[1] ከጳውሎስና ከስልዋኖስ፥ ከጢሞቴዎስም፥ በአባታችን በእግዚአብሔር፥ በጌታችን በኢየሱስ ክርስቶስም ላመኑ በተሰሎንቄ ላሉ ማኅበረ ክርስቲያን፤ ከአባታችን ከእግዚአብሔርና ከጌታችን ከኢየሱስ ክርስቶስ ሰላምና ጸጋ ለእናንተ ይሁን።
[2] ስለ እናንተ ዘወትር እግዚአብሔርን እናመሰግነዋለን፤ ሁልጊዜም በጸሎታችን ሳናቌርጥ እናስባችኋለን።
[3] በአባታችን በእግዚአብሔር ፊት የሃይማኖታችሁን ሥራና የፍቅራችሁን ጽናት፥ በጌታችን በኢየሱስ ክርስቶስ የሚሆን የተስፋችሁንም ትዕግሥት እናስባለን።
[4] የተወደዳችሁ ወንድሞቻችን ሆይ፥ እግዚአብሔር እንደ መረጣችሁ እናውቃለን።
[5] የወንጌል ትምህርታችን በኀይልና በመንፈስ ቅዱስ፥ በታመነ ምልጃም እንጂ፥ በእናንተ ዘንድ በቃል ብቻ አይደለምና፤ ስለ እናንተም በእናንተ ዘንድ የሆነውን እናንተ ታውቃላችሁ።
[6] እነሆ፥ እናንተም እኛንና ጌታን መሰላችሁ፤ በብዙ መከራ ከመንፈስ ቅዱስ ደስታ ጋር ቃሉን ተቀብላችኋልና።
[7] በመቄዶንያና በአካይያ ላሉ ምእመናን ሁሉ ምሳሌ ሆናችኋል።
[8] የጌታችንን ቃል ከእናንተ ሰምተው ተምረዋልና፤ ነገር ግን በመቄዶንያና በአካይያ ብቻ አይደለም፤ ደግሞም በእግዚአብሔር ማመናችሁ በያገሩ ተሰምታለች፤ እኛም ስለ እናንተ ምንም ልንናገር አንሻም።
[9] እኛ ወደ እናንተ እንደ መጣን፥ እናንተም ለሕያውና ለእውነተኛ አምላክ ታገለግሉ ዘንድ፥ ከጣዖት አምልኮ ወደ እግዚአብሔር እንደ ተመለሳችሁ እነርሱ ራሳቸው ያውቃሉ።
[10] ከሙታን ተለይቶ የተነሣ ልጁ ኢየሱስ ክርስቶስን ከሰማያት ተስፋ እያደረጋችሁ፥ እርሱም ከሚመጣው መከራ ያድነናል።