[1] Samariankir qamir warminaka, aka arunak ist'apxam, jumanakax wajchanakaruw jachayapxtaxa, jan kunaniruw t'aqhisiyapxtaxa, chachanakamarusti, machañatak vino mayipxtaxa.
[2] Tatitux qullan kankañapan juramentompiw arsu: “Chinuñanakampi chinuntat apapkätam uka urux jutaskiwa; wawanakamas chawlla katuñampi katuntat apatäpxaniwa.
[3] Pirqa p'iysutanak tuqi siqikiw mistuwayapxäta, ukatsti Hermón qullu tuqir aparpayatäpxätawa.” Tatitux ukham siwa.
[4] “Betel markampiru, Guilgal markampir sarapxam, ¡ukansti juk'amp juchanak lurapxam! Qhantatitpach luqtäwinakam apapxam, sapa kimsa ururak tunkat maya churañäki uksa churapxam.
[5] Jan levaduran t'ant'a nakt'ayas yuspagarasin waxt'äwi luqtasipxam, waxt'a churapkäta ukanaksa taqi chiqan yatiyapxarakim, ukham lurañaw jumanakatakix askixa.” Tatitux ukham siwa.
[6] “Nayaw jumanakar taqi markanakaman manq'at awtjayapxsma; nayaw taqi chiqanakan jaqinakatak manq'añ pist'ayta, ¡ukampis jumanakax janiw nayan ukarux kuttanipktati!” Tatitux ukham siwa.
[7] “Yapu apthapitak kimsa phaxsïkipan jallxa jan apayanipksmati. Mä markan nayax jallu puriyta, yaqha markansti janiw puriykti; mä chiqan jallux puriwa, mä chiqansti umatjamax uraqix wañsuwa.
[8] Jaqinakax markat marka uma thaqhasax sarapxäna, umat pharjayasitanakapax janipuniw apaqtkänti; ¡ukampis jumanakax janiw nayan ukarux kuttanipktati!” Tatitux ukham siwa.
[9] “Junt'u thayanakampiw mutuyapxsma, kunayman usunakampiw t'aqhisiyapxsma; panqar yapunakamsa, uva yapunakamsa pharsuyaraktwa; higo quqanakamsa, aceituna quqanakamsa t'iju t'ijunakaw manq'suwayxi; ¡ukampis jumanakax janiw nayan ukarux kuttanipktati!” Tatitux ukham siwa.
[10] “Egipto markar apaykäyäta uka pachpa t'aqhisiñ jumanakarux apayanipxsma, waynanakarusti nuwasïwinakan jiwarayta, caballonakapsti uñisirinakaruw katxaruyta; nuwasïwin jiwaratanakan q'aphinakapsa mukhirayaraktwa, ¡ukampis jumanakax janiw nayan ukarux kuttanipktati!” Tatitux ukham siwa.
[11] “Kamisatix Sodoma markampiru, Gomorra markampir nayax tukjkta, ukham jumanakarux tukjapxaraksma; ninat apsut sank'ar uñtatäpxayätawa, ¡ukampis jumanakax janiw nayan ukarux kuttanipktati!” Tatitux ukham siwa.
[12] “Ukhamïpan, Israel marka, jumarux ukhamarak mutuyäma; uksti nayax lurapunïwa, ¡Diosamampi jikisiñatak wakicht'asim!”
[13] Khititix qullunaksa sayt'ayki, thaysa lurki, jaqirus amtäwinakap yatiyki, qhansa ch'amakt'ayki, jach'a qullunak patanakansa sarnaqkaraki, ukan sutipax Taqi ch'aman Tatituwa.