[1] Ngona ako apo piyagsabi sa mga koyay agpapoon sa kanyo. Ako din osai ka koyay kataw kamo. Kangay ngiitan in mga kaidapan Kiristo, osai batay din piyakan bagiyan sa kanyo kalakoyen batay wa piyapangkit.
[2] Kanyo alapeten in barkadaan piyaalapet Diyos sa kanyo. Kamo agpapoon sa kansiro maalno in remrem agkaanggay, ayaw sa pilit waget, angkataw ina in beet Diyos. Pangwaten in kanyo tongkolin yewed amagen sa mga kowarta no yewed sa beet agtolong.
[3] Ayaw matapang in agpapoon sa mga piyaalapet sa kanyo, dayem mabait, matang toladan in mga agpaniwala.
[4] Kalbas paka rateng wa in Mabwat pag Agalapet, na kamo batay piyakan in makasolap pag sarikaw idbatay maidapo in rawa anggan idapo kalobosan.
[5] Kamo wakay in mga kasalokoyan pag mga mangyan, kamo pasakop sa mga koyay. Kitam boo agpakabwatte remrem agpaytolongan, angkataw siyabi sa Agisolat keyen, In Diyos agkadaetan sa mga agpakabwat, kamay kansiyo piyagpakayawte in mga agpakabwatte remrem.
[6] Na kitam agpakabwatte, pasakop sa kabaloyan Diyos, matang dogayan sa kabetek kitam kansiyo batay piyakabwat.
[7] In boo kantam mga piyagkariyaban taboyen sa Diyos angkataw siyo agalapet sa kantam.
[8] Kailangan kitam sandata wa agdamay kamayba nangkadogay, angkataw in kantam kalaban in diyablo agipanawan kagwali matapang pag ayop agana lakoy agkakoman mangyan.
[9] Siyo kantam labananen. Kantam pakarigenen in agpasandig sa Diyos angkataw in kantam atawanan yewed waget kitam in piyagdalan in kataw ina pag kaidapan, dayem in boo kantam mga belag sa boo kobat.
[10] Paka kitam kadalan wa ina pag kadogayte pag kaidapan, na in Diyos, in agpakayawte wano gayed sa kantam, siyo batay agpakapya sa kantam, agpakarigen, agpakaeyat sa kantam remrem. Siyo din in omidang sa kantam matang kitam sarig Kiristo batay piyakan bagiyan sa kansiyo idapo kalobosan pag kalakoyen.
[11] Sa kansiyo in kabaloyan anggan idapo kalobosan. Ina wa ngani.
[12] Silas in tomolong sa kangay agsolat. Siyo maal pag belag sa kangay. Andate pag siyolat matang pakaeyaten in kanyo mga remrem, osai agparigen keyen ina pag boo in piyagtaboy ngani Diyos. Na kitam agpakarigen in agpasandig sa kansiyo piyagtaboy.
[13] In barkadaan mga bodang Diyos sa bayan Babilonya keyen, Kamo nangkataw wa? Kadayo Markos in kangay bodang sa agpaniwala.
[14] No kamo agkatipon na malkaanggayan. In kangay pandalangin kamo in boo mga agyanggat kay Kiristo kansiyo pakanen in apyaan pag remrem.