[1] Nané matahai Yesus Énini fimiri bahana yohoniya, gugu mése nafamahanani Ala ahu yohona u efefeméri yori inggemoné moho égéki, ahu kara nahu yohona u damu bafa-guru Yesus Éné u yokukubumériya nuguna u fani hamu hanéri efefeméri yori inggemon deyoho. Ala bafa-guru nuguna u esemu boduwe efefeméri yori inggemoné. Emohoni, gugu égena ékému fani ahu aburoho hanikéri bafa-guru kiri bohonané ememere fimenan deyoho, meneféyané!
[2] Damu ahu gogo emu-hori-daha nugu ukukuwoho poréyahamu égena égéki awe emesuméri beriya. Emohote, ahu fani éné fage féri u poréyahamu yohon dekumaki, ahu égé éné modu keiyongmu égena égéki wayamu hafuféri etori baha. Emohoni, égé esemu manggohomu baha, damu u fe fani égé deyoho.
[3] Damu nugu wi-kuda éné susung yuhu guma asugangkumaka, wi-kuda égé nuguna sifingmu fimiri emowané mériya égéki hamemere emoho. Emohoni, wi-kuda éné aduwosoho emu-hori-daha égéki nugu hafuféri etori ériya.
[4] Damu nugu awe hate etoriyani, kapal égé esemu fikoyahakigi, damu kapal éné misini kiyo abubuméri égé égéki esemu unawarekigi. Emohote, kifi fikoyaha esemu hanggeramu deri damu kapal esumu fikoyaha égéki yeri ahainé moho égéki, ahu misini éné kiyo abubuméri éné sifingmu fimiri kapal égéki hafuféri wayamu etori baha.
[5] Damu fage uku hate hamemere égé. Fage égéki aduwosoho emu-hori-daha éné gogo fe kiri unawarekigite, égé kokokéri esumu u fe fikokéri égé égéki hafuféri yohoné. Damu maha fifinané: Indo égé unawarekigite, bitahae emu-hori-daha égéki indo doremoho.
[6] Damu nuguna fage égé indo gahakumu égé. Fage égé ukukuwoho emu-hori-daha keiyongkéri soho nokumu égena égéki kufiyori éri awe yohoné moho. Damu nuguna aduwosoho, bero, bégé égena ékému ukukuwoho keiyongkéri égena égéki yori nuguki poréyahamu emoho égéki nuguna fage kéré. Damu nugu unaware beriya arohori mése ahuyaha kiri beriya niyaki fage féri u yoriya égéki emohoni, keiyongkéri égena. Nugu fage féri u yori keiyongmu emériya égéki hohoi yohona ahuhabang Iblis emohoni, ememere keiyongmu yoriya kéré.
[7] Damu ohoru fenegene emu-hori-daha abuwona kumu ohona kumu ohoru siyahana kumu ememere égena égéki ahu mokumu kemahanani, awe ahu yohona u dari kuyokigina.
[8] Emohote, ahu éné fage égéki uku fani mokumu afénané fani kuyokin deyoho. Damu nuguna fage féri u keiyongmu yoriya égéki nugu fani fage hafuféri etoriya deyoho. Fage féri u keiyongkéri yoriya égéki usi éné hasibuwo emoné ahu akumoné moho gahakumu égé.
[9] Damu nuguna fage féri Nugunabo Ala Énaukuniya, damu hate nuguna fage féri ahu yohoki u guni yoriya. Ahu yohoki Alasé Uku Ukuné kusi gahakumu emaki kéré.
[10] U feki hato kamisige u manggohomu yoriya, damu hate u poréyahamu yori guni yoriya. Emohote, nané matahai Yesus Énini fimiri bahana yohoniya, gugu fani ememere emenan deyoho, meneféyané.
[11] Damu ohogunto kamisige égé awe oho manggohomu égé damu oho hekigi ememere boféyamoho rahamohoe? Karawoho.
[12] Nané matahai Yesus Énini fimiri bahana yohoniya, debahae-mangga égé kamu debahae-mangga éné yo fiyoho, mite debahae-durian éné yo fani fiyon deyoho. Damu debahae-rambutan égé kamu debahae-rambutan éné yo fiyoho, mite debahai-mangga éné yo fani fiyon deyoho. Oho hekigi égé fani oho manggoho boféyamon deyoho. Hamemere gugu guguna fage féri u poréyahamu yohonan deyoho, mite kamu u wayamu nouwané.
[13] Ahu Yesus Énini fimiri bahana yohoniya, gugu bahana ékému ahu tuhuremu yoho yoku ememere fimahana, "Nu esemu nané sifing wayamu fimiri aburohomu nafaméri bere," ememere fimahana. Gugu ememere fimenangkumaka, guguna modu amiféri Ala Éné u dari wayamu emesuméri enané. Damu gugu guguna sifing wayamu fimiri esemu aburohomu nafamenangkumaka, gugu hate modu amiféri bahana.
[14] Emohote, gugu ahu fe wayamu baha etori modu kimahana, damu gugu kokokéri guku kamu guguni fimiri bohonangkumaka, emohoni gugu fani ememere yohonan deyoho, "Nu esemu nané sifing wayamu fimiri aburohomu nafaméré." Gugu ememere yohonangkumaka, gugu Ala Éné u haiyangmu yoho égéki yahamu yohona.
[15] Damu gugu ememere sifing fani wayamu fimahana de égéki fani Ala Éné sifing fimoho égé deyoho. Emohote, uku ahu fani Yesus Énini fimiri bahana de yohona sifing fimahana égé kéré. Damu hohoi yohona sifing fimahana égé kéré.
[16] Gugu ahu fe wayamu baha égéki etori modu kimahana damu gugu kokokéri guku kamu guguni fimiri bahana ememere bohonangkumaka, gugu damu bomugasuma afénané, damu u keiyongkéri emesuméri bohonané.
[17] Emohote, ahu sifing wayamu fimiri wayamu emesumahana égéki Ala Égése kuroho. Ala kuroho égéki birikuma-berahafi-ukumasiyo (8) ememere égena: Ala fimohoni esemu mumangge égé égéki ahu éné modu fani dosa yaha de esumu manggohomu baha. Damu égé u fe fani emoho de ahu yoho kumu kutumu sebi yahana. Damu yohona modu kuyoméri emesumoho. Damu ahu fe yoho u yohona égéki dari hamemoho. Damu ahu fe etori kuyomu woruméri kukuwoho kurosumoho damu ukukuwoho mahamu emesumoho. Damu ukukuwoho emu-hori-daha égéki wayamu emesumohoni, wayamu égena. Damu égé fani ahu fe etori mungguka, damu ahu fe hanikéri wayamu emoho, fani ememere degemu emon deyoho. Damu égé ahu manggoho gahakumu emesuméri bohon deyoho.
[18] Damu ahu gogo kamisige ahu tuhuremu kutumu sebi kemahana. Damu ahu tuhuremu yohote ahu gogo fe yoho kumu sebi kemahana. Ememere sebi keméri bahanani, Ala fimohoni yoho emu-hori-daha kotoféri Ala Éné u dari haiyangmu emesuméri bahana.