[1] Nayax markaxaruw qhispiyañ munta, ukampis jupanakax walja juchanak lurapxi. Taqinis k'arikamakiwa; utanakar mantasin lunthatsupxi, marka thakhinakan jaqinakat lluch'supxi.
[2] Nayax jupanakarux sum uñt'ta: Ñanqha lurañanakampi phuqhantatäpxiwa, ukampis janiw ukhamäpxatap amuyasipkiti.
[3] “Markaxax ñanqha luräwinakapampi, k'arisiñanakapampix, reyirus, jilïrinakaparus wal kusisiyi.
[4] Taqi jupanakasti wachuqa jucha lurirkamakïpxiwa; junt'uptayat hornor uñtatäpxiwa, janiw juk'amp junt'uptayañax wakiskxiti, t'ant'a luririx t'ant'a masan puqtañapak suyxañapa.
[5] Reyisan jach'a phunchhäwi urupanxa, jilïrinakax vino umantayasaw usjayapxi. ¡Jupasti khitinakatix jupat larusipkäna ukanakampiw wali sum jikintasi!
[6] Chuymanakapansti reyir jan walinak lurañ amtapxi, arum paqaraw jan samart'as uka jan walinak lup'ipxi, ukhamata willjta tuqiru q'al tukjañataki.
[7] Taqi jupanakax mä hornjamaw nakhapxi, marka apnaqirinakaparus nakhantasa. Reyinakapas aynacht'awayxapxiwa, janirakiw maynis nayar art'asinirix utjkiti.
[8] “Israel markax yaqha markanakampiw mayachasxi. Jan suma qhatit t'ant'jamaw tukuwayxi, maysäxax suma qhatita, maysäxasti ch'uqïskaraki ukhama.
[9] Jaya markankir jaqinakaw ch'amapsa tuksuwayxi, jupasti uk janiw amuyaskiti. ¡Ñik'utanakapas qaqakamakïxiwa, ukatsa janikiw amuyaskiti!
[10] Jach'a jach'a tukutapaw Israelarux aynacht'ayaski, ukhamäkipansa, janiw Tatit Diosapar kuttanipkiti, janirakiw thaqtapkisa.
[11] Israelax jan amuyuni ipirat palomjamaw jikxatasi. Egipto markaruw yanap mayi, Asiria markaruw yanap mayirix sari.
[12] Kunapachatix uka markanakar sarapkani ukkhaxa, qänaxampi jaqxatasaw jupanakarux jamach'inakarjam jalt'ayä; ñanqha lurapxatapat jupanakarux mutuyaskä.
[13] “¡Kunakïkan nayar apanukupxatapatxa! Nayar saykatatapatxa, q'ala tukjatäpxaniwa. Nayax jupanakar qhispiyañ munta, ukampis jupanakax k'arintapxituwa.
[14] Ikiñanakapansa usuchjataw jachasipki, janchinakapsa mä amtañampiw chhuxrinuqasipxi, ukampis janiw taqi chuyma nayar mayisipkituti; suma achunak katuqañatakikiw ukham lurasipxi, ¡ukampis nayar saykatasipkakituwa!
[15] Nayaw jupanakarux yatichta, ch'amsa churarakta, ukampis jupanakax nayatakix jan walinakak amtasipki.
[16] Yaqha diosanakar yupaychiriw sarxapxi; wixru mich'inak antutt'añar uñtatäpxiwa, mich'inakapasti janirakiw kawkharutix puriñapäki ukkhar purkiti. Jan walinak parlapxatapatsti, jilïrinakapax espadampi jiwarayatäpxaniwa, Egiptonsti jupanakat larusipxaniwa.