[1] Tatiturux altar jak'ankaskir uñjta, jupasti situwa: “Uta pirqar k'uphantam piläranakap unxtayañkama; ¡ukhamat jaqinakxar allxattasin jiwaraypan! Qhiparapkani ukanakarusti espadampiw jiwarayä: inakiw jaltañsa munasipkani, janipuniw maynis qhispkaniti;
[2] inakiw manqhapachkam saraqasin imantasisipkani, ukawjatsa waysusinkakïwa; inakiw alaxpachkamas makhatasipkani, ukawjatsa wayuqasinkakïwa.
[3] Carmelo qullu patarus imantasisipkpan, ukakamas thaqhirix saraskakïwa; quta manqharus nayat imantasisipkpan, quta manqhankir laq'ur khithasaw nayax tukjayä;
[4] uñisirinakapas yaqha markar katuntat apasipkpan, ukansa espadampi jiwarayatäpxañapatakiw mayirakïxa. ¡Jupanakarux uñch'ukiskakïwa, nayranakaxax jan walitakiw jupanak uñch'ukini, janiw askitak uñch'ukkaniti!”
[5] Taqi ch'aman Tatit Diosax uraqiruw takt'i, uraqisti umatatiwa, jaqinakapax uk uñjasax taqiniw jachapxi. Kunjämatix Nilo jawiran umax jilxatti, wañaqaraki, ukhamaw uraqix uñstani, chhaqtarakini.
[6] Tatitux alaxpacharuw utap sayt'ayi, qalltapsti uraqxaruw utt'ayi, juparakiw qutat umanak jutayi, uka umanakampiw uraqirux warxati. Sutipasti Tatituwa.
[7] Tatitusti israelitanakarux akham siwa: “Nayatakix jumanakasa, etiope jaqinakas mayakïpxtawa. Kunjämtix jumanakar Egipto markat irpsunipksma, ukhamarakiw filisteonakarux Creta wat'at irpsunta, arameonakarusti Quir sat markat irpsunirakta.”
[8] Tatitux aka jucharar markarux wal uñch'ukiski, ukatsti sarakiwa: “Aka uraqit jupanakarux q'al chhaqtayä, ukampis Jacobun utapankirinakak jilt'ayä. Uksti, naya, Tatituw arsta.
[9] Israel markan jawq'sutäñapatakix nayaw arsü, susuñampi susurpayañataki, kamisatix mä susuñat sususax, mä trigosa uraqir jan jalaqtayaski ukhama.
[10] Markaxan taqi jucharar jaqinakax espadampi jiwarayatäpxaniwa; khitinakatix sapki: ‘Janiw ukanakax ukham luraskaniti, janirakiw kuna jan walis katjkistaniti’ sasa.
[11] “Davidan tinkut utap wasitat sayt'ayañ urux jutaskiwa. Pirqa p'iysutanaksa phuqhantäwa, pirqa tinkutanaksa wasitat sayt'ayä, kunjamäkäntix nayrapachax ukham lurt'arakï,
[12] Edom markan jilt'irinakasa, taqi markanakasa, sutix aytasipki ukanakasa, wasitat Israel markan apnaqatäpxaniwa.” Tatituw ukham arsu, ukasti phuqhasipuniniwa.
[13] “Urunakasti jutaskiwa, ukkhaw trigo yapu apthapisipkani ukapachax yapux qhulliñäxarakiniwa, janïraw uva apthapisax ch'irwañ tukuyapkaniti, ukkhasti trigox phawañäxarakiniwa. Jach'a qullunaka, jisk'a qullunak tuqsa vinox umjamaw jalani.
[14] Ukkhaw Israel markarux jaya markar apanukutat kuttayanï. Jupanakaw t'unjat markanak wasitat sayt'ayapxani, ukan jakasipxarakini; uva alinak ayruntapxani, jupanakan vinop umapxani, yapuchasinsti, achunakap manq'apxarakini.
[15] Nayaw jupanakarux kipka uraqinakapar ayruntä, ukatsti janiw mayampis jupanakar churat uraqit jik'suta uñjasipkaniti.” Tatitu Diosaw uk arsu.