[1] In kangay beet kanyo atawanan in kalakoyen in ako agpilit panawen sa kanyo, osai sa mga taga Laodisya, kadayo sa boo mga ikkay katawan sa kangay.
[2] In kangay beet maeyat kanyo remrem, matang kamo boo malageman agpaybelagan. No kataw ina kamo katawan wa gayed, kamo mayaman sa atawanan. Na kamo batay katawan in batang piyagbetang Diyos, ina ngani Kiristo.
[3] Ina pag kayamanan, in boo katawanan osai in atawanan, agibalay sa kansiyo.
[4] Ina kangay piyagsabi sa kanyo matang kamo idbatay piyabaribid in roma kamayba nakay pag mga baritaen kagwali maalen.
[5] Kamayba ako idapo asin sa kanyo na ako agremrem daan sa kanyo. Ako agkaanggay sa kanyo maalen pag ogali, osai sa kanyo marigen pag agpasandig kay Kiristo.
[6] Kataw kantam tiyanggap Kiristo Isos matang kantam Kapwan, na kitam wa agogali kataw siyo.
[7] Kitam wa miskapet sa kansiyo, pasandig sa kansiyo in kantam boway. Pakarigenen in kantam paniwala sa piyatoldo sa kantam, osai palagi agkaanggay sa Diyos.
[8] Kitam agingat wa, karam kitam abel in mga bosliyen pag agpatoldo idapo kabolowan, in yewed agpasandig kay Kiristo, no yewed sa siyabi tangona kay naw in mga kakoyayan, osai in mga yewed piyagngitan pag apo kabaloyan atai sa kobat.
[9] Angkataw in kabetek Kiristo mibaloy mangyan, na in boo sa Diyos sa kansiyo daan.
[10] Kalbas in kitam agiyagem sa kansiyo na kitam piyaboway wa gayed. Sakop sa kansiyo in boo apo kabaloyan, in boo mga poon yewed piyagngitan.
[11] Panawen kitam agiyagem kay Kiristo kitam kagwali kansiyo wa tiyoli yewed kataw in sa bilog. In beet siyabi in makadaet pag piyagkaamag kantam bilog biyenglay wa.
[12] In kitam biyaotismowan kitam kagwali liyebeng sarig siyo, kalbas boway wakay sarig din siyo, angkataw kitam agpasandig sa kabaloyan Diyos in agpaboway wakay sa kansiyo.
[13] Kamo in mga yewed Odyo tangona kagwali matay wa panawen sa kanyo mga daet, osai panawen kamo idapo in batas keyen patoli, kamay ngona kamo piyaboway wakay Diyos sarig Kiristo. Kansiyo wa liibangaw in kantam mga daet.
[14] Kansiyo wa piyaidapo kabolowan in listaan kantam daet in agpatotoo kitam agsonggar sa mga Batas. Ina kansiyo kiyowa, piyako wa sa kodos matang idapo wa.
[15] In Kiristo matay sa kodos kansiyo diyaeg in mga mamaw, in mga apo kabaloyan sa kobat. Siro arikoyan wa angkataw ngiitan wa gayed siro sakop sa kansiyo.
[16] Na ayaw kitam pasakop sa kamayba nakay pag agpamangwat mga batas panawen sa pamangnen, osai sa aginem, sa kainan, sa pangabos bolan, osai ibeng agpainga.
[17] Ina pag mga kataw ina anong waget in mga agrateng. Ina pag aganong Kiristo wa.
[18] Apo mga mangyan keyen kailangan agpakaskit sa bilog, osai agsamba sa mga angil. Siro agpakabwat remrem keyen agpanaynep, kamay siro agyabang waget. Na ayaw agpasakop sa kansiro matang yewed malibangaw in kantam batay bayad.
[19] Siro idwa pasakop kay Kiristo. Bago siyo in olo, in boo bilog agpalpangiskapet apo mga eyat apo kalowan boo sakop sa kansiyo matang baldog. Ina in beet Diyos.
[20] Matay wa kitam sarig Kiristo, kitam idwa sakop sa mga mamaw agsakop sa kobat. Na nakay batang kamo agogali kagwali sakop kay asin. Nakay batang kamo agpasakop sa mga otos keyen,
[21] Ayaw agatang anda, ayaw agpamangan ina, ayaw komapkap ati?
[22] In mga ina otos waget piyagpatoldo mga mangyan, panawen waget sa mga agkasida.
[23] In mga kataw ina, in mga agsamba sa mga angil, osai in agpamakaskit sa bilog, ina kagwali waget apo kabolowan, kamay ina yewed kapandaeg sa kantam mga bilog agkaamag aglampas sa piyagkailangan.