[1] Mä urusti, profetanakax Eliseoruw sapxäna: —Uñjam, jumampi jakasipktan uka chiqaxa, nanakatakix wali jisk'akiwa.
[2] Jordán jawirar sarapxä, ukat sapa mayniw jach'a lawanak aptanipxä, khayjaru mä uta lurañanakaxataki —sasa. Eliseosti ukxaruw säna: —Sarapxamsaya —sasa.
[3] Ukampis jupanakat maynïriw säna: —Nanakamp chikay jumax sararakim —sasa. Eliseosti sänwa: —Walikiwa, jumanakamp chikaw sarä —sasa.
[4] Eliseosti jupanakamp chikaw Jordán jawirkam saräna, ukansti jupanakax quqanak tinkuyapxäna.
[5] Ukampis profetanakat maynïrix mä quqa k'uthaskasaw akatjamat hachap umar jalantayasïna, ukat jach'at art'äna: —¡Ay, yatichiri! ¡Uka hachax janiw nayankkiti, mayt'atakiwa! —sasa.
[6] Eliseosti jiskt'änwa: —¿Kawkharus jalanti? —sasa. Maynisti kawkharutix hachax jalantkatayna uka chiq uñacht'ayäna. Ukat Eliseox mä lawa khuchhuqasin ukawjar jaquntäna, hachasti uma pataruw tuysunïna.
[7] Eliseosti sänwa: —Apsum —sasa. Profetasti amparampi luqtasin hacha apsxäna.
[8] Mä kutix, Siria marka apnaqir reyix, Israel markampi ch'axwankasin, jupax yanapirinakapar tantachäna, ukatsti kawkha chiqanakantix utjnuqtapkani uka amuyt'äwip jupanakar säna.
[9] Ukat Eliseox Israelan reyipar yatiyir khithäna: “Uka chiqanjam jan sarapxamti, sirionakaw uka chiqar sarasipki” sasa.
[10] Ukhamat Israelan reyipax ejercitopar khithäna, kawkharutix profetax amuyasiñapatak siskatayna ukkharu, ukhamat reyix walja kuti qhispiyasïna.
[11] Ukhamïpansti Siria markan reyipax, janiw kunjämätapsa amuykxänti, ukat yanapirinakapar jawsasin jupanakar säna: —¡Sapxita! ¿Khitisa jiwasanak taypita Israel reyir jaqkattataxa? —sasa.
[12] Jupanakat mayniw ukxar säna: —Janiw khitisa, reyixay. Ukampis Israelankki uka Eliseo profetaw Israel reyirux yatiyi, taqi kuntix juma, reyix siskta ukanaka, ukhamarak utam manqhin parlatamsa —sasa.
[13] Ukat Siria markan reyipax säna: —Kawkhankis uka profetax uk yatxatapxam, nayan mä qawqha jaqinak khithasin katuntayaniñaxataki —sasa. Ukatsti kunapachatix Eliseon Dotán chiqankatap reyir yatiyapxäna ukkhasti,
[14] reyix caballería tamampi, nuwasiñ carronakampi, walja kayuk sarantir soldadonakampi uka chiqar khithäna, jupanakasti arumaw Dotán chiqar purintasin markar muyuntapxäna.
[15] Qhipürusti, Eliseon uywatapax willjtat sartasïna, anqar mistusinsti, caballeriampi nuwasiñ carronakampi ejercitoru markar muyuntat uñjäna; ukat jupax Eliseor yatiyäna, akham sasa: —¡Jichhasti yatichiri! ¿Kuns kamachañäni? —sasa.
[16] Eliseosti sänwa: —Jan axsaramti, jiwasanakampïki uka chachanakax, jupanakampïki uka chachanakat sipan waljaniwa —sasa.
[17] Eliseox Tatituruw mayïna, akham sasa: “Tatay, uywataxaruy nayranakap jist'aram amuyt'asiñapataki” sasa. Tatitusti uywatan nayranakapxa jist'aränwa, uywatasti qullu pata uñtasin caballeriampi, nina nakkir carronakampi phuqhantat uñjäna, Eliseor muyuntata.
[18] Sirionakax Eliseor katuntañataki jak'achasisipkäna ukkhasti, Eliseox Tatituruw art'asïna: “Tatay, aka jaqinakarux juykhuptayam” sasa. Tatitusti Eliseon mayisitaparjamaw uka jaqinakarux juykhuptayäna.
[19] Eliseosti jupanakar sänwa: —Janiw thakhix akäkiti, janirakiw thaqhapkta uka markäkisa. Nayar arkapxita, nayaw irpapxäma thaqhapktas uka chachan ukaru —sasa. Jupasti Samaria markaruw uka jaqinakar irpäna.
[20] Uka markar purisinsti, Eliseox Tatitut mayisïna, akham sasa: “Jichhasti Tatay, nayranakap jist'aram jupanakan uñjapxañapataki” sasa. Tatitusti ukham luräna, jupanakasti Samaria markankapxatap amuyasipxäna.
[21] Israelan reyipasti uka jaqinakar uñjasax, Eliseoruw jiskt'äna, akham sasa: —Tatay, ¿jupanakar jiwarayäti? ¿Taqinirut jiwarayäxa? —sasa.
[22] Eliseosti ukxaruw säna: —Janiwa, jan jiwaraykamti. Nuwasïwin katuntat jaqinakarux janiw jiwarayañäkiti. Jupanakar manq'aña, umañ churam, ukatsti reyipan ukar kutt'ayxam —sasa.
[23] Ukatsti Israelan reyipax mä jach'a manq'äwi jupanakatak wakichayäna, jupanakasti manq'apxänwa, umt'asipxänwa. Uka qhipat reyix jupanakar khitxäna, jupanakasti reyipan ukaruw kuttawayxapxäna. Ukürut uksarusti sirio tamanakax janipuniw Israel uraqirux mayampis mantkxapxänti.
[24] Uka qhipatsti, Siria markan Ben-hadad sat reyipax taqpach ejercitop tantacht'äna, ukatsti Samaria markar sarasin katuntañatakiw uka markar muyuntäna.
[25] Ukham muyuntat uñjasipan, Samaria markan manq'at t'aqhisiñax utjäna, mä asno p'iqi alasiñax kimsaqallq tunka qullqïnwa, paloman mä juk'a wanup alasiñas phisqa qullqirakïnwa.
[26] Mä urusti, Israelan reyipax marka pirqa patapanjam saraskäna, ukapachaw mä warmix jupar art'anïna, akham sasa: —¡Reyixay, yanapt'itaya! —sasa.
[27] Reyisti ukxaruw säna: —Tatitutix jumar jan yanapkstam ukasti, ¿kunjämarak nayasti yanapt'irismasti? Janiw nayan trigoxasa, vinoxas jumar churañatak utjkituti.
[28] ¿Kunarak kamachtamsti? —sasa. Warmisti sänwa: —Aka warmix sitänwa: “Wawam apanim, jichhür manq'antxañäni, nayan wawaxsti qharüruw manq'antxarakiñäni” sasa.
[29] Ukat wawaxar phayantasin manq'asipxta. Qhipürusti nayax sistwa: “Wawam akar apanim manq'asiñataki” sasa, ukampis jupax wawap imantasxiwa —sasa.
[30] Reyisti uka warmin arunakap ist'asin wali q'apisitaw isinakap ch'iyanuqasïna, pirqa patanjam saraskatap laykuw, jaqinakax q'ara janchiruk chhankha isimp uchasitap uñjapxäna.
[31] Ukat reyix jach'at arsüna: “¡Diosax nayar jan khuyapt'ayasis mutuyitpan, janitix jichhürpach Safat chachan Eliseo yuqapar p'iqip apaqkä ukaxa!” sasa.
[32] Eliseosti utapankaskänwa, markan jilïrinakapamp chik qunt'ata. Ukchañkamasti, reyix jaqinakapat mayniruw khithanitayna. Ukampis reyin khithatapax janïra purinkipan Eliseox jilïrinakar säna: —Uñjapxam, uka jaqi jiwayirin yuqapax nayan p'iqix apaqayiriw maynir khithasinki. Ukampis ist'apxita, khithatapax purinkani ukkhasti punku jist'antapxäta, janiw mantayanipxätati, jupan qhipapatsti reyipan takt'atanakapaw ist'asi —sasa.
[33] Eliseox jupanakampiw parlaskäna, ukapachaw khithat jaqix Eliseon nayraqatapar purinïna; ukat säna: —Tatituw aka jan walt'añ apayanistu, ¿kunat juk'ampirak nayasti Tatitut suyästi? —sasa.