[1] Kamo mga kapwan, pangwaten in betek sa kanyo mga sogowan, ayaw agdamot panawen, angkataw kamo din apo Kapwan sa langit.
[2] Ayaw agempet agpandalangin, ayaw agkaesek, palagi agkaanggay.
[3] Kami din dalanginen matang kami pakanen Diyos kabetek agpabarita in kansiyo agiplaong, matang kanyam piyagpalowas in batang piyagbetang panawen kay Kiristo. Kaya ako piyagbilanggo panawen ina in kangay piyagbarita.
[4] Dayem nges kangay ngani piyagpalowas gayed, angkataw ina in piyagkailangan sa kangay.
[5] Pakamaalen in kantam piyagpapangkit sa mga yewed agpaniwala. Ayaw agsidaen in kabetek.
[6] Kailangan kantam barogi masadap, makaparengey. Kailangan kitam katawan somagot sa baatte osai.
[7] Tikiko in batay agbarita sa kanyo in boo panawen sa kangay. Siyo kanyam belag piyagmaal, siyo yewed aglimbang agtolong. Siyo kangay sarig sogowan in Kapwan.
[8] Kaya siyo kangay piyagsogo sa kanyo matang kanyo atawanan no kataw nakay wa ako, osai matang piyakaeyat kanyo remrem.
[9] Kansiyo sarig Onisimo kantam din belag piyagmaal, yewed aglimbang. Siyo kanyo din kabelagan. Siro in batay agpaalam sa kanyo in boo atai mibaloy.
[10] -
[11] Osai Aristarko in kangay sarig sa bilanggowan, osai Markos kay Birnabi pingsan, siro keyen, Kamo kagwali wa nakay? Kadayo Oswi in piyagawit Osto. Sa mga Odyo kay Kiristo wa siro waget pag tolo in mga Odyo in agtolong sa kangay agpabarita in Diyos agpapoon. Siro agpakaeyat kangay remrem. Panawen kay Markos ako apo wa piyatokaw bilin sa kanyo. No siyo asin pataboy sa kanyo, na kanyo pabelagen.
[12] Kadayo din Ipapras agsabi keyen, Kamo nangkataw wa? Siyo kanyo din kabelagan, sogowan Kiristo Isos. Baatte siyo agpilit agpandalangin matang kamo marigen, gorangen wa sa paniwala, agpaniwala sa boo beet Diyos.
[13] Kangay ngiitan siyo agpilit agtolong sa kanyo, kadayo sa mga taga bayan Laodisya osai taga bayan Irapolis.
[14] Osai din Lokas in kantam piyagmaal pag agpanggamot, osai Dimas. Siro boo keyen, Nakay, idapo kamay nakay sa kanyo?
[15] Kanyo sabiyen sa kantam mga belag sa Laodisya keyen siro kanyam piyagpandalangin. Kadayo Nimpa, osai in barkadaan mga bodang Diyos in agsamba sa kansiyo balay.
[16] Paka kanyo wa mabasa anda pag solat, na kanyo pabasaen din sa barkadaan mga bodang Diyos sa Laodisya. Osai in kangay solat sa mga taga Laodisya kanyo din basaen.
[17] Sabiyen kay Arkipo keyen, siyo ayaw agempet sa panawen in Kapwan in tiyaboy sa kansiyo.
[18] Ako Pablo wa daan in agsolat anda pag keyen, Kamo nangkataw wa? Remremen in kangay eket karakara. Kamo pakayawteen in Diyos.