[1] Ukanak qhipatsti, moabita, amonita jaqinakax, meunita jaqinakampi mayacht'asisaw Josafat reyir nuwantir jutapxäna;
[2] ukatsti Josafat reyir yatiyirix mayninakaw sarapxäna: “¡Edom chiqata, Mar Muerto quta khursäxat mä jach'a ejercitow jumamp nuwasir jutanti! ¡Jupanakasti jak'achasinipxiwa, niyaw En-gadi markankxapxi!” sasa.
[3] Josafat reyisti axsarañat Tatituruw makhatäna, ukatxa ayuno lurañatakiw Judá uraqpachar yatiyäna,
[4] Judá uraqinkir jaqinakasti Tatitun yanapt'ap mayiñatakiw tantachasïna. Jaqinakax Judá uraqpachan utjir markanakat purinipxäna.
[5] Josafat reyisti, Judá chiqankiri jaqinakax Jerusalén markan tantachasipkatayna uka taypiruw sayt'asïna, Tatitun utapa machaq uta anqäx uñkatasina,
[6] jupasti jach'at säna: “Nayra awkinakaxan Tatit Diosapay, ¡jumätaw alaxpachankir Diosaxa, jumarakiw taqi markanakarus apnaqtaxa! ¡Juman amparamankiw ch'amasa, munañanïñasa: janiw khitis kutkatkiristamti!
[7] Nanakan Diosaxay, jumaw Israel markan nayraqatapat aka uraqin jakir jaqinakarux jaqunuktaxa, ukatsti juman munata Abrahaman wawanakaparuw wiñayatak churxtaxa.
[8] Aka uraqin utt'asxasinxa, jumatakiw mä uta lurapxäna, sapxarakïnwa:
[9] ‘Jan walt'añanakatix nanakar mutuyapxitani, nuwasiñasa, usuñasa, manq'at t'aqhisiñasa ukkhaxa, nanakax aka uta nayraqatan tantachasipxä, juman ukankatam layku, nanakax llakisiñanakaxan jumaruw art'asipxäma, jumasti ist'apxitätawa, qhispiyapxarakitätawa’ sasa.
[10] Jichhasti amonitanakasa, moabitanakasa, Seir qullunkirinakas akäsipkiwa, Egiptot israelitanakax jutasipkän ukkhaxa, janiw jumax uka uraqinakaru mantañanakap munkäyätati, jan ukasti jupanakat jithiqtxapxänwa, janiw tukjapkänti.
[11] Jichhasti, ukata phuqsusiñatakiw nuwasir jutapxi, uraqimat nanakar alisnukuñataki, kawkïr uraqtix nanakan katusiñanakaxatak churapkista uka uraqita.
[12] Nanakan Diosaxay, ¿janit jumax jupanakar mutuykätaxa? Nanakax janiw uka jach'a ejercitompi nuwasiñatak ch'amanïpkti. ¡Nanakax janiw kunsa lurirjamäpkti, ukat jumaruki uñtanipxsma!” sasa.
[13] Taqpach Judá markaw Tatitun nayraqatapan sayt'ata jikxatasipxäna, warminakasa, wawanakasa, jisk'a wawanakamppach kuna.
[14] Ukapachaw Tatitun ajayupax Zacarías chachan Jahaziel yuqapxar jutäna, jupax Benanías, Jeiel, Matanías wila masinkirïnwa. Matanías chachasti Asaf chachan wawanakapat levita jaqïnwa, jupax uka tantachäwinkarakïnwa.
[15] Jahaziel chachasti sänwa: “Judá, Jerusalén markan jakirinaka, ist'apxam, juma Josafat reyisa ist'arakim, Tatitux sapxtamwa: ‘Jan axsarapxamti, janirak uka jach'a ejército uñjasinsa mulljasipxamti, aka nuwasiñax janiw jumanakankkiti, jan ukasti Diosankiwa.
[16] Qharür willjtax nuwasir saraqapxam. Jupanakax Sis sat uka amsta makhatasinipki, jumanakasti Jeruel wasara uñkatasi jawira tukuyan jikxatapxäta.
[17] Janiw jumanakati aka nuwasiñan nuwasipkäta, sum wakichasipxam, suyt'apxarakim, ukat kunjämtix Tatitux jumanakar qhispiyapkätam uk uñjapxäta. ¡Jerusalenankiri, Judá uraqinkir jaqinaka, jan axsarapxamti, janirak mulljasipxamsa; arumanthi willjtasti jupanakamp nuwasir sarapxam, Tatitux jumanakampïskiwa!’ ” sasa.
[18] Ukatsti Josafat reyix p'iqip uraqir puriyañkamaw alt'asïna, Judá, Jerusalén markankir jaqinakasti Tatitun nayraqatapan jupar yupaychañatakiw killt'asipxäna.
[19] Ukatsti Quehat chachat saraqir levitanaka, Coré chachat saraqir wawanakapasa, wali jach'ata Israelan Tatit Diosapar yupaychañ qalltapxäna.
[20] Qhipärmanthisti wali willjtat sartasipxäna, Tecoa wasar tuqir sarañataki. Mistusipkäna ukkhasti, Josafat reyix sayt'asisin jupanakarux säna: “Jerusalenankirinaka, Judá uraqinkirinaka, ist'apxita: Tatit Diosamar iyawsapxam, ukatsti janiw axsarapxätati; profetanakapan arsutanakap iyawsapxam, ukatsti jumanakatakix taqi kunas walikïskaniwa” sasa.
[21] Ukatsti markar jiskt'asinxa, mä qawqha q'uchurinak ajllïna, jupanakan qullana isinakampi isthapita, soldado tamanakan nayraqatap sarasa, Tatitur aka q'uchumpi jach'añchapxañapataki: “Tatitur yuspagarapxam, munasiñapax wiñayatakiwa” sasa.
[22] Ukatsti, kunapachatix kusisiñampi q'uchunak q'uchuñ qalltapkän ukkhaxa, Tatitux jan walt'añanak sartayäna, Judá markar katuntiri jutapkatayna uka amonita, moabita, Seir qullunkiri jaqinak taypina, jupanakasti atipjataw uñjasipxäna.
[23] Moabitanakampi amonitanakampix Seir qullun jakirinakaruw katuntapxäna, jupanakarusti q'alpun tukjapxäna, jupanakaru tukjasasti, jupanakkamaw tukjasipxarakïna.
[24] Judá markankir jaqinakax kawkhattix wasarax uñstkäna uka chiqar purinisaxa, uñisirinakapan ejercitop uñtasinxa, jiwatanakarux uraqir jaqurtatkam uñjapxäna; ¡janiw maynis qhispkataynati!
[25] Ukatsti Josafat reyimpi jaqinakapampix kunanaktix uñisirinakapax jaytawayapkatayna ukanak apthapiriw jalapxäna, jupanakasti walja uywanaka, nuwasiñ yänaka, isinaka, jila alani yänak jikxatapxäna, ukanaksti taqpach katuntasipxäna. Walja yänakapuniw utjäna, janiw jupanakax aptirjamäpkänti; waljätapatsti kimsa uruw uka yänak apthapipxäna.
[26] Pusïri urunsti Beracá sat qhirwan Diosar jach'añchañatakiw tantachasipxäna. Ukat uka chiqax jichhürkamasa Beracá sutimpi uñt'atäski, ukasti “Aski waxt'äwi katuqañ qhirwa” sañ muni.
[27] Uka qhipatsti Judá, Jerusalén markankir jaqinakax Josafat reyin qhipap wali kusisitaw Jerusalén markar kutt'anxapxäna, Tatituw jupanakarux kusisiñ churäna uñisirinakapat qhispiyasina.
[28] Jerusalén markar purisinsti, Tatitun utaparuw sarapxäna, salterionakampi, citaranakampi, trompetanakampi phust'asisa.
[29] Tatitun Israelan uñisirinakapampi nuwasitap yatisax, taqi markanakaw Diosarux axsarapxäna.
[30] Josafat reyin marka apnaqañapasti sumakiw sarantäna, Diosaw juparux marka jak'anakapampi suman jakayäna.
[31] Josafat reyisti ukhamaw Judá marka apnaqäna. Jupax kimsa tunka phisqani maranïkän ukkhaw marka apnaqañ qalltäna, pä tunka phisqani mararakiw Jerusalenan apnaqäna. Taykapax Azubá satänwa, jupasti Silhí sat chachan phuchhapänwa.
[32] Josafat reyix Asá awkipjamarakiw chiqa kankañampi sarnaqäna. Jupan luratanakapasti Tatitun nayraqatapanxa askïnwa.
[33] Ukampisa, qullu patanakan utjiri, yaqha diosanakar yupaychañ utanakapax janiw chhaqtayatäkänti, markasti nayra awkinakapan Diosapar arkañatakix janïraw suma thurt'atäkänti, uka layku.
[34] Josafat reyin ukat ukxar sarnaqäwipasti, qalltat tukuykamax Hananí chachan Jehú yuqapana sarnaqäwipxat crónicas sat qillqatapankiwa, Israelan reyinakapan qillqatanakapan qillqt'atarakiwa.
[35] Qhiparusti Judá uraqinkir Josafat reyix Israelankir Ocozías reyimpiw mayacht'asïna, uka reyisti ñanqha lurir chachänwa.
[36] Josafat reyix juparuw jaqkattäna barconak lurañataki, ukat Tarsis markar sarañataki, uka barconaksti Esión-guéber chiqan lurapxäna.
[37] Ukapachaw Maresá chiqankir Dodavahu chachan Eliezer yuqapax Josafat reyitak profecía arunak arsüna: “Tatitux Ocozías reyimpi mayacht'asitam laykuw, luräwim jisk'a jisk'a t'unjani” sasa. Ukatsti chiqpachapuniw barconakax jisk'a jisk'a t'unjat uñjasïna, ukatsti janiw Tarsis markarux sarkxapxänti.