[1] Israelax thayapitakis sarnaqkaspa ukhamawa; sapürus inti jalsu tuqit jutir thayarukiw arkaski. K'arisiñanakapampi, nuwasiñanakapampisti waliw jilxatti, Asiria markampis arust'asiwa, Egipto markarusti aceitenak apayi.”
[2] Tatitux Israelampix ch'axwankiwa. Jacobun markaparusti sarnaqäwipatjam mutuyani; luräwinakapatjam kunatix katuqañapäki uk katuqapxarakini.
[3] Jacobux, janïra yurkasapuniw jilaparux sallqjäna, jach'äxän ukkhasti Tatituw jupar Betel chiqan uñstäna. Ukansti mä angelampiw nuwasïna, ¡juparusti atipjänwa! Ukatsti jacht'asisaw juchapat pampachayasiñatak Tatitur mayisïna, Tatitusti pampachänwa.
[5] Tatitu, taqi ch'aman Dios; ¡Tatitu sataw sutipaxa!
[6] Ukhamasti, israelitanaka, juchanakamat pampachayasiñatak Tatitur mayisipxam; chiqpach chuymamampi, askimpirak sarnaqapxam, ukatsti Tatitumarupun alkatasipxarakim.
[7] Tatitux siwa: “Canaán jaqinakax k'ari tupuñanak apnaqañ yatipxi, sallqjañ munapxapuniwa.
[8] Israelitanakasti sarakiwa: ‘¡Jïsa, qamiriw tukta, taqi kun jikxatt'asirakta; ukampis janiw khitis jalaqtanak uñjataxat juchañchkitaspati, lunthatasiñampi jikxatatäkchi ukasa!’
[9] Egipton jakkäyätas ukkhatpachaw nayax Diosamätxa, jichhax wasitat chhujllunakan jakayarakïma, kunjämatix wasaran sarnaqapkäyätax ukhama.
[10] “Nayaw profetanakarux parlta, unañchäwinakapsa yapxataraktwa, jupanak tuqirakiw uñtasïwinak parlarakta.
[11] Galaad chiqan yaqha diosanakaw utji, k'ari diosanakkamakiwa. Guilgal chiqansti urqu vacanakrak wilañcha luqtapxi; altaranakapasti q'ala tukjatawa, qala qutunakjam yapunak taypin willtatarakiwa.”
[12] Jacob chachasti Aram tuqiruw jaltxäna, ukansti warmi jikxatañatakix ovejanak awatïna.
[13] Tatitux mä profeta tuqiw Egiptot Israel markarux irpsunïna. ¡Mä profeta tuqirakiw juparux sum uñjarakïna!
[14] Israelita jaqinakax Tatitur wal phiñasiyapxäna, chuymapsti walpun ust'ayapxäna. Ukat Tatitux jaqi jiwayatanakapat juchañchasin t'aqhisiyani, jupanakpacharuw ñanqha luratanakapax kutxatarakini.