[1] Kami kora Pablo, Silas osai Timotiyo in agsolat sa kanyo sa barkadaan mga bodang Diyos sa Tisalonika, sa mga iidang Diyos Amang osai IsoKiristo in Kapwan sa boo. Kanyam pandalangin kamo pakayawteen lakoy osai pakanen apyaan pag remrem.
[2] Kami baatte agkaanggay sa Diyos panawen sa kanyo boo. Kamo baatte kanyam piyagawit sa kanyam mga pandalangin.
[3] Kami agkaanggay sa Diyos kantam Amang angkataw in kamo agpaniwala kay Kiristo piyagngitan sa kanyo mga maal pag panawen, osai in kamo agpakayawte sa mga amat, anggan kamo idbatay atorayan agtolong, osai in kamo yewed aglimbang agpanaya sa kantam Kapwan IsoKiristo.
[4] Laki mga belag, kamo piyagpakayawte Diyos. Kanyam atawanan kamo kansiyo iidang.
[5] In kami asin sa kanyo, in kami agpatoldo in Maal pag Barita ina yewed waget sa mga agiplaong, dayem kadayo sa kabaloyan in Betek pag Abyan. Osai kanyam atawanan ina pag Barita totoo ngani. In kami asin kanyo ngiitan in kanyam mga ogali makamaal sa kanyo.
[6] Kalbas kamo tomolad wa sa kanyam osai sa Kapwan. Kamayba kamo piyagpaidapan panawen sa Barita, ina kanyo tiyanggap agkaanggay. Ina pag kaanggayan batang sa Betek pag Abyan.
[7] Matang kamo pagtoladan wa in boo mga agpasandig kay Kiristo sa Masidonya osai Akaya.
[8] Angkataw ibat sa kanyo in barita in Kapwan omarabang idwaget sa Masidonya osai Akaya, dayem sa boo kobat piyagbarita in kanyo paniwala sa Diyos, anggan kami idwa kailangan agsabi sa mga roma panawen ina.
[9] Angkataw in mga wakay mangyan in agbarita in kami kanyo wa gayed piyabelag, osai din in kamo agbenglay wa in mga yewed Diyos, matang kamo agpasandig wa osai agpaniwala sa totoo agkaboway pag Diyos.
[10] Siro agbarita kay din in kamo agpanaya sa kansiyo Bodang batang sa langit. Siyo Isos in tagoli wakay piyaboway, kalbas batay wakay atai matang kitam din kansiyo piyaboway sa parosa batay agrateng.