[1] Tatitux aka uñjäwi uñacht'ayitu: Tatituruw uñjta t'iju t'ijunak luraskiri, kunapachatix qhipa sata yapux alinuqaskäna ukkha, ukasti reyin yapup apthapitat qhiparuw lurasïna.
[2] Kunapachatix t'iju t'ijunakax qhipa ch'uxñanakamppacha manq'antkäna ukkhaw sista: —¡Tatay, pampacht'apxita! ¿Kamisarak taqi akanak mutupxästi? Nanakax mä jisk'a markakïpxstxaya —sasa.
[3] Ukatsti Tatitux uka amtäwip phuqhañ suyt'xiwa, ukat saraki: —¡Janiw kuna mutuyañsa apayankxäti! —sasa.
[4] Tatitux aka uñjäwi uñachayarakitu: Jiwasar mutuyañatak mä nina sank'a apayanir uñjta, uka ninasti jach'a qutxa manqhatpach q'al wañsuyäna, yapunaksa q'al nakhantäna.
[5] Ukat Tatitur mayta: —Tatay, suyt'akim, ¿kamisarak Jacob jisk'a markamasti uka taripäwim mutunisti? —sasa.
[6] Tatitusti uka amtäwip phuqhañ suyt'xiwa, ukatsti sarakiwa: —¡Janirakiw uka ninsa apayanipkämati! —sasa.
[7] Tatitux ak uñacht'ayarakitu: Jupasti mä uyu pirqa jak'ankaskänwa, uta luririn plomadap apt'ata.
[8] Ukatsti jiskt'ituwa: —¿Amós, kuns uñjta? —sasa. Nayasti jupar sistwa: —Uta luririn plomadap uñjta —sasa. Ukatsti sarakituwa: —Uñtam, nayax uta luririn plomadapampiw Israel markaxan sarnaqäwip uñjä. Janipuniw mayampsa juchanakap pampachkäti.
[9] Isaacan utjir yaqha diosanakapar yupaychañ altaranakapas tukjatäniwa, Israel markan yupaychañ utanakapas laqayar tukuyatarakïniwa. ¡Nayasti Jeroboaman utapar tukjañatakiw sartä!
[10] Betel markan Amasías sacerdotepaxa, Israel markan Jeroboam reyipar yatiyiriw khiti: “Amós chachax israelita jaqinakaruw jumar ñanqhachañatak amtayaski. Markasti janiw juk'ampi ukham parlaykaspati.
[11] Amós chachax akham sasaw sarnaqaraki: ‘Jeroboam reyix ch'axwäwin jiwayatäniwa, israelitanakasti jaya markar apanukutäniwa’ ” sasa.
[12] Ukatsti Amasías sacerdotex Amós profetarux sarakïnwa: —¡Profeta, akat jayar sarxam! Jumatix jutir urunakat parlas sarnaqañ munsta ukaxa, Judá markar sarxam;
[13] ukampis Betel markan jan juk'amp parlkxamti, akax reyin qullan utapawa, markpachan waqaychañ jach'a utaparakiwa —sasa.
[14] Amós profetasti akham sasaw aruskati: —Janiw nayax profetäkti, janiw profetan wawapäkaraktsa. Nayax ovej awatirikïtwa, pampa higonak apthapisis jakasirikïtwa,
[15] ukampis Tatituw ovej awatiskirit nayar jawsitu, ukat sarakitu: ‘Saram, Israel markar nayan sutixampi parlanim’ sasa.
[16] Ukhamasti jichhax Tatitun arup ist'am. Jumax akham sistawa: ‘Jan kunsa Tatitun sutipxar Israel markatak parlamti, janirak Isaacat saraqir wawanakapatakis parlamti’ sasa.
[17] Ukat Tatitux akham sixa: ‘Warmimasti markan uñjkataw yaqha chachanakampi sarnaqani, yuqanakamas phuchhanakamas espadampi jiwarayatäpxaniwa; uraqinakamsa yaqhanakaw katuntasipxani, jumasti Tatitur jan uñt'ir jaqinakan uraqipan jiwarakïta, israelitanakasti katuntata, uraqipat jayar apatäpxarakiniwa’ sasa.