[1] Ina daan pag ibeng Isos lompot sa balay, tomokkaw sa balabaan dagatte.
[2] Kalbas siyo tiiponan in bonton wano pag mga mangyan, matang siyo somakay sa osai ka bangka, asin siyo tomokkaw. Sa balabaan wakay dagatte agpalpantaydek in mga mangyan.
[3] Kalbas siro kansiyo piyatoldo aronaw sa mga alimbawa keyen, Apo osai ka mangyan panaw batay agsabog bini.
[4] In siyo agsabog apo bini maragrag sa dalan. Rateng in mga bantog, ina pag bini kiyoman.
[5] Apo wakay bini maragrag sa batowen, kamay asin yewed matekba in diya. Ina pag bini toloy mitalo angkataw yewed matekba in diya.
[6] Kamay paka mabwat wa in ibeng ina aibengan, malayo, kataw korangte in dalig.
[7] Apo wakay bini maragrag sa lalosenan. Mistobo in lalosen, kiyopot wa in togda.
[8] Apo din bini maragrag sa maalno pag diya, ina manggalem. Apo sangdaan ka beter baatte osai ka poon, apo wakay animnapo, apo din tatlompo.
[9] In apo talinga mamarengey wa.
[10] In mga agadar agpasabangen kay Isos agtanong keyen, In kao agpatoldo sa kansiro nakay batang sa mga alimbawa?
[11] Siyo keyen, In mga tangona piyagbetang panawen sa Diyos agpapoon piyagpalowas wa sa kanyo, kamay yewed maal sa kansiro agbangen.
[12] Angkataw in apo na piyagpakan kay, anggan karowan wa gayed. Kamay in idapo na piyagkowa wakay in kansiyo remrem kansiyo.
[13] Kaya sa mga alimbawa ako agiplaong sa kansiro panawen kamayba siro agpangkit yewed kangitan, kamayba siro agparengey yewed karengey, yewed katawan.
[14] Mangibaloy wa sa kansiro in siyabi Isaiyas batang sa Diyos keyen, Kamo batay agparengey agpa rengey kamay idbatay din katawan. Kamo batay agpangkit agpangkit kamay idbatay din kangitan.
[15] Angkataw anda pag mga mangyan idbatay katawan. In kansiro talinga bingi wa, in kansiro mga mata pesekan wa. No yewed kataw ina, na kansiro mata batay kangitan, kansiro talinga batay karengey, osai in kansiro remrem batay katawan. Na siro batay wakay moli sa kangay, matang kangay batay piyaoraw.
[16] Kamay kamo agbangen agkaanggay angkataw in kanyo mga mata kangitan wa osai in kanyo mga talinga karengey wa.
[17] Kangay piyagsabi sa kanyo keyen, Bonton in mga poropita osai mga maalno pag mangyan in agkabeet kangitan sa kanyo piyagngitan, kamay yewed kansiro ngiitan. Osai beet karengey in kanyo piyagparengey kamay yewed kansiro arengeyan.
[18] Kanyo wa pamarengeyen in beet siyabi in alimbawa in agsabog bini.
[19] In mangyan agparengey sa barita panawen sa sakopan Diyos kamay no yewed kansiyo atawanan in beet siyabi, na siyo kataw in bini mipasabog sa dalan. Rateng in dimonyo, yaagaw in mipabalay sa kansiyo remrem.
[20] In bini mipasabog sa batowen, ina in alimbawa sa agparengey sa agiplaong Diyos, kalbas toloy agkaanggay sa barita.
[21] Kamay idwa kansiyo piyagremrem matang kadogayte waget siyo agpaniwala. Paka rateng wa in mga kaidapan, mga agpangolok, siyo toloy wa omempet.
[22] In mipasabog sa lalosenan, ina alimbawa sa agparengey sa barita, kamay siyo agkariyaban sa mga nakayte atai sa kobat, osai agkasadapan sa mga kasangkapan, kalbas in barita aligetan wa sa kansiyo remrem idwa manggalem.
[23] In mipasabog sa maalno pag diya, ina in alimbawa sa agparengey sa barita, siyo katawan in beet siyabi, kalbas siyo agpanggalem. Apo manggalem sangdaan, apo din animnapo, apo din tatlompo.
[24] Isos apo wakay alimbawa siyabi sa kansiro keyen, In agpapoon in Diyos kataw anda. Apo osai ka mangyan agsabog sa kansiyo agay in maalno pag bini.
[25] Kamay paka yabi wa agesek wa in mga mangyan, rateng in kansiyo kaaway, in kansiyo panogdaan siyabogan wakay lalosen, in bolos kagwali in togda. Panaw wakay in kaaway.
[26] Moslod in bini. Paka labasan wa bayo ngiitan din in lalosen.
[27] Pasabangen wa sa kapwan agay in kansiyo mga sogowan. Siro keyen, Laki, yewed mana maal in kaimo bini siyabog? Na nakay batang apo lalosen?
[28] Siyo keyen, Osai ka kaaway in agpangwat ina. In mga sogowan keyen, Kaimo lames beet kanyam gaboten in mga lalosen?
[29] Siyo keyen, Ayaw. Karam kadayo in togda kanyo magabot.
[30] Bayansiyo wa malageman anggan tagani. Kangay piyagsabi sa mga agani keyen, Tokaw kowaen in mga lalosen, kanyo bekkesen matang sonogen. Kalbas in togda tiponen sa kangay banglin.
[31] Giisod wakay Isos in osai ka alimbawa keyen, In agpapoon in Diyos kataw osai ka bisloy tiyogda osai ka mangyan sa kansiyo kobat.
[32] Ina pag bini kalakoyte wa gayed sa boo bini, kamay paka mitogda kadogay mistobo ina in lakonaw lakoy sa boo togda, mibaloy poon lakoy yangaw, pagpangaponan mga bantog in kansiyo mga sanga.
[33] Kansiyo giisod in osai wakay ka alimbawa keyen, In agpapoon in Diyos kataw in pamaistobo tinapay piyaagem osai ka kagbaiyan sa osai ka galang arina, kadogay ina boo mistobo.
[34] Ina pag boo siyabi Isos sa mga alimbawa. Siyo idapo siyabi sa mga mangyan no yewed sa mga alimbawa.
[35] Na mibaloy wa in siyabi in poropita keyen, Sa mga alimbawa ako batay miplaong sa kansiro. In mga agibetang ibat piyangwat in kobat kangay batay piyagsabi sa kansiro.
[36] Kalbas kay Isos biyaliwan in mga mangyan, monaik sa balay. Pasabangen sa kansiyo in kansiyo mga agadar. Kansiro siyabi keyen, Patoldowen sa kanyam in beet siyabi in alimbawa in lalosen sa agay.
[37] Isos keyen, In agsabog in maalno pag bini na ina ako in Bodang Mangyan.
[38] In agay ina in boo kobat. In maal pag bini ina in mga mangyan piyagsakop Diyos, in lalosen ina in mga mangyan piyagsakopan dimonyo.
[39] In kaaway in agsabog in lalosen ina in dimonyo wa daan. In tagani in kalobosan kobat. Osai in mga agani in mga angil.
[40] No nangkataw in lalosen piyagtipon osai piyagtebed, na kataw din ina in batay mibaloy sa kalobosan kobat.
[41] Batay piyagsogo ako in Bodang Mangyan in kangay mga angil matang kowaen sa kangay pagsakopan in boo dailan kaya in mga mangyan agpangwat daet, osai in boo agpamangwat daet.
[42] Ina kansiro batay biyenglay sa timbonan lakoy baya. Ista siro batay agpanangis lakoy anggan agpaldeet in kansiro mga ngipen.
[43] No kataw ina in mga bodang Diyos batay agrawa kataw ibeng sa sakopan in kansiro Amang. No kamo in apo talinga, na mamarengey wa.
[44] In agpapoon in Diyos kataw in kowarta lakoy biyenben sa osai ka kobat. Ina ngiitan osai ka mangyan, kadogay kansiyo wakay biyenben. Siyo agkaanggay wano, moli wakay sa balay, piyabili in boo sa kansiyo, kalbas biili in kobat pagbetangan in kowarta.
[45] In agpapoon in Diyos kataw wakay sa osai ka agpanlako, siyo agpamangkit bogway.
[46] Paka siyo kangitan osai ka bogway makaamag wano, siyo panaw wa, piyabili in boo sa kansiyo, kalbas biili ina pag bogway.
[47] In agpapoon in Diyos kataw wakay in osai ka pangkabel isda, piyalabo sa dagatte, karowan in abel isda.
[48] Paka makno wa giyoyod wakay sa balabaan dagatte. In mga kapwan malpanokkaw matang idangen in mga isda. In mga maalen kansiro tiipon sa mga pagsoroyan, kamay biyenglay wa in mga yewed maalen.
[49] Kataw ina in batay mipangwat sa kalobosan kobat. Batay agrateng in mga angil, in mga agpamangwat daet piyagpasoway sa mga maal pag mangyan.
[50] Kalbas in mga agpamangwat daet piyagbenglay sa agigang lakoy pag timbon. Ista siro batay agpanangis lakoy anggan agpaldeet in mga ngipen.
[51] Keyen Isos, Ina pag boo kanyo lames atawanan? Siro keyen, Aon.
[52] Kalbas kansiyo siyabi sa kansiro keyen, Kaya ngani in baatte agpatoldo in mga Batas, no siyo mibaloy wa bodang Diyos, na siyo kataw in osai ka kapwan agpalowas mga bayo kay osai in mga datiyan wa batang sa kansiyo pagbetangan.
[53] Paka Isos kalbas wa agsabi ina pag mga alimbawa siyo panaw wa asin,
[54] moli sa kansiyo bayan Nasarit. Kalbas siyo agpatoldo sa kansiro balay pagpaniponan. Agsoyo in mga karengey sa kansiyo. Siro keyen, Saano batang in atawanan ina pag lalaki, osai in kansiyo kabaloyan mamangwat in mga makasoyo?
[55] Yewed mana siyo in bodang in agpamangwat balay? Yewed mana Mariya in kansiyo inang, osai kora Santiyago, Osi, Simon, osai Odas in kansiyo mga ariyan?
[56] Yewed mana atai agbalay in kansiyo mga ariyan kagbaiyan? Na saano kansiyo atawanan ina pag boo?
[57] Kalbas daeten wa in kansiro remrem sa kansiyo. Kalbas siyabi Isos sa kansiro keyen, In Poropita piyagmaal kamaybawa saano, ayaw ngaro sa kansiyo sadiri kobat, osai sa kansiyo sadiri kabelagan.
[58] In kay Isos mga piyangwat makasoyo asin yewed karowan panawen siro yewed agpasandig sa kansiyo.