[1] Manasés waynax tunka payan maranïkäna ukkhaw marka apnaqañ qalltäna, jupasti Jerusalén markan phisqa tunka phisqan maraw Judá marka apnaqäna. Taykapax Hepsiba sutinïnwa.
[2] Ukampis Manasesan luratanakapax Tatitun nayraqatapan jan walinakänwa, jupasti kawkïr markanakarutix Tatitux israelitanakan nayraqatapat jaqunukkatayna ukanakan pachpa q'añu luräwinakap luräna:
[3] Ezequías awkipax qullu patanakan utjir yupaychañ utanak t'unjkatayna ukanak wasitat luräna; Baal diosatak altaranak luräna, ukatsti Astarté diosan lantip lurarakïna, kunjämtix Israelan Ahab reyipax luraykatayna ukhama; ukhamarusa alaxpachan utjir taqi warawaranakaruw yupaycharakïna,
[4] ukxarusti altaranak Tatitun utapan luräna, uka chiqatsti Tatitux sataynawa: “Jerusalén markan sutixa uchä” sasa.
[5] Tatitun utapan utjir paypach uta anqäxapanxa pä yaqha altaranak luräna, ukanaksti alaxpachankir taqi warawaranakaruw luqtäna.
[6] Ukxarusti wawanakaparux wilañcha luqtasaw nakhantayäna, ukatsti ajayunakar jawsañampi, jamusiñanakampi yatïna, ukatsti ajayunakampi parlaña, layqasiñanakampi utt'ayäna. Luratanakapasti Tatitun nayraqatapan sinti jan walinakänwa, ukhamat Tatitur wali q'apisiyäna.
[7] Ukhamarakiw Tatitun utapan Astarté diosan lantip uchäna, uka tuqitsti Tatitux Davidaru, Salomón yuqaparus sataynawa: “Israelan taqi markanakapatxa, Jerusalén markaruw ajllista, ukan nayan utax uchañataki, ukan wiñay jakañatakiraki.
[8] Janiw israelitanakarux, nayra awkinakapar churkta uka uraqit wasitat jaqunukkäti, jupanakatix nayan arsutaxarjam sarnaqapxani, Moisés luqtirixax churawayki uka yatichäwinakarjamsa phuqhapxarakini ukapacha” sasa.
[9] Ukampis israelitanakax janiw Tatitur ist'apkänti. Jan ukasti, Manasés reyix kawkïr markanakarutix Tatitux israelitanakan nayraqatapan tukjkatayna ukanakat sipan, juk'amp ñanqha lurañanak jupanakar lurayäna.
[10] Ukat Tatitux profetanakap tuqi parläna, akham sasa:
[11] “Manasés reyin jan wali q'añu luräwinakapata, ñanqha luräwinakapan jupat nayra utjir amorreonakat sipan juk'ampïtapata, Judá markarus idolonakapampi jucha lurayatapatxa,
[12] naya, Israelan Tatit Diosapaw arsta: Jerusalenampiru, Judá uraqimpirux, mä jan walt'añ apayanï, khititix uk ist'kani ukan jinchunakapas usuniwa.
[13] Jerusalén markarux mutuyäwa, kamisatix Samaria markarusa, Ahab reyin saraqirinakaparus mutuykta ukhama. Uka markax ch'usaw tukuni, kamisatix mä chuwax aytirasin k'umpt'añäki ukhama.
[14] Markaxat jilt'ir jaqinakarusti, jaytanuküwa, ukatsti uñisirinakapan amparaparuw katxaruyä, taqi yänakap apaqat uñjasiñapataki.
[15] Jupanakan luratanakapax nayraqataxan jan walinakätap layku; ukatsti kunürutix nayra awkinakapax Egiptot mistunipkän ukürut jichhakam nayar q'apisiyapxatap layku” sasa.
[16] Judá markar juchanak lurayatapatsa, Tatitun nayraqatapan jan wali luratanakapatsa, Manasesax Jerusalén markan jan juchan walja jaqinakaruw jiwarayäna, uka wilampiw markar mä thiyata mä thiykam phuqhantäna.
[17] Manasés reyin ukat ukxar sarnaqäwipasa, taqi luratanakapasa, juchanak luratapasa, Judá markankir reyinakan luräwinakapa qillqatankiwa.
[18] Manasés reyix jiwxäna ukkhasti, juparux reyi utapan utjir Uzá sata panqar uyun imt'xapxäna. Uka qhipatsti Amón sat yuqapaw jupa lantix marka apnaqxäna.
[19] Amón chachax pä tunka payan maranïkän ukkhaw marka apnaqañ qalltäna, jupasti Jerusalén markan pä maraw marka apnaqäna. Taykapax Mesulémet sutinïnwa, jupasti Jotbá chiqankir Harús chachan phuchhapänwa.
[20] Ukampis Amón reyin luratanakapax Tatitun nayraqatapan jan walinakänwa, Manasés awkipan luratanakapjamaraki,
[21] jupasti awkipan jan wali sarnaqäwip arkäna, awkipax yupaychkatayna uka pachpa idolonakaruw jupax yupaycharakïna.
[22] Ukham lurasaw jupax nayra awkinakapan Tatit Diosaparu apanuküna, janiw jupan munañaparjam lurkänti.
[23] Mä urusti, Amonan jilïr jaqinakapax jupatakiw sayt'asipxäna, ukat reyirux pachpa reyi utapan jiwayapxäna.
[24] Ukampis markankir jaqinakaw uka jilïr jaqinakar jiwayapxäna, ukatsti Amón reyin Josías yuqaparuw jupa lantix reyit utt'ayapxäna.
[25] Amón reyin ukat ukxar sarnaqäwipasa, luratapasa Judá markankir reyinakan luräwinakapa qillqatankiwa.
[26] Amón reyirux Uzá sat panqar uyupan imt'xapxäna. Uka qhipatsti Josías yuqapaw jupa lantix marka apnaqxäna.