[1] Eliseox khitin wawaparutix jiwatat jaktaykatayna uka warmiruw parläna, akham sasa: “Jumax utamankirinakamp yaqha chiqar jakir sarxam; Tatituw aka uraqin, paqallqu jach'a mach'a maranak utjañap yatiyi” sasa.
[2] Warmisti profetan iwxt'ataparjamaw luräna: jupasti filisteonakan uraqiparuw wila masinakapamp sarxäna, ukansti paqallq maraw jakäna.
[3] Uka paqallq mara qhipatsti, uka warmix filisteonakan uraqipat kutt'anxänwa, ukatsti reyin ukaruw saräna, utapampi, uraqinakapampi kutkatayasxañataki.
[4] Reyisti Eliseo profetan Guehazí uywatapampiw parlaskäna, juparusti Eliseon taqi muspharkañ luräwinakapat yatiyañapatakiw mayitayna.
[5] Guehazí uywatasti kunjämtix Eliseox sunemankir warmin wawapar jaktaykatayna ukxat parlaskäna, ukhamaruw uka warmix reyin ukar purinïna, utapampi, uraqinakapamp kutsuyasxañataki. Ukat Guehazí uywatax reyir säna: —Rey, akapï uka warmixa, akaw wawapaxa, juparuw Eliseox jaktayäna —sasa.
[6] Reyisti warmiruw jiskt'äna, warmisti sarnaqäwipat reyir yatiyarakïna. Ukxarusti, reyix mayni yanapiripar jawsasin säna: “Aka warmir kunanakatix jupankkän ukanak taqpach kutt'ayxapxam, jupan sarxatat jichhürkam kunanaktix uraqinakapan achkatayna uka achunaksa kutt'ayxapxarakim” sasa.
[7] Uka qhipatsti, Eliseox Damasco markaruw sarxäna. Uka urunakansti Siria markan Ben-adad sat reyipax usutaw jikxatasïna, juparusti profetan purinitap yatiyapxäna.
[8] Ukat reyix Hazael chachar säna: —Profetan ukar saram, jupatak mä churäwi apxaruwayam. Tatitur jiskt'arapitpan, aka usut waliptiristti, janicha —sasa.
[9] Hazael chachasti profetan ukaruw saräna, jupatakix Damasco markan utjir suma churäwinak aparapïna, pusi tunka camellonakaru khumuntata. Eliseon ukar purisinsti jupar sänwa: —Siria markan Ben-adad reyipaw khithanitu, jumarusti mä awkirjamaw uñt'astam, usupat waliptaniti, janicha uk jiskt'añataki —sasa.
[10] Eliseosti ukxarux sänwa: —Saram, ukatsti sanim: “Usupat waliptaniwa” sasa, ukampis Tatitux yatiyituwa: “Kunjämatsa jiwapuniniwa” —sasa.
[11] Ukatsti Eliseox jan maysar uñtasaw Hazael chachar uñkatäna, Hazaelasti ukham uñkatatax mayjt'asïnwa. Ukatxa profetax jachxakïnwa,
[12] ukat Hazael chachax jupar jiskt'äna: —¿Tatay, kunatarak jachtasti? —sasa. Eliseosti sänwa: —Nayax kuna jan waltix israelitanakar lurkäta uk yatta, suma uyuchrantat markanakap ninamp nakhantayäta, ukankir waynanakarux espadampkamaw jiwarayäta, jisk'a wawanakarux jiwayarakïtawa, usur jaqi warminakarusti purakanakap jist'jarakïta —sasa.
[13] Hazael chachasti sänwa: —¿Kamisarak ukanak luririststi? ¡Nayax mä jan yäqat anur uñtatakïtwa! —sasa. Eliseosti sarakïnwa: —Tatituw nayar yatiyitu, jumax Siria markan reyipäyätawa —sasa.
[14] Hazael chachasti Eliseon ukat sarawayxasax, reyipan ukaruw purxäna, reyisti juparux jiskt'änwa: —¿Eliseox kamstamsa? —sasa. Hazaelasti ukxaruw säna: —Jumax usumat waliptxätaw sistamwa —sasa.
[15] Ukampis qhipüruxa, Hazael chachax sarasin mä isi iqtäna, umar chilltasinsti Ben-hadad reyin ajanupxaruw iqxatäna saman llupjañkama, reyisti jiwxänwa. Uka qhipatsti, Hazael chachaw jupa lantix Siria markan reyïxäna.
[16] Ahab chachan Joram yuqapax, Israel marka phisqa mara apnaqkän ukkhawa, Josafat chachan Joram yuqapax Judá marka apnaqañ qalltäna.
[17] Jupasti marka apnaqañ qalltkän ukapachax, kimsa tunka payan maranïnwa, kimsaqallqu maraw Jerusalén markan apnaqawayäna.
[18] Ukampis jupax kunjämtix Israelan reyinakapasa, Ahab reyin saraqirinakapas sarnaqapkän uka pachparak arkäna, warmipax Ahab reyit saraqirïnwa; ukhamasti luratanakapax Tatit nayraqatan janiw walïkänti.
[19] Ukhamïpansa Tatitux janiw Judá markar tukjañ munkänti, David luqtiripar khuyapayasitap layku, juparusti Tatitux wila masinakapat wiñayapun marka apnaqirix utjañap arsutayna.
[20] Joram reyix marka apnaqkäna uka maranakanxa, Edom markax Judá markatakiw sayt'asxäna. Edomitanakax janiw Judá markampi apnaqayasiñ munkxapxänti, ukat jupanakax pachpa reyip utt'ayasipxäna.
[21] Joram reyisti Saír sat chiqaruw taqpach nuwasiñ carronakapampi sarantäna, arum tuqirusti jupampi, nuwasiñ carronakan capitananakapampix sartasisin muyuntapkatayna uka edomita jaqinakaruw nuwantapxäna, ukatsti jaltayapxänwa.
[22] Ukhamawa Edom markax jichhürkam Judá markat qhispiyat sarnaqañapa jikxatäna. Uka pachpa urunakan Libná markax qhispita sarnaqasiña jikxatarakïna.
[23] Joram reyin ukat ukxar sarnaqäwipasa, taqi luräwinakapasa, Judá uraqinkir reyinakan luräwinakapa qillqatankiwa.
[24] Joram reyix jiwxänwa, juparusti Davidan Markapan imt'xapxäna, nayra awkinakapan amay imäwiparu. Uka qhipatsti, Ocozías sat yuqapaw jupa lantix marka apnaqxäna.
[25] Ahab chachan Joram yuqapax tunka payan mara Israel marka apnaqaskän ukkhaw, Joram chachan Ocozías yuqapax Judá marka apnaqañ qalltäna.
[26] Jupax marka apnaqañ qalltkän ukapachax pä tunka payani maranïnwa, mä maraw Jerusalén markan apnaqäna. Taykapax Atalía satänwa, jupasti Israel markankir Omrí sat reyin allchhipänwa.
[27] Ocozías reyix Ahab reyin thakhipa, jupat saraqirinakan thakhip arkäna, Ahab reyin wila masinakapamp sumankatap laykusti, jupan luräwinakapax Tatitun nayraqatapan janiw walïkänti.
[28] Ocozías reyix Ahab chachan Joram yuqapampiw mayacht'asïna, Galaadankir Ramot chiqan Siria markankir Hazael sat reyir nuwantañataki. Ukampis sirio jaqinakaw Joram reyirux usuchjapxäna,
[29] Joram reyisti chhuxrinakap qullt'ayasirix Jezreel chiqaruw kutt'xäna. Ukat Judá uraqinkir Ocozías reyix Jezreel chiqar saräna Joram chachar tumpt'iri.