[1] Cesarea markan mä jaqiw utjäna, Cornelio sutini. Jupax Italiano sata soldado taman jilïripänwa.
[2] Jupasti khuyapayasir jaqïnwa, taqpach utapankirinakapamp chikaw Diosar yupaychäna. Jupax judionarkar yanapañatak walja qullqi churarakirïna, Dios chuyma jaqïtap laykux, jupax Tatitur mayisipunirïnwa.
[3] Mä urusti, niya chika jayp'u tuqiruw Corneliox mä unañchäwi katuqäna: Jupax qhanpun Diosan mä angelapar uñjäna jupan ukar mantasinkiri, sarakïnwa: “¡Cornelio!” sasa.
[4] Corneliosti wali axsarasaw angelar uñkatasin jiskt'i: “¿Kunach, Tata?” sasa. Angelasti siwa: “Diosax mayisitanakam ist'iwa, pist'añan sarnaqirinakar khuyapayatanakamas Diosan nayraqatapan askit uñt'atawa.
[5] Jichhasti Jope markar maynir khitham, Simón chachar akar irpayanim, yaqha sutipax Pedro satarakiwa,
[6] jupasti lip'ichinak quñaptayir Simonan utapan qurpachatäskiwa, ukan utapasti quta jak'ankiwa, jupaw sätam kuna lurañamäkitix ukxa” sasa.
[7] Cornelior parlkatayna uka angelan sarxatapatsti, jupax uywatanakapat paniniruw jawsi, mayni soldadompiru, uka soldadosti Dios chuymänwa, Cornelionsa wali munatarakïnwa.
[8] Jupanakar taqi ukanak yatiyasinsti, Jope markaruw khithäna.
[9] Qhipürusti, soldadompi, uywatanakampix Jope markaruw jak'achasisipkäna, ukchañkamasti Pedrox uta pata qamañawjaruw Tatitut mayisir makhatäna. Ukasti niya chika urünwa.
[10] Jupasti manq'at awtjayasïna, manq'añ munäna. Jupatak manq'añ wakichapxañapkamasti, jupax mä unañchäwi uñjäna:
[11] Alaxpach jist'artir uñjäna, ukatsti mä jach'a isir uñtat uraqkam pusi thiyat chint'at warkuqtasinkir uñjarakïna.
[12] Uka isinsti pusi kayun kunayman animalanakaw utjäna, kunayman asirunakampi, jamach'inakampi.
[13] Ukatsti Pedrox mä aru ist'äna, jupar siri: “Pedro, sartasim, jiwarayam, ukatsti manq'am” sasa.
[14] Pedrosti ukxaruw säna: “Janiw, Tata. Nayax janipuniw kunapachas jan manq'añ q'añu animalanak manq'irïkti” sasa.
[15] Uka arusti wasitat jupar arxayani, sarakiwa: “Kuntix Diosax q'umachki ukaruxa, jan jumax samti: q'añuwa” sasa.
[16] Ukasti kimsa kutiw lurasïna. Ukat uka isix alaxpachar kutkatawayxäna.
[17] Ukchañkamasti, Pedrox muspharataw uñjasïna, uka unañchäwi uñjkatayna ukat chuymapan lup'isa. Ukhamäskiriruw Cornelion khithanit jaqinakax punkur purinipxäna, Simonan utapat jiskt'as jiskt'asaw purinipxatayna.
[18] Purinisinsti, jach'at jiskt'apxäna: “¿Aka utanti Pedro sat Simonax qurpachasi?” sasa.
[19] Pedrosti kuntix uñjkatayna ukxat lup'iskakïnwa, ukampis Qullan Ajayuw jupar säna: “Pedro, kimsa jaqiw jumar thaqhasktam.
[20] Saraqawayam jupanakamp chik jan pächasis saram, nayaw jupanakarux khithanta” sasa.
[21] Pedrosti saraqasin Cornelion khithanit jaqinakaruw säna: —Nayätwa khitirutix jumanakax thaqhapkta ukaxa. ¿Kunarus jutapxta? —sasa.
[22] Jupanakasti ukxaruw sapxäna: —Cornelio capitanaw khithanipxitu. Jupax aski jaqiwa, Diosar axsartas sarnaqir jaqirakiwa, judío jaqinak taypin sumat uñt'ata, taqinin munatawa. Diosan mä angelapaw jupar uñstasin satayna: “Utamar Pedro irpayanim, jupax siskätam uk sum ist'äta” sasa.
[23] Ukat Pedrox jupanakar uta manqhar irpantasin, uka arumax qurpachäna. Qhipürusti, Pedrox wakicht'asisin uka jaqinakamp chik saräna, Jope markankir mä qawqha jilatanakax jupamp chikaw sararakïna.
[24] Qhipürusti Cesarea markaruw puripxäna, ukan Corneliox jupanakar suyaskäna utapankirinakapampi, suma munat masinakapamp chika, jupanakarusti jupaw jawsthapitayna.
[25] Pedrox utar purkän ukapachasti, Corneliow jupar katuqir mistuwayäna, ukatsti axsartañ chuymampiw Pedro nayräxan killt'asïna.
[26] Ukampis Pedrox akham sasaw jupar waytäna: —Sayt'asim, tata. Nayax jumjam jaqikirakïtwa —sasa.
[27] Ukatsti Pedrox Corneliomp parlt'asisaw utar mantäna, ukansti walja tantachat jaqinak jikxatäna.
[28] Ukat Pedrox jupanakar säna: —Jumanakax yatipxtawa, mä judío jaqix janiw yaqha markankir jaqimp parlañapäkiti, utaparus janirakiw mantañapäkiti. Ukampis Diosaw nayarux yatichitu, janiw khitirus “q'añuchata” jan ukax “ñanqhachata” sasa jisk'achañaxäkiti.
[29] Ukat nayax, yatiyapxit ukspach jan pächasis jutta. Jichhax yatiñ munirista, ¿kunatakirak jawsayapxistasti? —sasa.
[30] Corneliosti sänwa: —Nayax utaxan niya chika jayp'u tuqiw Tatitur mayisiskäyäta, ukat akarux pusürüxiwa, ukapachasti akatjamat qhankir isin mä chachax nayar uñstitu.
[31] Jupasti sarakituwa: “Cornelio, Diosax mayisitanakam ist'iwa, pist'añan sarnaqirinakar khuyapayatanakamas Diosan nayraqatapan askit uñt'atarakiwa.
[32] Jope markar maynir khitham, Simón chachar akar irpayanim, yaqha sutipax Pedro satarakiwa. Jupasti lip'ichinak quñaptayir Simonan utapan qurpachatäskiwa, quta jak'an jakasi” sasa.
[33] Ukspachaw nayax jumar jawsayir khithanta, Jumasti jank'akiw juttaxa. Jichhasti taqiniw Diosan nayraqatapan akankapxtan, kuntix Tatitux nanakar yatiyañamatak sisktam ukanak ist'añ munapxarakta —sasa.
[34] Ukat Pedrox parlañ qalltäna, sarakïnwa: —Jichhaw chiqpach amuyta, Diosatakix taqi jaqis mayakïtapa.
[35] Jupasti kawki markansa katuqakiwa, jupar axsarir jaqinakampiru, aski luririnakampiruxa.
[36] Diosax Israelan wawanakaparuw parläna, sumankañ arunak Jesucristo tuqi yatiyasa, jupax taqi jaqinakan Tatitupawa.
[37] Judea uraqin luraskäna uk jumanakax yatxapxtawa. Taqi kunas Galilea markan qalltäna, Juanax Nazaretankir Jesusar bautiskän uka qhipata.
[38] Diosaw Qullan Ajayun ch'amap jupar churarakïna. Jesusax askinak lurasaw sarnaqäna, supayan munañapan t'aqhisiyat jakapkän uka jaqinakar k'umarachasa, Diosan jupampïtap laykuw taqi ukanak luräna.
[39] Taqi kuntix Jesusax Judea uraqina, Jerusalén markansa lurkän ukanak nanakaw uñjapxta. Jupar mä cruzar ch'akkatas jiwayapki uksa uñjapxaraktwa.
[40] Ukampis Diosaw kimsürut jupar jiwatat jaktayäna, ukatsti wasitat jupar uñjañatak nanakatak wakicharakïna.
[41] Janiw taqpach markar Jesusax uñstkänti, jan ukasti nanakarukiw uñstapxitäna, khitinakarutix Diosax nayratpach qhanañchiritak ajllipkitu ukanakaru. Jiwatat jaktatap qhipatsti nanakaw jupamp manq'apxta, umapxarakta.
[42] Uka Tatit Jesusaw nanakarux jaqinakar yatiyir khithapxitu: “Diosax Jesusaruw akapachan Taripiripat utt'ayi, juparakiw jakirinakaru, jiwatanakar taripani” sasa.
[43] Taqpach profetanakaw Jesusxat arsupxäna, sapxarakïnwa: “Khitinakatix jupar iyawsapki ukanakax, jupan sutip tuqiw juchanakapat pampachat uñjasipxani” —sasa.
[44] Pedron parlkipansti, Qullan Ajayux jupan arunakap isch'ukirinakxaruw jutäna.
[45] Pedrompi chik Jope markat jutapkatayna uka judío iyawsirinakasti muspharataw uñjasipxäna, jan judío jaqinakxar Qullan Ajayun jutatapata.
[46] Jupanakarusti jan uñt'at arunakat parlir ist'apxäna, Diosar yupaychir ist'apxarakïna.
[47] Ukat Pedrox masinakapar säna: —Diosax Qullan Ajayu khithani yaqha markanakankir jaqinakan jakäwip sarayañataki, kamisatix jiwas judío jaqinakar khithanki ukhama. ¿Khitis jichhax jark'aspa aka jaqinakan bautismo katuqañapxa? —sasa.
[48] Uk sasinsti, Pedrox Jesusan sutipar bautismo katuqapxañapatakiw säna. Ukatsti mä qawqha urunak jupanakamp chik qamart'añapatakiw Pedror achikt'apxäna.