[1] Paka dogay kayte Isos rateng wakay sa Kapirnaom. Kalbas biyarita wa keyen, Isos sa balay wakay.
[2] Matang aronaw wa mangyan in agkatipon, anggan idapo wa pagtaydekan, kamayba sa tongkodan waget. Isos agpatoldo sa kansiro in Maal pag Barita.
[3] Kalbas apo maypanrateng opat ka mangyan apo piyagosong osai ka kaliyakiyan yewed kapaglebey.
[4] Kalbas in siro yewed karateng kay Isos panawen maliget, kansiro yoorak in atep sa kansiyo betek. Paka apo wa salay kansiro piyalooy in apo maskit agipalibay daan sa kansiyo yaiyan.
[5] Paka ngiitan Isos in kalakoyen in siro agpasandig sa kansiyo, kansiyo siyabi sa apo maskit keyen, Kale, liibangaw wa in kaimo mga daet.
[6] Kamay asin apo agtokkaw mga agpatoldo in mga Batas Diyos, siro agpanremrem keyen,
[7] Nakay batang ina pag mangyan agsabi kataw ina? Siyo agpakagwali wa Diyos. Idapo batay kabaloy aglibangaw sa mga daet, no yewed in Diyos waget.
[8] Kamay Isos toloy katawan in kansiro piyagremrem, matang siyo keyen, Nakay batang kamo agremrem kataw ina?
[9] Nakay agbangen in yewed maidap sabiyen sa yewed kapaglebey, in osai keyen, Liibangaw wa in kaimo mga daet, in osai keyen, Kao tomaydek wa, panaw?
[10] Amba kamo boo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen,
[11] Kangay piyagsabi sa kaimo, Amba kao tomaydek, babaen wa in kaimo yaiyan, moli wa sa kaimo balay.
[12] In siro boo agpangkit in apo maskit tomaydek wa, toloy biyaba in yaiyan, panaw wa. Siro boo agsoyo, agmaal sa Diyos, agsabi keyen, Ibat tangona kitam idapo kay batang kangitan kataw ina.
[13] Isos pataboy wakay sa balabaan dagatte Galiliya. Kalbas pataboy sa kansiyo in karowan mangyan, siro kansiyo piyatoldo.
[14] Kalbas in siyo agipanaw wakay kansiyo ngiitan Libi, bodang Alpiyo, agtokkaw sa opisina paningilan bowis. Keyen Isos, Kao miyanggat wa sa kangay. Libi tomaydek wa, miyanggat kay Isos.
[15] Kalbas Isos osai in kansiyo mga agadar agpalpamangan sa kay Libi balay. Apo din mga agpaningil bowis, osai mga agpamangwat daet, angkataw aronaw in agyanggat kay Isos.
[16] Apo din mga Parisiyo pag mga agpatoldo in mga Batas Diyos. In siro kangitan Isos agpalanglang sa mga agpamangwat daet, osai sa mga agpaningil bowis, kansiro siyabi sa kansiyo mga agadar keyen, Nakay batang Isos agpalanglang sa mga agpaningil bowis osai sa amat kay pag mga agpamangwat daet?
[17] Isos karengey ina pag siyabi, matang siyo keyen sa mga agpatoldo in mga Batas Diyos, In mga idapo maskit idapo kailangan agpanggamot, dayem in mga apo maskit. Kaya ako atai pataboy yewed matang agberya sa mga keyen siro idapo daet, dayem sa mga apo daet.
[18] Osai ka betek kay Owan mga agadar yewed wa agpamangan matang siro dogay agpandalangin, kadayo in mga Parisiyo. Kalbas apo mga pasabangen kay Isos keyen, Nakay batang yewed wa agkoman in kay Owan mga agadar, kadayo in sa mga Parisiyo, kamay in kaimo mga agadar agpamangan daan?
[19] Keyen Isos, In mga piyagberya sa kasalan idbatay kabaloy idwa agkoman anggan baywi kay in batay lalaki. No baywi kay in batay lalaki na siro agkoman daan.
[20] Dayem dogayan batay kiyowa wa in kaliyakiyan na asin pag mga ibeng siro idbatay wa mamangan.
[21] Idapo batay agsimat ikkay mikeres pag damit sa dogay wa pag lambong, angkataw no isag mikeres in bayo pag damit, na mistobo in rognit sa simatan.
[22] Osai idapo batay agsoroy bayo pag alak sa mga datiyan wa pag balat pagsoroyan, angkataw in alak batay mistobo, na batay mangkoltik in balat, na mabobo wa in alak, kadayo in balat pagsoroyan masida wa din. No bayo pag alak, na kailangan bayo pag balat.
[23] Kalbas Ibeng wakay Pamainga, kora Isos mipadalan sa mga panogdaan kagwali paray. Kalbas in siro betek agpalipanaw, in kansiyo mga agadar agpamoti in mga galem.
[24] Kalbas keyen kay Isos in mga Parisiyo, Kao mangkit, in piyagpangwat in kaimo mga agadar. Ina piyagayaw sa Ibeng Pamainga.
[25] -
[26] Kalbas siyabi Isos keyen, Yewed mana kanyo biyasa in piyangwat Dabid tangona in betek Abiyatar in mabwat pag poon sa mga sasirdoti. Kora Dabid idapo pamangnen, siro agkayawes. Dabid misoroy sa balay Diyos, siyo mamangan in tinapay piyaandog sa Diyos. Ina piyagayaw piyagkoman no yewed in mga waget sasirdoti. Dabid mamangan, kansiyo din piyakan in kansiyo mga sarig.
[27] Isos keyen kay, In mga mangyan piyangwat yewed matang agalapet sa Ibeng Pamainga. Dayem in Ibeng Pamainga agbangen piyangwat panawen ina piyagkailangan mga mangyan.
[28] Na ako in Bodang Mangyan kapwan din in Ibeng Pamainga.