar akham sarakim: “Nayätwa Tatit Diosapaxa.
[3] “Egipto markan sarnaqäwinakaparjamax jan jakapxamti, kawkïr markantix jumanakax jakapkäyät ukana. “Canaán uraqin sarnaqäwinakaparjamax jan jakapxamti, kawkïr uraqirutix nayax jakapxañamatak irpapksma uka uraqina, janirak uka markan kamachinakaparjamas jakapxamti.
[4] “Nayan arsutanakaxar phuqhapxam, nayan kamachinakaxarjam sarnaqapxam. Nayätwa Tatit Diosapaxa.
[5] “Nayan arsutanakaxa, kamachinakaxsa phuqhapxapunim. Kawkïri jaqitix ukanak phuqkani ukasti jakaniwa. Nayätwa Tatituxa.
[6] “Janipuniw khiti chachasa pachpa wila masipankir warmiparux warmisiñapäkiti. Nayätwa Tatituxa.
[7] “Janirak taykamar warmisisax awkimar ñanqhachamti; ukhamarus taykamawa, janiw jupampix jucha lurañamax wakiskiti.
[8] “Awkimarux jan ñanqhachamti warmipar warmisisaxa.
[9] “Janipuniw kullakamarux warmisïtati; awki tuqitsa jan ukax tayka tuqitsa kullakamäskpan; utamansa jan ukax yaqha chiqan yurirïpasa, janipuniw jupampix jucha lurañamax wakiskiti.
[10] “Janipuniw khitis imill wawa allchhiparux warmisiñapäkiti, ukax yuqaman wawapäskpasa jan ukax phuchhaman wawapäskpasa. Janipuniw jupampix jucha lurañamax wakiskiti.
[11] “Janipuniw awkiman warmipan phuchhaparux warmisïtati. Jupax awkiman phuchhapawa, ukhamarus kullakamarakiwa. Janipuniw jupampix jucha lurañamax wakiskiti.
[12] “Janipuniw awkiman kullakaparux warmisïtati, jupax tiamawa, ukhamarus pachpa awkiman wilapat wilapanirakiwa.
[13] “Janirakiw taykaman kullakaparus warmisïtati, jupax pachpa taykaman wilapat wilapaniwa, ukhamarus tiamawa.
[14] “Tiomarux jan ñanqhachamti warmipar warmisisaxa, jupasti tiamawa.
[15] “Yuxch'amarux jan warmisimti, jupax yuqaman warmipawa; janipuniw jupampix jucha lurañamax wakiskiti.
[16] “Janirak jilamarus warmipar warmisisax ñanqhachamti.
[17] “Mä warmiru, uka warmin phuchhaparusa, allchhiparusa, ukanakax yuqapan phuchhapäskpasa, jan ukax phuchhapan phuchhapäskpasa, jupanakarux janipuniw warmisïtati. Uka luräwisti sinti jach'a juchapuniwa, pachpa wila masïtap layku.
[18] “Warmiman kullakaparux jan warmisimti, janirak jupampix wachuq juchsa luramti warmim jakaskipanxa, jan ukasti kullakpuraw jan walt'añar puripxani.
[19] “Phaxsi wilan warmirusti janipuniw warmisïtati.
[20] “Jaqi masiman warmiparusti janipuniw warmisïtati, ukham lurät ukkhasti, q'añuchjasïtawa.
[21] “Wawanakamsti janipun Moloc sat diosarux wilañchat luqtamti. Janirak ukham lurasax Diosan sutipsa ñanqhachamti. Nayakïtwa Tatituxa.
[22] “Jan mä chachampix warmimpjam ikintamti. Ukham chachapur ikintañax sinti jan wali q'añu luräwipuniwa.
[23] “Janirak animalanakampis wachuq jucha luramti, ukhamat jan q'añuchasiskañamataki. Janirakiw mä warmisa animalanakampix wachuq jucha lurañapäkiti. Ukax sinti jan wali q'añu luräwiwa.
[24] “Janipun ukanakampix q'añuchjasipxamti. Kawkïr markanaktix nayax jumanak nayraqatat ananukkä ukanakasti uka luräwinakampiw q'añuchasipxäna,
[25] uraqinakapas uka kipkarakiw q'añuchjat uñjasxarakïna, ukatpï nayax jupanakarux uka ñanqha luratanakapat wayt'araktxa, uka markas taqi jakirinakaparuw ananukxaraki.
[26] Ukampisa jumanak israelitanaka, ukhamarak kawkïri yaqha markat jutasin jumanak taypin jakir jaqinakasa, nayan kamachinakaxar phuqhas sarnaqapxam, janirak uka q'añu luräwinak lurapxamti,
[27] kawkïr jaqinakatix jumanakat nayräxa aka uraqin jakapkän ukanakax, taqi uka q'añu luräwinak lurapxäna, ukham lurapxatapampiw uka uraqis q'añuchat uñjasirakïna.
[28] ¡Uka uraqisti janirak jumanakarux apanukpati, kunjämtix jumanakat nayra jakapkän ukanakar apanukkän ukhama!
[29] Khititix uka q'añu luräwinak luraskani ukasti, markap taypit apanukutäniwa.
[30] Ukhamasti, nayan kamachi arunakax phuqhas sarnaqapxam, kuna q'añu luräwinak lurasatix jumanakat nayräxa jakir jaqinakax sarnaqapkäna uka luräwinakarux jan puripxamti, janirak ukanakampis q'añuchjasipxamti. Nayätwa jumanakan Tatit Diosamaxa” sasa.