[1] Kora Isos bangen wa sa Irosalim. In siro rateng sa bayante Bitpagi, sa boksor Olibowan, piyatokaw Isos in dowai ka agadar,
[2] keyen, Kamo pataboy ista pag bayante, kanyo toloy batay ngiitan piyageket osai ka asno agyanggat kansiyo bodang. Kanyo lowaten, atai babaen sa kangay.
[3] No apo miplaong sa kanyo na keyen, Piyagkailangan in Kapwan. Na toloy piyagpababa.
[4] Kaya kataw ina matang mibaloy in siyabi in poropita keyen,
[5] Kanyo sabiyen sa mga mangyan sa bayan lakoy Siyon keyen, Baati, anda wa in kanyo Poon Lakoy agpakabwatte remrem, agsakay sa asno, sa bodang asno.
[6] Panaw in dowai ka agadar. Kansiro piyangwat in siyabi Isos.
[7] Biyaba siro in asno, kadayo in bodang. In kansiro islen piyadamig sa awak mga asno. Isos somakay wa.
[8] Aronaw mangyan agpadamig kansiro islen sa kansiyo batay dalan. In amat agdodo wa sanga yangaw, piyabolalang sa dalan.
[9] Agpalpangowan in mga mangyan sa tokawan, kadayo in sa paoriyan keyen, Pagmaalen in Kasokponan Dabid. Pakalakonawen in agrateng agbaba in kabaloyan in Kapwan. Pagmaalen in Diyos sa ogbos.
[10] Paka Isos misoroy sa bayan lakoy Irosalim in boo mangyan agkagolo. Siro agpaypolongan keyen, Nakay lames pag mangyan ina?
[11] Keyen wakay in karowan, Ina Isos in poropita taga Nasarit, sa Galiliya.
[12] Isos misoroy sa balay lakoy Diyos. Kansiyo piyamoyaw in boo mga agpamabili asin, kadayo in mga agbili. Kansiyo din piyanligan in mga lamisa in mga agpamariya kowarta, kadayo in pagpanokkawan in mga agpamabili bantog kalapati.
[13] Kansiyo siyabi keyen, In siyabi sa mga Agisolat keyen, Keyen in Diyos, Batay piyagawit balay pagpandalanginan in kangay balay. Ina in siyabi, kamay anda pag balay kanyo piyagpangwat pagpatagowan mga agpanakaw.
[14] Pasabangen kay Isos sa balay lakoy Diyos in mga beleg osai pilay. Siro kansiyo piyaoraw.
[15] In mga poon sasirdoti osai in mga agpatoldo in mga Batas, siro kangitan sa mga makasoyo pag piyagpangwat Isos. Osai karengey sa mga bodang pangowan sa galem balay lakoy Diyos keyen, Pagmaalen in Kasokponan Dabid. Kalbas ina pag mga poon agkagalit wa.
[16] Kalbas siro keyen kay Isos, Kaimo lames arengeyan in piyagsabi ina pag mga bodang? Keyen Isos, Aon. Nakay ina, yewed kay mana kanyo biyasa in piyagsabi sa mga Agisolat keyen, In mga bodangte, osai in mga agpanoso kay kaimo piyatoldo agmaal gayed?
[17] Isos panaw wa asin, lampas wa sa bayan lakoy, pataboy wa sa bayante Bitanya, mesek wa asin.
[18] Paka omaga in Isos agoli wakay sa bayan lakoy siyo agkayawes.
[19] Siyo kangitan sa balabaan dalan osai ka yangaw piyagawit igos. Paka siyo rateng asin siyo idapo kangitan galem, mga daon waget. Kalbas kansiyo siyabi sa poon igos keyen, Kamayba nangkadogay kao idbatay wa manggalem. Toloy wa matonga in poon igos.
[20] Ina ngiitan in mga agadar, siro agsoyo wano, keyen, Nangkataw toloy matonga ina pag igos?
[21] Keyen Isos, Totoo in kangay piyagsabi, no kanyo remrem yewed piyagbaslag agpasandig sa Diyos, na in kangay piyangwat sa poon igos kanyo din batay apangwat. Yewed waget ina. No kanyo siyabi asin pag boksor keyen, Kao bali wa asin, palabo wa sa dagat, na batay mibaloy in kanyo siyabi.
[22] Osai no kamo agpasandig sa Diyos na kamo batay piyakan kamayba nakay in kanyo piyagayay sa kanyo pandalangin.
[23] Isos misoroy wakay sa balay lakoy Diyos. In siyo agpatoldo in mga poon sasirdoti pasabangen sa kansiyo osai in mga koyay sa mga mangyan. Siro keyen, Nakay in kaimo kabaloyan agpangwat ina pag mga kataw ina? Nakay in agsogo sa kaimo?
[24] Keyen Isos, Ako apo din tanong sa kanyo. No isag anda kanyo siyagot na kangay din piyagsabi sa kanyo no nakay in kangay kabaloyan agpangwat ina.
[25] In Owan agbaotismo, nakay in agsogo sa kansiyo, no in Diyos, no in mga mangyan? Siro wakayte agpaypolongan keyen, No kitam keyen, In Diyos, na isag siyo keyen, Na nakay batang kamo yewed maniwala kay Owan?
[26] Kamay no kitam keyen, In mangyan, ai, makalimo in mga mangyan angkataw siro boo katawan keyen Owan osai ka poropita.
[27] Matang kansiro siyabi kay Isos keyen, Kami yewed katawan. Kansiyo wakay siyabi keyen, Na idbatay din kangay siyabi sa kanyo no nakay in agsogo sa kangay agpangwat.
[28] Keyen Isos, Nakay in kanyo remrem? Osai ka mangyan apo bodang dowai ka kaliyakiyan. In amang pasabangen sa panganay keyen, Laki, ngona pag ibeng kao agpanawen sa agay.
[29] Siyo keyen, Dayo. Kalbas yaalis wakay kansiyo remrem, siyo ista wa pataboy.
[30] Pasabangen wakay in amang sa osai, ina din in kansiyo siyabi. In bodang keyen, Aon, laki. Kamay yewed ista pataboy.
[31] Na nakay in kanyo remrem asin pag dowai? Nakay agbangen in agpangwat in beet kansiyo amang? Siro keyen, In panganay agbangen. Kalbas keyen Isos, Kangay piyagsabi sa kanyo in mga agpaningil bowis, osai in aleleng pag mga kagbaiyan batay pasakop sa kabaloyan Diyos tokaw kay sa kanyo.
[32] Angkataw atai rateng Owan agpatoldo sa kanyo in maal pag ogali, kamay kamo yewed maniwala sa kansiyo. In mga agpaningil bowis maniwala sa kansiyo, osai in aleleng pag mga kagbaiyan. Kamaybawa ina kanyo ngiitan yewed kay din kamo agbenglay in kanyo daet agpaniwala kay Owan.
[33] Keyen Isos, Anda in osai ka alimbawa. Apo osai ka mangyan manogda sa kansiyo alamanan mga balagen piyagawit obas. Kansiyo yaalabat, kansiyo piyangwat pesaan raweg, tiyadyok in paltawan pagdamayan. Kalbas kansiyo wa piyaalapet sa mga mangyan. Kalbas siyo pataboy wa sa adayonaw pag kobat.
[34] Paka kaobasen wa, kansiyo piyataboy ista in kansiyo mga sogowan keyen ayayen sa mga agalapet in kansiyo bagiyan.
[35] Kamay in mga sogowan yaatang in mga agalapet. In osai biyogbog wa, in kadowai biyono wa, in katolo biyenglayan wa bato.
[36] Siyogo kay in kapwan in aronaw kay sogowan, kamay kataw daan in piyangwat in mga agalapet.
[37] In paori wa piyataboy ista in kansiyo bodang kaliyakiyan. In remrem keyen, Siro idbatay mangaas aglaban sa kangay bodang.
[38] Kamay paka in bodang ngiitan wa in mga agalapet, siro maypolongan keyen, Anda wa dogayan in batay kapwan. Kantam wa bonowen. Kalbas in batay nges kansiyo kantam wa.
[39] Kalbas siyo yaatang wa, giyoyod sa awak alabat, biyono wa.
[40] Keyen Isos, Na paka rateng in kapwan, nakay lames in maal kansiyo batay piyangwat asin pag mga agalapet obasan?
[41] Keyen in mga mangyan, Ina pag mga aleleng kansiyo batay piyagripor. In obasan batay wakay piyagpaalapet sa mga amat, sa batay agtaboy kansiyo bagiyan.
[42] Keyen Isos, Kanyo ngani mabasa sa mga Agisolat keyen, In bato in piyangidangan in mga agtadyok balay, na siyo wa in mibaloy in lakonaw sa boo. In Kapwan in agpangwat ina. Ina makasoyo sa kantam.
[43] Na kangay ngani piyagsabi, idwa sa kanyo in sakopan Diyos. Batay wa piyagtaboy sa mga mangyan batay agtaboy in raweg.
[45] In mga poon sasirdoti osai in mga Parisiyo karengey in kay Isos mga kowinto. Kalbas kansiro atawanan siro in piyagtamaan.
[46] Siyo nges diyakep siro, kamay siro agkalimo sa mga mangyan angkataw atawanan in mga mangyan Isos poropita.