[1] Kay Isos kay siyabi sa kansiro keyen, Tiyak ngani in kalaati atai sa kanyo siro batay kangitan in DiyoS agpapoon apo lakoy kabaloyan. Siro idbatay kay matay.
[2] Paka kadalan enem ka ibeng Isos monaker sa osai ka mabwat pag boksor. Siyo idapo piyaanggat no yewed Pidro waget, osai Santiyago, osai Owan. Ista kansiro ngiitan Isos miyalis wa,
[3] agrawa, in kansiyo lambong maboksi wano makasolap. Kamayba nakay pag mangyan agogas lambong, idapo kapaboksi kataw ina.
[4] Ngiitan in tolo ka agadar Mowisis, osai Iliyas agpanggisodan osai Isos.
[5] Kalbas siyabi Pidro kay Isos keyen, Laki Agpamatoldo, maal in kami atai. Kami batay agpangwat tolo ka barangas, in osai sa kaimo, in osai kay Mowisis, in osai kay Iliyas.
[6] Pidro yewed manremrem, toloy waget miplaong kataw ina, panawen siro maloba agkalimo.
[7] Kalbas siro kiyanlongan osai ka libo. Apo miplaong batang sa libo keyen, Anda in kangay piyagmaal pag Bodang. Siyo kanyo parengeyen.
[8] In mga agadar toloy manriwa sa balabaan, idapo wa ngiitan no yewed Isos waget.
[9] In siro agongali, siro piyabilin Isos keyen, Ayaw kanyo agsabiyen kamayba wa kay nakay in kanyo ngiitan, anggan ako in Bodang Mangyan yewed kay batang matay boway wakay.
[10] Kalbas kansiro piyagalapet in bilin, kamay siro agpaypolongan no nakay in beet siyabi ina pag kansiyo siyabi keyen, boway wakay.
[11] Isos kansiro tiyanong keyen, Nakay batang piyagsabi in mga agpatoldo in mga Batas keyen, kailangan Iliyas in tokaw atai pataboy?
[12] Isos keyen, Iliyas ngani in tokaw atai agrateng, matang kansiyo pakapyaen in boote. Na nakay batang piyagsabi in mga Agisolat keyen ako in Bodang Mangyan batay aronaw kaidapan osai piyagpamalowasan?
[13] Kamay kangay piyagsabi sa kanyo keyen, Iliyas rateng wa, kalbas siyo piyangwatan mga mangyan kamayba nakay in kansiro beet, kataw daan in siyabi in mga Agisolat panawen sa kansiyo.
[14] Kora Isos moli wakay sa mga agadar mataw, kansiro ngiitan maloba karowan pag mangyan agkatipon sa kansiro. In mga agpatoldo in mga Batas Diyos agpalsisagotan osai in mga agadar.
[15] Paka in mga mangyan kangitan kay Isos, siro boo agsoyo. Siro domalagan pataboy sa kansiyo, miplaong sa kansiyo.
[16] Isos miplaong sa kansiyo mga agadar keyen, Nakay in kanyo piyagpalsisagotan osai ina pag mga mangyan?
[17] In osai batang sa karowan keyen, Laki Agpamatoldo, kangay biyaba atai sa kaimo in kangay bodang kaliyakiyan, kataw siyo piyaglowasan mamaw, yewed kaiplaong.
[18] Baatte siyo piyaglowasan siyo piyagligan in mamaw, agbora in kansiyo bibi, agtogait in kansiyo ngipen, agkakenet in kansiyo bilog. Kangay yaayay sa kaimo mga agadar keyen boyawen in mamaw, kamay siro yewed kabaloy.
[19] Kalbas siyabi Isos sa kansiro keyen, Piyawa, kamo pag mga agkaboway ngona, mga yewed agpaniwala. Anggan nangkadogay kay kailangan ako mataw kay sa kanyo? Anggan nangkadogay kay ako agbanta kay sa kanyo? In bodang atai babaen.
[20] Kansiro ngani biyaba kay Isos. In Isos ngiitan in mamaw, toloy kansiyo yoogyog in bodang. Siyo mibolalang sa diya, agliganligan, agbora wa in bibi.
[21] Kalbas keyen Isos sa amang, Angkadogay wa siyo piyaglowasan in mamaw? Keyen in amang, Sogod bodangte kay.
[22] Siyo mapret siyogbo in mamaw sa baya, no yewed sa sapa matang nges biyono. Kamay no kao apo batay padalan, na kao agpakayawte sa kanyam, kami kaimo tolongen.
[23] Isos keyen, Nakay batang kao keyen no apo padalan? In boote apangwat in agpasandig sa Diyos.
[24] Toloy miplaong maksen in amang keyen, Ako ngani agpasandig. No korang kay in kangay paniwala na kaimo dagdaganen.
[25] Kay Isos ngiitan agpaypanrateng kay in mga mangyan, matang kansiyo piyangelel in mamaw keyen, Kao pag mamaw agpayewed kaiplaong, agpakabingi, kao kangay piyagboyaw, bali wa asin sa bodang. Ayaw wakay misoroy sa kansiyo.
[26] In mamaw mango, yoogyog anggan in bodang, kalbas panaw wa. In bodang mibaloy wa kagwali matay, matang siyabi in karowan keyen, Matay wa.
[27] Kadogay in bodang yaatang Isos sa bakwaw, yoorog. Tomaydek wa in bodang.
[28] Kora Isos misoroy wa sa balay. In mga agadar, siro wakayte keyen, Nakay batang kami yewed kabaloy agpamoyaw sa mamaw?
[29] Keyen wakay Isos, In kataw ina pag mamaw idbatay apamoyaw no yewed sa agpandalangin.
[30] Kora Isos panaw wa ista, domalan sa Galiliya. In beet Isos in mga mangyan ayaw katawan siyo asin,
[31] angkataw kansiyo piyagpatoldo in kansiyo mga agadar. Keyen, Ako in Bodang Mangyan batay tiyaboy sa kabaloyan mga mangyan, batay biyono, kamay batay wakay boway sa katolo ka ibeng.
[32] Yewed kansiro atawanan in kansiyo beet siyabi, kamay siro agkalimo agtanong sa kansiyo.
[33] Kora Isos rateng sa Kapirnaom. In siro sa balay wa, keyen Isos sa kansiyo mga agadar, Nakay in kanyo piyagpolong karai sa dalan?
[34] Siro yewed miplaong, angkataw siro agpalagawan karai no nakay sa kansiro in lakonaw.
[35] Isos tomokkaw, kansiyo tiipon in Labing Dowai, siyabi sa kansiro keyen, No siyo beet lakonaw, na kailangan siyo kalakoyte sa boo, sogowan in boo.
[36] Kansiyo biyerya in osai ka bodangte, piyataydek sa kansiro kagwaraan. Kansiyo kiyapet in bodang, siyabi sa mga agadar keyen,
[37] No in mangyan panawen sa kangay agkaanggay sa bodangte kataw anda, na ako in kansiyo piyagkaanggayan. Osai no siyo agkaanggay sa kangay, na yewed waget ako in kansiyo piyagkaanggayan, no yewed in agsogo sa kangay.
[38] Siyabi Owan sa kansiyo keyen, Laki Agpamatoldo, kami apo ngiitan mangyan agawit kaimo ngaran sa agpamoyaw mamaw. Kanyam piyagayaw siyo, angkataw siyo yewed kantam sarig.
[39] Kamay keyen Isos, Siyo ayaw kantam agayawen, angkataw no siyo kabaloy agalapet kangay ngaran matang agpangwat lakonaw pag panawen, na siyo idbatay toloy agsabi daet sa kangay.
[40] Angkataw in yewed aglaban sa kantam na sa kantam daan.
[41] Kangay piyagsabi sa kanyo keyen, Kamayba nakay in agtaboy sa kanyo osai ka lisap sapa panawen kamo sa kangay, na siyo batay ngani piyakan bayad.
[42] Kamayba nakay in agpamaakay sa daet sa bodangte kataw tai agpasandig sa kangay, na in maal kay sa kansiyo in eketanen lakoy bato kansiyo leey, kalbas siyo leggeben sa dagat.
[43] No kaimo bakwaw in agakay sa kaimo matang kao agpangwat daet, na kaimo dodowen. Maal kay sa kaimo in pataboy sa langit osai waget in bakwaw, sa apo dowai ka bakwaw kao pataboy sa toyongan, misogbo sa baya idbatay maplek.
[45] Osai no kaimo bitis in agakay sa kaimo matang kao agpangwat daet, na kaimo dodowen. Maal kay sa kaimo in pataboy sa langit pilay, sa apo dowai ka bitis kao biyenglay sa toyongan.
[47] Osai no kaimo mata agakay sa kaimo matang kao agpangwat daet, na kaimo kasloten. Maal kay sa kaimo in pataboy sa sakopan Diyos osai waget in mata, sa apo dowai ka mata kao biyenglay sa toyongan.
[48] Ista yewed batay matay in mga eled agkoman sa kansiro, idbatay maplek in baya.
[49] Kataw in agay piyaglinis baya, osai kataw in pamangnen piyagpatamis asing, na kataw daan din ina in baatte mangyan batay piyagpakamaal.
[50] Maal in asing, kamay no idwa matamis in asing, na idbatay wa matamis wakay tagoli. Toladen kamo in asing, osai maybelagan.