[1] Panawen Kiristo domalan sa kaidapan sa bilog, na kadayo din kitam agpakaeyat remrem kataw siyo, angkataw in agbanta sa kaidapan sa bilog dayo wa agpamangwat daet.
[2] Na in mga dagon batay kay kantam piyagdalan atai sa kobat taboyen sa agpangwat in makaanggay sa Diyos ayaw sa agpangwat in piyagkaamag waget kantam remrem.
[3] Sibay wa in mga dagon kantam diyalan sa agpangwat in mga piyagkasadapan in mga yewed agpaniwala sa Diyos, kataw in agpanggaraw, in mga daeten pag piyagkabeet kantam bilog, in agpanlasing, in makarikoy pag agpalkaanggayan, agpalpamarik, osai in makasoka pag agsamba sa mga yewed Diyos.
[4] Kalbas in mga yewed agpaniwala sa Diyos agsoyo no nakay batang kitam ngona idwa agyanggat sa kansiro agpamangwat kamayba nakayte pag mga daeten pag ogali, kalbas kitam kansiro piyaglibak.
[5] Kamay panawen ina siro batay piyagbotog Diyos in batay wa agosap sa mga agkaboway kadayo sa mga matay.
[6] In Maal pag Barita piyatoldo din sa mga matay matang in kansiro abyan maal din agkaboway kataw in Diyos agkaboway kamayba kansiro bilog matay kataw in boo mangyan.
[7] Bangen wa in kalobosan in boote. Kailangan kitam ayaw aglimbang agremrem maalno, matang kabaloy agpandalangin.
[8] Labi kay sa boo, agpakayawte wano sa osai osai, angkataw in agpakayawte sa roma aglibangaw sa kansiro mga daet kamayba karowan.
[9] Pakanen esekan in mga belag sa agpaniwala, ayaw mabyat in remrem.
[10] Kailangan kitam maalno pag paalapetan in mga boote piyagtaboy in Diyos. Na no nakay in tiyaboy Diyos sa baatte osai, na ina kantam alapeten sa agtolong sa mga roma.
[11] No kao in agpatoldo, na in kaimo patoldowen in agiplaong Diyos. No kao in agtolong na kaimo alapeten in kabaloyan piyagtaboy Diyos, matang sa boote siyo batay piyagmaal panawen kay IsoKiristo. Sa kansiyo in kabaloyan osai in kalakoyen anggan idapo kalobosan. Ina wa ngani.
[12] Mga belag kangay piyagmaal, ayaw agsoyo sa maloba pag kaidapan kantam piyagdalan keyen, anda osai wakay. Ina matang kitam piyagtepeng.
[13] Dayem kitam agkaanggay angkataw kitam piyagpaanggat sa kaidapan Kiristo. Kalbas paka siyo rateng wakay, lomwas wa in kansiyo kalakoyen, na kitam batay agkaanggay wano gayed.
[14] No kamo piyaglibak panawen kamo agyanggat kay Kiristo na kamo agkaanggay, angkataw in beet siyabi ina in lakonaw pag Abyan, in Abyan Diyos agbalay sa kantam.
[15] Ayaw kitam agbono mangyan, agpanakaw, agpangwat kamayba nakay pag daet, agpanlado sa idwakay kantam panawen, matang kitam idbatay piyarosaan.
[16] Kamay no kitam piyagparosaan panawen kitam agiyagem kay Kiristo na ayaw wa agkarikoy. Dayem kitam agkaanggay sa Diyos panawen piyagngitan kitam agiyagem kay Kiristo.
[17] Rateng wa in kabetek agosap. In tokaw piyagosap in mga bodang Diyos. No kitam in tokaw piyagosap na labi kay lakonaw in batay parosa sa mga yewed maniwala sa Maalno pag Barita Diyos.
[18] Kataw in siyabi sa mga Agisolat keyen, No in maal pag mga mangyan apo piyagdalan mga kaidapan in siro piyagpaboway, na labi kay lakonaw in mga kaidapan sa mga agpamangwat daet, mga yewed agremrem sa Diyos.
[19] Na in mga mangyan piyagpaidapan panawen sa agpaniwala sa beet Diyos, kailangan siro agaway kay agpangwat maal, osai paalapet sa Agpangwat sa kantam. Siyo idbatay somala sa kansiyo pangako.