[1] Isos lompot wa sa balay lakoy Diyos, batay wa agipanaw. Pasabangen in kansiyo mga agadar keyen, Kao mangkit in kalakoyen in balay lakoy Diyos.
[2] Kamay keyen Isos, Kanyo mana piyagngitan ina pag balay lakoy Diyos? Kangay piyagsabi sa kanyo, dogayan ina boo batay piyagpanligan, idapo wa batay mitera bato agisapaw sa kansiyo pagaponan bato.
[3] In kora Isos agtokkaw wa sa boksor Olibowan, idapo asin in roma mangyan, in mga agadar agtanong wakay keyen, Nangkadogay batay mibaloy in kaimo karai siyabi? Nakay in tandaan no kao bangen wa batay rateng, osai in batay wa kalobosan kobat?
[4] Keyen Isos, Kamo agingat, karam kamo batay piyadaya mangyan.
[5] Angkataw aronaw in batay agrateng agalapet kangay ngaran keyen siro wa in Kiristo. Aronaw in kansiro batay liibangaw.
[6] Kamo batay karengey agaleng mga aggira, osai mga barita apo gira. Na kamo ayaw ngani alimowan, angkataw ina boo kailangan ngani mibaloy, kamay yewed kay ina in kalobosan.
[7] Angkataw batay apo aggira in osai ka bansa aglaban sa osai ka bansa, in osai ka sakopan aglaban sa osai ka sakopan. Apo batay agkayawes, osai batay agloni sa kalaati pag mga kobat.
[8] Ina pag mga kataw ina parakayan waget in mga kaidapan, kataw in mga kagbaiyan agparakay agboslot.
[9] Ina pag mga betek kamo batay piyagkairisan boo mangyan panawen kamo sa kangay, osai kamo batay piyagdakep, piyagpaidapan, kalbas piyagbono wa.
[10] No kataw wa ina na aronaw wa in batay omempet, idwa agpaniwala, kalbas batay agpalsikairisan, in osai batay agpatoldo wakay sa osai sa mga batay agbono.
[11] Aronaw in batay lomwas bosliyen pag mga poropita. Aronaw in kansiro batay liibangaw.
[12] Panawen sa agarabang wa in daet batay makorang wano in agpaybelagan.
[13] Kamay no siyo agaway agpaniwala anggan sa kalobosan, na siyo ngani batay piyaboway.
[14] In Maal pag Barita batay biyaba sa boo kobat, matang atawanan in boo mangyan keyen in Diyos agpapoon. Paka kataw ina wa agrateng wa in kalobosan.
[15] Kanyo batay ngiitan agitaydek sa betek tiyalaga sa Diyos in makasoka sa Diyos, in agpansida, in siyabi wa Danil in poropita. In beet siyabi ina remremen in agbasa.
[16] No kataw wa ina na in mga mangyan sa Odiya domalagan wa pataboy sa mga boksor.
[17] No siyo sa paltawan na ayaw wa misoroy sa galem balay, matang komwa in mga kamayba nakay sa balay.
[18] No siyo sa agay, na ayaw wa moli matang komwa kansiyo islen.
[19] Asina pag mga ibeng ayawte wa in mga bonting, osai in mga agpasoso.
[20] Panawen sa agdalagan, kanyo dalanginen ayaw mipabetek sa pangodan, ayaw din sa Ibeng Pamainga.
[21] Angkataw asin pag mga betek batay maloba wano in kaidapan. Ibat in piyangwat in kobat anggan ngona idapo kay batang kaidapan kaloba ina, kalbas kamayba nangkadogay idapo wa din batay kaloba ina.
[22] No ina pag kabetek yewed piyakadogayte Diyos na idapo batay mangyan piyaboway. Kamay panawen sa mga iidang Diyos batay ngani piyakadogayte ina pag kabetek.
[23] Asina pag betek no apo agsabi sa kanyo keyen, Anda wa in Kiristo, no yewed keyen, Siyo asin wa, na kamo ayaw maniwala.
[24] Angkataw apo batay lomwas mga agpakagwali waget Kiristo, mga bosliyen pag mga poropita. Siro batay agpangwat mga makasoyo wano pag mga tanda, matang liibangaw no mayadi kamayba in mga iidang Diyos.
[25] Kanyo remremen, ina yewed kay mibaloy kangay wa siyabi sa kanyo.
[26] Na no apo agsabi sa kanyo keyen, Baati siyo sa moyod wa, na kamo ayaw ista pataboy. Kamayba siro keyen, Siyo sa galem wa balay, na kamo ayaw wano maniwala.
[27] Angkataw in agrateng in Bodang Mangyan bigla kataw kilat piyagngitan sa paglowasan ibeng anggan sa paglabowan ibeng.
[28] Kamayba saano in apo agibolalang matay, na batay asin matipon in mga owak.
[29] Paka kalbas ina pag mga kaidapan, in ibeng batay toloy komelep, kadayo in bolan idwa din agrawa, kadayo din in mga magirem sa langit agpangaragrag wa, osai piyagyogyog wa in mga apo kabaloyan sa mga ogbos.
[30] Kalbas toloy lomwas sa langit in tandaan in Bodang Mangyan. In boo mga mangyan sa boo kobat batay wa malpanangis, angkataw kansiro wa piyagngitan in Bodang Mangyan sa mga libo, agrateng wa ngani, apo lakoy kansiyo kabaloyan, piyagngitan wa in kansiyo kalakoyen.
[31] Agana lakoy in bodyong. Kansiyo piyagsogo kansiyo mga angil sa boo kobat, matang piyagtipon kansiyo mga iidang batang sa boo wano kobat.
[32] Kanyo remremen in alimbawa in yangaw igos. No agpandaon wakay in mga sanga, na kanyo atawanan agkaboka wakay in pangibeng.
[33] Na kataw din ina no kanyo piyagngitan agpangibaloy wa ina pag boo, na kanyo wa atawanan bangen wa in kabetek in Bodang Mangyan batay agrateng.
[34] Remremen kamo, bayo matay in boo mga mangyan agkaboway ngona, ina pag boo batay wa mibaloy.
[35] Batay maidapo in langit osai in kobat, kamay in kangay mga siyabi idbatay maidapo.
[36] Ina pag kabetek idapo batay katawan, kamayba in mga angil sa langit, kamayba ako in Bodang. Dayem in Amang, siyo waget in katawan.
[37] In kabetek agrateng in Bodang Mangyan kataw daan tangona in kabetek kora Nowi.
[38] Ina tangona in idapo kay in gonaw in mga mangyan apyaan agpalpamangan, agpalpanginem, agpalpamangkit babai mga lalaki, anggan rateng in ibeng Nowi somakay wa sa kansiyo bangka lakoy.
[39] In mga mangyan apyaan daan, bayo katawan bongkalos wa lakoy siro boo malimes wa. Na kataw din ina in batay mibaloy dogayan sa agrateng in Bodang Mangyan.
[40] Asina pag betek apo dokalaki sa agay, in osai piyagpaanggat, in osai biyaliwan.
[41] Apo din dokabai agbayo, in osai piyagpaanggat, in osai biyaliwan.
[42] Na kamo agdamay ngani, angkataw yewed kanyo atawanan no nakay pag betek in kanyo Kapwan batay atai.
[43] Remremen anda. No nges in kapwan balay katawan no nangkadogay betek sa yabi batay rateng in agpanakaw, na siyo agdamay wa ngani, idbatay kansiyo piyabayaan iisoroy in kansiyo balay.
[44] Na kailangan din kamo baatte sandata angkataw in Bodang Mangyan batay rateng sa betek yewed kanyo piyagremrem.
[45] In katawanan pag sogowan in yewed aglimbang, siyo in piyagpapoon kansiyo kapwan sa kansiyo mga sogowan, siyo wa in agtaboy in kansiro pamangnen sa baatte kabetek.
[46] No ina pag sogowan aratengan in kansiyo kapwan agpangwat kansiyo panawen na siyo batay agkaanggay.
[47] Kangay piyagsabi sa kanyo ina pag sogowan, in boo sa kapwan batay piyagpaalapet sa kansiyo.
[48] Kamay no daeten ina pag sogowan, no kansiyo remrem keyen dogay kay in agrateng kansiyo kapwan,
[49] no kansiyo wa piyagpaidapan in amat pag mga sogowan, osai agyanggat sa mga agpanlasing, agpalpamangan, agpalpamarik,
[50] na in kansiyo kapwan batay rateng sa kabetek yewed kansiyo piyagremrem.
[51] Kalbas ina pag sogowan batay maloba wano piyagparosa, siyo piyagpaagem wa sa parosa in mga agpakagwali waget agpaniwala. Ista siyo batay agpanangis wa gayed anggan agtogait in mga ngipen.