[1] Tatitux Moisesampiru, Aaronampiruw säna:
[2] “Israelita jaqinakarux sapxam, aka uraqin utjki taqi uka animalanakat manq'apxäta,
[3] kawkïrinakatix khisthurïpki, kayu sillunakapas payar jaljtatäki ukanaka;
[4] ukampisa janiw aknïri animalanakan aychap manq'apxätati, khisthurïskpasa, jan ukax kayu sillunakapas payar jaljtatäskpan: “Camello, tejón, jach'a jinchun wank'u, uka animalanakan aychap janiw manq'apxätati, qawqhas khisthurïskpan, ukampis kayu sillunakapax janiw payar jaljtatäkiti.
[7] “Khuchhi aychsti janirakiw manq'apxätati, khuchhin kayu sillunakapas payar jaljtatäskpan, ukampisa janiw khisthurïpkiti. Khuchhirux q'añu animalat uñt'apxäta.
[8] “Uka animalanakan aychapsti janipuniw manq'apxañamäkiti, janirakiw uka jiwat janchinakapsa llamkt'apxañamäkiti. Uka animalanakarusti q'añu animalanakat uñt'apxäta.
[9] “Kawkïri animalanakatix qutansa, jan ukax jawiranakansa jakapki ukanakatxa, kawkïrinakatix chhiqhanakanïpki, k'ilinakanïpki ukanakak manq'apxäta.
[10] Ukampis kawkïrinakatix jan chhiqhanakanïkani, janirak k'ilinakanïkani uka animalanakxa, janiw manq'apxañamäkiti, jach'a qutana, jan ukax jawir umanakan utjirinakäskpasa. Ukanakarusti jan wali animalanakat uñt'apxañamawa, jiwat janchip uñxatasas axtasipxañamawa.
[13] “Akïr jamach'inaksti janiw manq'apxätati; jan ukasti axtaskañ jamach'inakat uñt'apxäta: Paka, jach'a pakali, quta pakali, milano, tiptiri, allqamari, suri, ch'usiqa, qillwa, gavilanes, cormorán, ibis, siwiq'ara, juku, cisne, pelícano sat quta jamach'inaka, cigüeña, waq'ana, abubilla sat jamach'i, chiñi, taqi ukanaka.
[20] “Kawkïr jisk'a laq'unakatix chhiqhanakanïpki, ukat pusi kayut sarnaqapki ukanakax axtaskay laq'unakat uñt'apxäta.
[21] Ukampisa aka laq'unakatxa kawkïrinakatix jach'a kayunïtapat uraqin thuqnaqapki ukanak manq'asipkasmawa.
[22] Ukhamax kunayman t'iju t'ijunaka, grillonak manq'apxäta.
[23] Ukampis kawkïri laq'unakatix chhiqhanakanïpki, ukat pusi kayupampi sarnaqapki ukanakarux jan wali laq'unakat uñt'apxäta.
[24] “Jumanakax aka luräwinak lurasax, q'añuchataw uñjasipxäta: “Khititix uka jiwat animalanakar llamkt'kani ukasti, jayp'thapiñapkamax q'añupuniw uñjasini.
[25] “Khititix uka jiwat animalanak aptkani ukasti, isipxa t'axsuqasxañapawa, ukampis jayp'thapiñapkamax q'añukipunïskaniwa.
[26] “Kawkïr animalan kayu sillunakapatix payar jan jaljtatäkani, jan ukax janis khisthurïkchini ukanakxa, q'añu animalanakatpun uñt'apxäta, khititix uka animalar llamkt'kani ukax q'añurakiw uñjasini.
[27] “Kawkïri pusi kayuni animalanakatix sarnaqañatak kayu qutunakapampi takt'asipki ukanakarux, q'añu animalanakat uñt'apxäta.
[28] Ukhamaraki, khititix uka jiwat animalanakar llamkt'kani ukanakax, jayp'thapiñapkam q'añukipuniw uñjasipxani, isinakapsa t'axsuqasipxañapawa, jumanakasti uka animalanakarux q'añu animalanakat uñt'apxäta.
[29] “Kawkïr laq'unakatix uraqinjam qatatnaqtapki ukanakarusti q'añu laq'unakat uñt'apxäta, ukanakasti akanakawa: Chayinaka, achakunaka, kunayman asirunaka,
[30] salamanquesas sata laq'unaka, cocodrilonaka, jararankhunaka, jisk'a jararankhunaka, camaleón sat jararankhunaka.
[31] “Taqi animalanak taypinsti uka laq'unakarux q'añu laq'unakat uñt'apxäta. Khititix uka jiwat laq'unakar llamkt'kani ukasti, jayp'thapiñapkamaw q'añuchat uñjasini.
[32] “Uka kipkaraki, uka jiwat animalanakan janchipatix lawat lurata yänakxaru, lip'ichit lurat yänakxaru, isinakxaru, jan ukax lurañataki yänakxaru liwxattani ukax, jayp'thapiñkamaw q'añuchat uñjasini. Q'umachañatakisti, umampi sum jariqatäñapawa.
[33] “Uka jiwat animalanakan janchipatix mä phukhxaru liwxattani ukaxa, taqi kunatix uka phukhun utjki ukax q'añut uñt'atäxaniwa, uka phukhusti p'akjatäxañapawa.
[34] Uka phukhun utjir umatix kuna manq'añxarus ch'aqxatani ukax, q'añut uñt'atäniwa; ukatsti kuna umatix uka phukhun utjkani ukas q'añut uñt'atarakïniwa.
[35] Uka jiwat animalan janchipatix mä qhiri patxar liwxattani ukasti, q'añut uñt'atäxaniwa; taqi ukanakasti t'unjatäñapawa. Ukanaksti q'añuchat yänakat uñt'apxarakïta.
[36] “Taqi khitinakatix uka jiwat animalanakan janchip llamkt'apkani ukanakasti, q'añut uñt'atapunïniwa. Ukampis kawkha phuch'unakattix umax apsutäki uka phuch'ux q'umakipunïskaniwa.
[37] “Uka animalanakan jiwat janchipatix yapuchañ jatharu liwxattani ukasti, uka jathax q'umakïskaniwa;
[38] ukampisa uka jathatix umampi warxatasispa, ukat uka jiwat animalan janchipax ukxaru liwxattani ukapachasti, uka jathax q'añut uñt'atäniwa.
[39] “Kawkïri uywanaktix jumanakax manq'añatak uskusipkäyäta ukat uka uywax jiwxarakini ukasti, khiti jaqitix uka jiwat uywar llamkt'kani ukax, jayp'ukam q'añuw uñjasini;
[40] uka jiwat uywan aychap manq'kani ukasti, isipxa t'axsuqasxañapawa, ukatsti q'añurakiw jayp'ukam uñjasini; khititix uka jiwat uywar waysuñatak llamkt'kani ukasti, isipxa t'axsuqasxañapawa, jupasti jayp'ukamaw q'añuchat uñjasini.
[41] “Uraqinjam qatatnaqtki uka laq'unakan aychapsti janipuniw manq'apxätati, uka laq'unakasti axtaskañ laq'unakawa.
[42] “Uraqinjam qatatnaqtir animalanaksti janipuniw manq'apxätati, purakapamp uraqinjam qatatnaqtirïskpasa, pusi kayuta, jan ukax walja kayunakat sarnaqirïskpasa, uka laq'unakax wali axtaskañ laq'unakawa.
[43] Jumanakax uka qatatnaqtir animalanak manq'asax jan q'añuchasipxamti, janirak axtaskañas tukupxamti.
[44] Nayätwa jumanakan Tatit Diosamaxa. Jumanakasti q'umachasipxañamawa, ukatsti qullanäpxañamarakiwa, nayan qullanätax layku. Janipuniw jumanakax kawkïri laq'unakatix uraqinjam qatatnaqtapki ukanakampix q'añuchayasipxätati.
[45] Nayätwa Tatituxa, nayarakiw jumanakan Diosamäñaxatak Egipto markat irpsunipxsma. Jumanakax qullanäpxañamawa nayan qullanätax layku.”
[46] Taqi ukanakawa kunanakatix animalanak tuqitxa lurapxañamäki uka yatichäwinakaxa, jamach'inakxata, uman jakapki ukanakxata, uraqinjam qatatnaqtapki ukanakxatsa,
[47] ukhamat kunäkitix q'umaxa, q'añusa uk yatipxañamataki, ukhamarak kawkïr animalanakatix manq'añäki, jan manq'añäki ukanak yatipxañamataki.