[1] Laki mga belag, kanyo atawanan in kami mamataw sa kanyo apo ngani kabolowan.
[2] Kamo katawan kamayba wa kami batang piyaglibak piyagpaidapan sa Pilipos, kanyam remrem piyakaeyat wakay Diyos matang piyatoldo din sa kanyo in Maal pag Barita Diyos kamaybawa aronaw in aglaban.
[3] Kaya kami agbarita yewed panawen kami baribid, yewed din batang sa marames pag remrem. Kami idapo din beet agpadaya.
[4] Dayem kaya kami agbarita panawen in remrem Diyos kami kansiyo piyaalapetan in Maal pag Barita. Kaya kami agpatoldo yewed mangyan in kanyam beet anggayan, dayem Diyos agbangen angkataw kansiyo piyagpangkit in kantam mga remrem.
[5] Atawanan Diyos, kanyo din atawanan, in kanyam mga agiplaong yewed kagwali waget aglakonaw sa kanyo, idapo din piyagtago agsolang sa kanyam agiplaong.
[6] Yewed kanyam beet in kami paglakonawen mangyan, kamayba kamo, kamayba nakay.
[7] Kamaybawa kami mga katiwala Kiristo, maal nges kami mangayay sa kanyo, kamay yewed kataw ina. Dayem kami agpakayawte daan sa kanyo, kataw in inang agpakayawte wano sa kansiyo mga bodangte.
[8] In kalobaen kami agpakayawte sa kanyo, anggan kami sandata agtaboy sa kanyo yewed waget in Maal pag Barita Diyos, no yewed kadayo in kanyam boway panawen kamo kanyam wano piyagmaal.
[9] Laki mga belag, kanyo kay daan atawanan in kami sa kanyo kami ageyat agpanawen. Kamayba ibeng kamayba yabi kami aganap boway matang in kami agpatoldo in Maal pag Barita Diyos kami yewed mabyat sa kanyo.
[10] Kamo kangitan sa kanyam, kadayo in Diyos, maal wano in kami agpabelag sa kanyo sa mga agpaniwala, kami betek ngani, yewed daeten.
[11] Kataw in kanyo atawanan kanyam piyagalapet in baatte osai sa kanyo kataw in amang agalapet sa kansiyo mga bodang.
[12] Kamo kanyam piyatoldo, piyakaeyat in remrem, piyaakayan gayed agogali sibay sa Diyos in omidang sa kantam matang kitam piyaagem sa kansiyo sakopan sa kansiyo din kalakoyen.
[13] Anda kay din in osai ka baatte kanyam piyagkaanggay sa Diyos, in kamo karengey in agiplaong Diyos kanyam piyatoldo, ina kanyo piyaniwalaan yewed kataw agiplaong waget mangyan, no yewed kataw ngani agiplaong Diyos, angkataw ina ngani in totoo. Kalbas in kabaloyan ina piyagngitan sa kanyo mga ogali, sa kanyo pag mga agpaniwala sa Diyos.
[14] Laki mga belag, in mga mibaloy sa kanyo kataw daan in mga mibaloy sa mga barkadaan mga bodang Diyos taga Odiya, sa mga taga ista in agiyagem kay Kiristo Isos. Kamo piyaidapan kanyo mga kabelagan kataw daan din siro piyaidapan in mga Odyo.
[15] Ina daan pag mga Odyo in agbono kay Isos in Kapwan sa boo, kadayo sa mga poropita. Siro din in agboyaw sa kanyam. Siro yewed makaanggay sa Diyos, osai siro mga aglaban sa boo mangyan.
[16] In kami agpatoldo in Maal pag Barita sa mga yewed Odyo matang siro din piyaboway, kami maloba wa gayed piyagayaw ina pag mga Odyo. Kataw ina kansiro wa gayed piyaistobo in kansiro mga daet, kalbas ngona sa kalobosan piyalowas wa Diyos in kansiyo galit sa kansiro.
[17] Laki mga belag, paka kami panaw wa sa kanyo, kamayba kamo idwa kanyam piyagngitan kamo baatte kanyam piyagremrem. Yewed kayte dogay kami panaw, kami toloy wakay agkalowayan wano sa kanyo, beet wakay maltagbowan.
[18] Kami beet wakay pataboy sa kanyo. Ako Pablo, makakarowan nges batay moli asin, kamay kami baatte piyageleg Katanas.
[19] Paka rateng wakay Isos in kantam Kapwan, kamo waget in kanyam piyagasaan in batay makaanggay sa kanyam sa adap Isos. Kamo waget in kanyam piyaglakonaw pag tanda keyen apo kabolowan in kanyam panawen.
[20] Kamo ngani in agpakalakonaw sa kanyam, in kanyam kaanggayan.