[1] Salomonax Jerusalenan Tatitun utap lurayañ qalltäna, Moria qulluna, kawkhantix Tatitux David awkipar uñstkatayna ukkharu, kawkharutix Davidax wakichkatayna ukawjaru, jebuseo Ornán chachax kawkhantix trigo jawq'askän ukawjaru.
[2] Utachañsti payïr phaxsin pä uru saraqataru, jupax pusi mara Israel markar apnaqkän ukapachaw qalltäna.
[3] Salomonax Tatitun utapan qalltap uchaykän ukan tupunakapax akhamänwa: sayt'urux pä tunka paqallquni metronïnwa, iramarusti llätunka metronirakïnwa.
[4] Tatitun utapar mantañawjasti sayt'urux llätunka metronïnwa, iranarusti uka pachpa tupuraki, amstarusti llätunka metronïnwa. Salomonax Tatitun utapar mantañawjapxa suma qurimpiw lip'suyäna,
[5] manqhäxapsti pinot khuchhut lawanakampiw apakipayäna, ukarusti suma qurimpiw lip'suyarakïna, uka patxarusti palmeranakana, cadenanakan uñtasitapampiw k'achachayäna,
[6] ukarusti munkañ qalanakampi k'iñiñtayasaw k'achacht'ayäna. Kawkïr qurimpitix uchapkän ukax wali suma qurïnwa.
[7] Uka uta manqhäxsti qurimpkamaw lip'suyäna: q'iru lawanaksa, punku katxäsir lawanaksa, pirqanaksa, punkunaksa, pirqanakxarusti querubines sat chhiqhanakan uñtatampiw k'achachayäna.
[8] Ukxarusti Qullanan Qullanapäki uka chiqatakix mä uta lurayäna. Ukasti sayt'urux llätunka metronïnwa, utax qhawqha tupunïkitix ukkharaki, iranarusti llätunka metronïnwa. Ukatsti pä tunka waranqa kilo suma qurimpiw lip'suyarakïna.
[9] Clavonakasti sapa mayax phisqa pataka phisqa tunkan gramonïnwa. Ukatsti patankki uka utanaksa qurimpkamakiw lip'suyäna.
[10] Qullanansa Qullanapäki uka chiqansti, pä chhiqhaninak lurayäna, ukanakasti qurimpi lip'suyatarakïnwa.
[11] Uka chhiqhaninakan chhiqhanakapasti sayt'urux llätunka metronïnwa; mä chhiqhax pä metro pä tunka phisqan centimetronïnwa, uka chhiqhax uta pirqakamaw purïna, maynïr chhiqhasti ukch'arakikïnwa, uka chhiqhax maynin chhiqhapampiw jikthaptäna.
[12] Maynïri chhiqhanin mä chhiqhapasti, maynin chhiqhapjam ukch'arakïnwa, ukasti uta pirqakamaw purïna, mä chhiqhax maynïrin chhiqhapampiw jikthaptäna.
[13] Uka chhiqhaninakan chhiqhanakapax taqpachax llätunka metrönwa, chikachika utar uñtatkam sayt'atäpxänwa.
[14] Ukatsti cortina lurarakïna wila morado telata, chupika telata, lino telata, ukarusti querubines sat chhiqhaninakan uñtasitampiw p'itakipayäna.
[15] Salomonax uta nayräxatakix pä sayir piläranak lurayäna, amstarux niya tunka suxtani metronïnwa. Uka pilar patankir k'achachañanakapasti, pä metro pä tunka phisqan centimetronïnwa.
[16] Ukxarusti cadenanak wallqar uñtat lurayarakïna, ukanaksti piläranak patxaruw uchayäna; ukhamarus pataka granada achunak uñtat lurayäna, ukanaksti cadenanak taypiruw uchayäna.
[17] Uka piläranaksti Tatitun utap nayraqataruw uchayäna, mayax kupïxaru, mayasti ch'iqäxaru. Kupïxankki ukarux Jaquín sasaw sutichäna, ch'iqäxankki ukarusti Bóaz sasaw suticharakïna.