[1] Pedrompi, Juanampix jaqinakaruw parlasipkäna, ukham parlaskiriruw sacerdotenakax purinipxäna, Tatitun utap uñjirinakan jilïripampi, saduceonakampi.
[2] Jupanakax wali q'apisitäpxänwa, Pedrompi, Juanampin jaqinakar akham yatichatapata: “Jesusan jiwatat jaktatapax, jiwatat jaktañax utjatap uñacht'ayistu” sasa.
[3] Uk ist'asin jupanakar katuntapxäna; ukatsti jayp'üxatap laykuw carcelar qhipürkam jist'antapxi.
[4] Ukampis Diosan arunakap ist'irinakat waljaniw iyawsapxäna; iyawsirinakasti chachanakkamaki jakhutax niya phisqa waranqanïnwa.
[5] Qhipürusti judionakan jilïr irpirinakapampi, jilïrinakampi, kamachinak yatichirinakampix Jerusalenan tantacht'asipxäna.
[6] Uka tantachasïwinkarakïnwa: sacerdotenakan Anás sat jach'a jilïripa, Caifás, Juan, Alejandro, yaqha jilïr sacerdotenakampi.
[7] Ukatsti Pedrompiru, Juanampiruw irptayanipxäna, ukatsti jupanak taypir puriyanisin, jiskt'apxäna: —¿Kuna ch'aman kankañampisa, jan ukax, khitin sutipxarus jumanakax akanak lurapxtaxa? —sasa.
[8] Pedrosti Qullan Ajayun ch'amapamp phuqt'ataw jupanakar säna: —Marka apnaqir jilïrinaka, Israelankir jilïr jaqinaka,
[9] jumanakax nanakar mä usut jaqir aski luratat jiskt'apxistaxa, kunjämat jupan k'umarachat uñjasitap yatiñataki.
[10] Jumanakax yatipxam, Israelankir jaqinakas yatirakpan, jumanakan nayraqataman jikxataski uka k'umarachat jaqix, Nazaretankir Jesucriston sutiparuw k'umaraptat uñjasi, jumanakax juparuw ch'akkatapxtaxa, ukampis Diosaw jiwatanak taypit jupar jaktayi.
[11] Jumanakax utachirinakjamaw mä qala jaqunukupxtaxa, uka jaqunukut qalasti thurxäsir qalaruw tukuwayi.
[12] Janiw khiti tuqis qhispiyasiñax utjkiti, janirakiw akapachan Diosan churat yaqha sutix utjkiti, jupa tuqi qhispiyasiñasataki —sasa.
[13] Marka apnaqir jilïrinakasti, Pedrompir Juanampir jan axsaras parlir uñjasinxa, muspharapxiwa, jan kuna yatiñan jaqinakätap yatisa, ukatsti amuyapxarakïnwa chiqpachapuni Jesusamp chika sarnaqirïpxatapa.
[14] Ukhamarusa, k'umaraptayat jaqix jupanak chik sayt'atäskänwa, ukat jan kuns arsurjamäpkänti.
[15] Ukatsti uka tantachäwit Pedrompir Juanampirux anqaruw khithanukupxi, jupanakkam aruskipañataki.
[16] Sapxänwa: —¿Aka jaqinakarux kamachañänisa? Jerusalenan jakirinakax taqiniw uka muspharkañ lurapxatap yatipxi, jiwasanakasti janiw jan yatir tukkaraksnati.
[17] Ukampis marka taypin jan juk'amp ukxat parlasiskañapatakisti, jupanakar axsarayañäni, akat uksar jan juk'amp khitirus Jesusan sutip aytasis parlasipkañapataki —sasa.
[18] Ukatsti Pedrompiru, Juanampir jawsayasinsti, Jesusan sutipat jan parlapxañapataki janirak kuns yatichapxañapatakiw sapxäna.
[19] Ukampis Pedrompi, Juanampix jupanakar sapxiwa: —Jumanak pachpay amuyt'apxam, ¿Diosan nayraqatapan jupar jaysañat sipana, jumanakar jaysañat walïspaxa?
[20] Nanakax janipuniw amukt'apkiristti kuntix uñjapkta ist'apkarakta ukanakat arsuñxa —sasa.
[21] Uka jilïrinakasti axsarañ churasaw apostolunakar khithanukxapxi. Markar axsarasin janiw kunjämatsa jupanakar mutuyañ jikxatapkänti, kunatix luraskatayna ukat Diosar taqin yupaychapxatap layku.
[22] Muspharkañ luräwi tuqi k'umarachatäkän uka jaqisti pusi tunk jila maranïnwa.
[23] Pedrompi Juanampix antutnukut uñjasisinxa, apóstol masinakapan ukaruw sarxapxäna, purisinsti taqi kuntix sacerdotenakan jilïrinakapampi, jilïr jaqinakampix jupanakar sapkatayna uk yatiyapxäna.
[24] Jupanakar ist'asinsti, taqpachaniw Diosar art'asipxäna akham sasa: “Tatay, jumätaw taqi kunatix utjki ukanak lurir Diosaxa. Jumaw alaxpachsa, akapachsa, jach'a qutsa lurtaxa,
[25] jumaw Qullan Ajay tuqi David luqtirimar aka arunak arsuwaytaxa: “¿Kunatarak markanakasti Diosar saykatasipxisti? ¿Kunatarak ñanqha amtanak amtasipkisti?
[26] Akapach reyinakax mayacht'asipxiwa, jilïr jaqinakax mä amtañaruw puripxi, Tatitumpiru, ajllit Cristompir qallkatañataki” sasa.
[27] “Chiqpachansa, aka markan mayachasipxi Herodesampi, Poncio Pilatompi, romano jaqinakampi, Israel markampi qullan Jesús luqtirimar jiwayañataki, khitirutix nanakan reyixatak ajlliskta ukaru.
[28] Ukham lurasaw jupanakax phuqhapxi, taqi kuntix jumax lurasiñapatak nayratpach amtkatäta ukhamarjama.
[29] Jichhasti Tatay, uñtamay nanakar axsarayatanakapa, arkirinakamarusti ch'amamay churapxita, juman arunakam jan axsaras arsupxañaxataki.
[30] Yanapt'apxarakitaya, jach'a ch'amamampi usutanakar qullañataki, ukhamarak uñacht'äwinaksa, muspharkay luräwinaksa, qullan Jesús Yuqaman sutipar lurapxañaxataki” sasa.
[31] Tatitur mayisiñ tukuyasinsti, tantachasipkän ukawjax khathatïnwa; taqiniw Qullan Ajayumpi phuqt'at uñjasipxäna, ukatsti jan axsarasaw Diosan arup yatiyapxäna.
[32] Diosar iyawsirinakax waljanïnwa, jupanakasti mä chuymakïpxänwa, mä amtañanikïpxarakïnwa. Utjir yänakapax taqininkänwa, ukanakat janiw khitis: “Nayankituwa” siskänti.
[33] Apostolunakasti jach'a ch'amampiw Tatit Jesusan jiwatat jaktatapat qhanañchasipkakïna, Diosasti aski waxt'äwinakap jupanakxar warxatanïna.
[34] Janiw jupanak taypin pist'ayasirinakax maynis utjkänti, uraqininakasa, utaninakasa, ukanak aljapxäna, uka aljat qullqsti,
[35] apostolunakaruw churapxäna, sapaqat maynir pist'ayasitaparjam lakiñataki.
[36] Jupanak taypin Chipre wat'ankir levita jaqiw utjäna, José sata, juparusti apostolunakax Bernabé sasaw sutichapxäna (uka sutisti “chuymachiri” sañ muni).
[37] Uka jaqix mä uraqinïnwa, uraqip aljasinsti, apostolunakaruw uka qullqi churxäna.