[1] Davidan Salomón yuqapasti, Tatitun yanapapampix marka apnaqäwip suma thurt'ayäna, munañanïñapas juk'ampiw jilxatäna.
[2] Ukatsti israelitanakarux taqiniruw jawsayäna: soldadonakan jilïrinakaparu, aytat jilïr jaqinakaru, Israelan taqpach wila masinakan jilïrinakaparu.
[3] Ukatsti, taqi tantacht'asit jaqinakampix Gabaonankki uka qullan chiqawjaruw saräna, ukanwa Diosampi jikisiñ Utax jikxatasïna, uksti Tatitun luqtiripa Moisesaw wasaran luratayna.
[4] Ukampis Davidax Diosan arcap Quiriat-jearim chiqat Jerusalén markaruw apatayna, kawkharutix mä chhujlla wakichkatayna ukkharu.
[5] Urí chachan Besalel yuqapa, khititix Hur chachan allchhipäki ukaxa, broncet lurkatayna uka altarax Gabaón chiqankarakïnwa, Tatitun Utap nayraqatana. Salomonampi taqi jaqinakampix Tatitur jiskt'asiriw uka chiqar sarapxäna.
[6] Salomonasti Diosampi Jikisiñ Uta nayräxankkän uka broncet lurat altararuw makhatäna, ukatsti waranqa nakt'at wilañchanak Tatitur luqtäna.
[7] Ukatsti uka arumpachaw Diosax Salomonar uñstäna, juparusti sänwa: “Kuntix munkta uk mayita, nayasti churämawa” sasa.
[8] Salomonasti Diosarux sänwa: “Jumax David awkixarux jach'a munasiñam uñacht'aytaxa, nayarusti jupa lanti marka apnaqirit utt'ayarakistaxa.
[9] Jichhasti Dios Tatituy, kuntix jumax David awkixar arsuwaykta ukampix phuqhakimaya, jumaw nayarux reyit utt'ayasista, laq'ar uñtat walja jaqinakaru apnaqañaxataki.
[10] Ukhamasti, ch'ikhi kankañampi, yatiñ kankañampi aka marka apnaqañaxatak churita; ¿khitirak aka jach'a markamar apnaqaspasti?” sasa.
[11] Diosasti Salomonarux sarakïnwa: “Juman uka mayitamarux jaysämawa, janiw jumax qamir kankañsa, yänaksa, jach'añchatäñanaksa, uñisirinakaman jiwarayatäñapsa, walja maranak jakañsa mayktati, jan ukasti ch'ikhi kankaña, markaxar ch'ikhi kankañampi apnaqañatakiw yatiñ kañkañ mayistaxa, nayaw uka marka apnaqañatak reyit utt'aysma,
[12] nayasti ch'ikhi kankañampi, yatiñ kankañampi churäma, ukhamarus qamir kankañampi, yänakanïñampi, jach'ar aptatäñampi churarakïma, uksti janiw jumat nayra reyinakax katuqapkänti, janirakiw jumat qhipa reyinakas katuqapkaniti” sasa.
[13] Uka qhipatsti, Salomonax Gabaonankki uka qullan chiqawjat mistusax, Jerusalén markaruw kuttxäna, ukatsti Israel marka apnaqäna.
[14] Salomonax waranqa pusi patakan carronaka, tunka payan waranqa caballxat jalnaqirinak tantachäna. Mayninakarux nuwasiñ carronakatak wakt'ayat cuartelanakatakiw usküna, mayninakarusti Jerusalén markan jupar uñjiritakiw uskurakïna.
[15] Reyix Jerusalén markanxa qursa, qullqsa qalanakar uñtat waljpun utjayäna; ukatsti cedro lawanakxa pampan utjir higo alinakar uñtata utjayarakïna.
[16] Salomonan caballonakapax Musri, Cilicia uka markanakat apayanitänwa, reyin alakip jaqinakapaw uka markanakat alanipxirïna.
[17] Egipto markat apayanit mä carron alapax suxta patak qullqïnwa, mä caballon alapasti patak phisqa tunkan qullqïnwa. Ukatsti hitita, sirio reyinakax Salomón reyin alakip jaqinakapat ukanak alasipxirïna.