[1] Kora Isos rateng wa sa ripay in dagatte sa kobat Girasa.
[2] Paka siyo lompot sa bangka, siyo tiyagbo osai ka kaliyakiyan batang sa mga leyang lebengan. Ina pag kaliyakiyan piyaglowasan maloba wano pag mamaw.
[3] Siyo agbalay sa mga leyang lebengan. Siyo yewed abakos kamayba mga karakara.
[4] Angkataw mapret wa siyo piyangaw osai biyakos karakara, kalbas kansiyo piyamogloy in mga karakara, piyanlotok in mga pangaw. Idapono mangyan kabaloy kapandaeg sa kansiyo.
[5] Kamayba yabi kamayba ibeng siyo baatte agpango sa mga lebengan osai sa mga boksor. Osai siyo agpamaseben sa mga bato.
[6] Paka siyo kangitan kay Isos sa adayonaw, siyo domalagan tomagbo, agmaal sa kansiyo.
[7] Siyo mango maksen keyen, Isos, kao Bodang Diyos mabwat sa boo. Ako ayaw agladowen. Ako apo piyagayay sa kaimo sa pangkit Diyos, ako ayaw kaimo agpakaskitanen.
[8] Kaya kansiyo siyabi kataw ina, angkataw siyabi wa Isos sa mamaw keyen, Kao pag maloba wano pag mamaw, kao bali wa asin pag mangyan.
[9] Kalbas Isos keyen, Nakay in kaimo ngaran? Keyen in mamaw, Ako piyagawit Bonton, angkataw kami karowan.
[10] Kalbas siyo agdaing wano kay Isos keyen, Kami ayaw agboyawen atai pag kobat.
[11] Asin pag boksor apo karowan wano mga beyek agpaypanlongkod.
[12] Kalbas in mga mamaw agdaing kay Isos keyen, Kami ista wa pamataboyen sa mga beyek, kami kaimo paisoroyen ista.
[13] Isos pomayag. Kalbas in mga mamaw panaw wa sa mangyan, mangisoroy wa sa mga beyek. Siro mga dowai ka libo. Kalbas in mga beyek maypandalagan gayed sa rakyas anggan misogbo sa dagatte, mangaleggeb wa.
[14] Kalbas domalagan in mga agalapet in mga beyek, in mibaloy kansiro biyarita sa bayan osai sa mga kobat. Kalbas malitaboy ista in mga abaritaan matang piyangkit ina pag mibaloy.
[15] Paka rateng kay Isos, kansiro ngiitan in batang piyaglowasan agitokkaw, aglambong wa, apo wakay bait, siyo in batang piyaglowasan bonton. Kalbas siro agkalimo.
[16] Kalbas in mga karai kangitan agbarita sa kansiro in mibaloy sa batang piyaglowasan mamaw, osai sa mga beyek.
[17] Kalbas siro omayay kay Isos keyen, Kao ayaw wa atai sa kanyam kobat, laki.
[18] In Isos agsakay wa sa bangka, siyo piyagtanoran in batang piyaglowasan mga mamaw keyen, Ako miyanggat sa kaimo.
[19] Kamay siyo yewed piyaanggat, dayem keyen Isos, Kao moli wakay sa kaimo mga kabelagan, kaimo sabiyen in kalakoyen in piyangwat in Kapwan sa kaimo, no nangkataw siyo agpakayawte sa kaimo.
[20] Kalbas panaw wa in mangyan, agbarita ngani sa mga bayan Dikapolis in kalakoyen in boo piyangwat Isos sa kansiyo. Kalbas in boo mga mangyan agsoyo.
[21] In Isos motol wakay sa ripay dagatte, agkatipon in maloba karowan pag mga mangyan sa kansiyo sa balabaan dagatte.
[22] Kalbas apo rateng osai ka mangyan in ngaran Airo, siyo agpapoon sa balay pagpaniponan. Paka kangitan kay Isos siyo maloba wano agpaselang sa kansiyo,
[23] maloba agayay keyen, In kangay bodangte kagbaiyan batay wa matay. Kao miyanggat wa sa kangay, siyo kaimo atangen matang siyo maal wakay, boway.
[24] Kalbas Isos miyanggat wa kay Airo. Karowan wano in miyanggat kay Isos anggan siyo piyagliget.
[25] Asin apo osai ka kagbaiyan labing dowai wa ka dagon piyagpanalowan.
[26] Siyo maloba piyagpaidapan, kansiyo wa liyobos in boo kansiyo mga sangkap sa aronaw aggamot sa kansiyo, kamay idbatay maoraw, no yewed agkarereg wa.
[27] -
[28] Siyo abaritaan wa in mga piyagpangwat Isos. Kalbas siyo keyen, Kamayba nges kansiyo waget lambong in kangay makapkap na kangay maskit maoraw wakay. Matang siyo paagem sa karowan kay Isos awak, komapkap sa kansiyo lambong.
[29] Kalbas toloy wa ngani maoraw in kansiyo agdaya, kansiyo atawanan sa kansiyo bilog keyen maal wakay siyo.
[30] Isos toloy katawan apo makowa kabaloyan sa kansiyo, kalbas siyo papeles, siyabi sa karowan keyen, Nakay in komapkap sa kangay lambong?
[31] Kalbas siyabi in kansiyo mga agadar keyen, Kaimo piyagngitan kao piyagliget in karowan, kalbas kaimo kay piyagsabi keyen nakay in komapkap sa kaimo?
[32] Kalbas siyo manriwa sa balabaan, agpamangkit no nakay in komapkap sa kansiyo.
[33] In kagbaiyan katawan in mibaloy sa kansiyo, matang siyo pasabangen agkalimo anggan agtagelgey, maloba wano paselang kay Isos, agsabi sa kansiyo in boo mibaloy.
[34] Kalbas Isos keyen, Laki, kaya kao maal wa, angkataw kao agpasandig sa kangay. Maal wa kao panaw apyaan, kao maal wa ngani sa kaimo maskit.
[35] In Isos agiplaongan kay apo mga rateng batang sa balay Airo, agsabi keyen, Matay wa in kaimo bodang. Ayaw wa agabaraen in Agpamatoldo.
[36] Kamay Isos yewed maniwala sa kansiro siyabi, no yewed siyo miplaong sa poon keyen, Ayaw agkalimo, agpasandig ngaro sa kangay.
[37] Kalbas Isos panaw wakay. Siyo yewed pomayag miyanggat in mga mangyan no yewed Pidro waget, osai tayari Santiyago.
[38] Paka siro rateng sa balay Airo, Isos karengey in agkagolo in mga mangyan, agpalpanangis lakoy anggan.
[39] Paka Isos misoroy, kansiyo siyabi sa kansiro keyen, Nakay batang kamo agkagolo wa labi agpalpanangis kataw ina? In bodang yewed matay, agesek waget.
[40] Kamay siyo kansiro piyagpatawaan. Kamay siro boo piyamalabo Isos. In kansiyo waget piyaanggat in mga koyay in bodang, osai in kansiyo tolo ka agadar, misoroy sa pagibolalangan in bodang.
[41] Kalbas kansiyo yaatang in bakwaw in bodang, siyabi keyen, Talita komi, in beet siyabi keyen, Lale, kao mamarengey sa kangay. Miyorog wa kao.
[42] Kalbas toloy wa miyorog in kagbaiyante, agipanawan wakay. Siyo labing dowai wa ka dagon. Kalbas siro boo maloba agsoyo.
[43] Kalbas Isos maloba agbilin sa kansiro keyen, Ayaw agbaritaen in kangay piyangwat kamayba kay nakay. Kalbas kansiyo siyogo keyen, In bodang pakanen pamangnen.