[1] Munat Teófilo, mayïr qillqataxanxa, kuntix Jesusax qalltatpach lurawaykatayna, yatichawaykatayna ukanakat qillqta,
[2] kunürutix alaxpachar jupax makhatkän ukürkama. Jesusax alaxpachar janïr makhatkasaxa, ajlliskatayna uka apostolunakaparuw Qullan Ajayu tuqi iwxawayäna kuntix lurapxañapäki ukxata.
[3] Jesusax jiwatat jaktasinxa, jupa kipkaw jupanakar uñstäna, ukhamat chiqpachapun jaktxatapat uñacht'ayasa. Pusi tunka urun walja kutiw apostolunakapar uñstäna, Diosan qhapaq markapxat parlarakïna.
[4] Jesusax apostolunakapampïskän ukapachaw jupanakar akham iwxt'äna: —Jerusalenat janiw kawkirus sarapxätati, Awkixan arsutap phuqhasiñapkam suyapxam, nayax ukxat niy jumanakar yatiyapxsmawa.
[5] Chiqpachansa Juanax umampiw bautisäna, ukampis jumanakax akat mä qawqha ururux Qullan Ajayump bautisataw uñjasipxäta —sasa.
[6] Jesusampi tantachatäkän uka apostolunakapax jupar jiskt'apxänwa: —Tatay, ¿jichhati Israel markarux marka apnaqañap wasitat churxäta? —sasa.
[7] Jesusasti ukxaruw jupanakar säna: —Janiw jumanakar uka pachanakata, uka uruta yatipxañamax wakt'apktamti. Alaxpachankir Awkikiw taqi kuns munañaparjam lurani.
[8] Ukampis yatipxam, Qullan Ajayuw jumanakxar jutani, ukapachaw jumanakax ch'am katuqapxäta, ukatsti nayat qhanañchiriw sarapxäta, Jerusalén markana, Judea uraqina, Samaria uraqina, taqi aka uraqpachana —sasa.
[9] Ukanak arsusinsti, Jesusax apostolunakapan uñjkataw alaxpachar aptatäxäna, ukatsti mä qinayaw jupar muyuntas jupanakan nayraqatapat chhaqtayawayxäna, janiw mayampsa Jesusar uñjkxapxänti.
[10] Alaxpacha uñtat Jesusar uñch'ukisipkipansti, janq'u isini pani chachaw jupanak thiyan uñstäna.
[11] Uka chachanakasti Jesusan apostolunakaparux sänwa: —Galileankir jaqinaka, ¿kunatarak alaxpach uñch'ukisipktasti? Kamisatix jumanak taypit Jesusar alaxpachar aptat uñjapktaxa, ukhamarakiw jupax wasitat jutani —sasa.
[12] Uka qhipatsti, apostolunakax Olivos qullut Jerusalenaruw kutt'xapxäna. Uka qullusti Jerusalenat jak'ankakiwa, mä chika tupun chikataparjama.
[13] Markar purisinsti, qurpachatäpkän uka utaruw makhatapxäna. Uka apostolunakasti akanakawa: Pedro, Juan, Santiago, Andrés, Felipe, Tomás, Bartolomé, Mateo, Alfeo chachan Santiago yuqapa, Celote Simón, Santiago chachan Judas yuqapa.
[14] Taqpachaniw jupanakax Tatitur mayisiñatak tantachasipxirïna. Ukankarakïnwa Jesusan jilanakapaxa, María taykapasa, yaqha warminakamp kuna.
[15] Ukürunakansti niya patak pä tunkan jilatanakaw tantacht'asipxäna. Pedrosti jupanak taypin sayt'asisin säna:
[16] “Jilatanaka, kuntix Qullan Ajayux David tuqi Judas chachat Qillqatanakan arskatayna ukan phuqhasiñapax wakisïnwa, jupaw Jesusar katuntir jaqinakan irpiripäna.
[17] Judasax jiwasanakat maynïrïnwa, jiwasanak chikarakiw Diosatak irnaqäna.
[18] Jupax ñanqha luratapat qullqi katuqäna, uka qullqimpisti mä uraq aläna; ukatsti jupax p'iqit kayuni jalaqtasaw, purakas phallata, jiphillanakas allstat uñjasïna.
[19] Uka lurasitapasti Jerusalén markpachan yatisi, uka urutpach uka chiqax Hacéldama sutimpi uñt'ata, ukasti ‘Wila wartat uraqi’ sañ muni.
[20] Salmo qillqatan akham siwa: “Utjäwipax ch'usa wasarar tukpan, janirak khitis uka utan jakpati. Jupan lurañapsti yaqha lurpan” sasa.
[21] “Jichhasti, jiwasanakamp chika Tatit Jesusar arkirinakax akan utjiwa,
[22] uka chachanakasti kunürutix Juanampi bautisayaskän uküruta, alaxpachar makhatki ukkhakamaw jiwasamp chikäski. Jupanakat maynix jiwasanak taypir yapt'añax wakisiwa, jiwasanakamp chika Jesusan jaktäwipat qhanañchañapataki” sasa.
[23] Ukatsti paniniruw ajlliñatak uñtapxäna: José Barsabás sutiniru, jupasti “Justo” sutimpi uñt'atänwa, ukhamarak Matiasampiru.
[24] Ukatsti taqiniw Tatitut mayisipxäna akham sasa: “Tatay, jumaw taqinin chuymap uñt'taxa, jupa paninit khitirus jumax ajllista, ukay uñacht'ayapxita
[25] jupan apóstol kankañ luräwin Judas lanti sayt'añapataki, jupasti jucha luratap laykuw lurañap apanukuwayi, kawkharutix sarañapäki ukkharurakiw sarxi” sasa.
[26] Uka qhipatsti, suertenak jaqtapxäna uka paninit ajlliñataki, suertex Matiasaruw wakt'äna, jupampiw tunka mayan apostolur yapxatasïna.