[1] Kunapachatix Efrainankir jaqinakax arsupkän ukkhaxa, Israelan maynïr ayllunakapax axsartañampiw isch'ukipxäna; ukampis Efrainax Baal diosar yupaychasa jucha luratapat jiwarakïna.
[2] ¡Jichhas juchxa lurasipkakiwa! Qullqinakap umatatayasinsti yaqha diosanak lursusipxi, kunjämarutix munapki ukhamarjama. Ukatsti sapxarakiwa: “¡Wilañchanak luqtapxam!” sasa. Jaqinakasti uka vaca qallur uñtat diosanakaruw jamp'atipxi.
[3] Ukat jichhax qhantati urpur uñtata, willjta sullar uñtat chhaqtapxani, thayan apat waña laphir uñtata, phayañ utat mistur jiwq'ir uñtat chhaqtapxani.
[4] Tatitux Israel markaparux siwa: “Naya Tatituw juman Diosamätxa, Egiptonkkäyätas ukkhatpacha; naya sapakiw juman qhispiyir Diosamätxa.
[5] Nayaw uka waña parintat wasar uraqin imäyäsma.
[6] “Kunapachatix jumanakan manq'añanakamax jilarxän ukkhaxa, jach'achasiñampiw phuqhantasipxtaxa, nayatsti armasxapxaraktawa.
[7] Ukat jichhax jupanakatakix mä leonar uñtatäyäxa, kunjämtix mä leopardox manq'antañatak thakhin suyxatkix ukhama.
[8] Qallunakap chhaqhayasir jukumarir uñtataw jupanakarux jikxatä, ukatsti chuymapsa jisk'a jisk'a tukjä. Mä leonar uñtataw jupanakarux pachpan manq'antä; ch'uminkir laq'ur uñtataw jupanakarux tukjarakï.
[9] Israel, ukham jichhax tukjäma, janirakiw khitis jark'aqkätamti.
[10] Jichhasti, ¿kawkinkarak reyimasti, uka markanakaman jumar qhispiyañatakisti? ¿Kawkinkarak jilïrinakamasti, khitinakarutix reyinaksa maykäyäta ukanakasti?
[11] Jumampi phiñasitäsin reyinak churäyäsma, jumampi phiñasitäsin uka reyinak apaqxaraksma.
[12] “Israelan ñanqha luratanakapax qillqatawa; jucha luratanakapasti suma qillqantatawa.
[13] Israelan yuriñap pachax purinxiwa, ukampis janiw suma wawäkiti, yuriñatakis janirakiw sum wakicht'atäkiti.
[14] ¿Ukatti jichhasti jiwañat qhispiyapxämasti? ¡Ukampis janiw khuyapayasiñ uñacht'aykxämati! Jiwa, ¡Jach'a ch'amamampi aka markar t'unjir jutam!”
[15] Israel, inas wasitat qamiriptchisma, ukampis nayax q'al t'unjäma, kunjämtix wasarat sartankis uka thayax uma jalsu phuch'unaksa q'al wañt'ayki ukhama. Ukatsti uñisirinakamax suma imasitanakam q'al katuntasxapxani.
[16] Samaria markasti, Tatitur saykatasitapat mutuyäwi katuqani. Espadampi jiwarayatäpxaniwa, wawanakapas uraqir jisktaskam jiwarayatäniwa, usur warminakas payar kharjatäpxarakiniwa.