[1] Na ngani, baliwanen wa in boo kanyo daet. Ayaw agsabi baribid, ayaw agpakagwali waget, ayaw agpanagiri, ayaw aglibak.
[2] Kataw in bodang bayo biyoslot agkabeet wano sa soso, na kamo kataw daan din ina kamo agkabeet in maalen pag pamangnen sa abyan, matang kamo mistobo sa kanyo paniwala anggan piyaboway wa gayed.
[3] Angkataw kanyo wa tiyepeng, kanyo atawanan in Kapwan mabait.
[4] Na kamo pasabangen sa Kapwan, siyo kataw bato agkaboway, piyaidapo wa kabolowan mangyan, kamay iidang Diyos, kansiyo piyagmaal wano.
[5] Kamo din kagwali mga bato agkaboway, na paalapet sa Abyan Diyos piyagkailangan sa balay lakoy Diyos kansiyo piyagtadyok. Asin pag balay kitam mga sasirdoti iidang Diyos, matang agtaboy sa kansiyo in mga piyagpatoldo kansiyo Abyan, mga makaanggay panawen kay IsoKiristo.
[6] Angkataw in siyabi Diyos sa mga Agisolat keyen, Kamo mangkit, kangay piyagpabalay sa bayan lakoy Siyon in osai ka bato panrigen sa sokol, kangay iidang, kangay piyagmaal wano. In agpasandig sa kansiyo idbatay arikoyan.
[7] Na ngani siyo piyagmaal wano kitam in mga agpasandig sa kansiyo. Kamay sa mga yewed agpasandig sa kansiyo na in mga Agisolat keyen din, In bato piyaidapo kabolowan in mga agtadyok balay, siyo in mibaloy in lakonaw sa boo.
[8] Keyen wakay in mga Agisolat, Ina osai ka bato makasolpo, matang in mga mangyan maligan. Kaya siro asolpo angkataw yewed kansiro piyaniwalaan in agiplaong Diyos. In siro malabo, ina in siyandata Diyos sa kansiro.
[9] Kamay kitam in osai ka tiribo iidang Diyos, mga piyangwat sasirdoti in Diyos in Poon lakoy, mga mangyan tiyalaga sa Diyos, kansiyo gayed mga bodang. Kitam kansiyo iidang matang agsabi in kansiyo mga makasoyo wano pag panawen. Siyo din in agberya sa kantam batang sa lened pataboy sa kansiyo makaanggay wano pag rawa ibeng.
[10] Tangona kitam yewed bodang Diyos, kamay ngona kansiyo ngani mga bodang. Tangona yewed kantam atawanan in Diyos agpakayawte, kamay ngona kantam ngani atawanan kitam kansiyo piyagpakayawte.
[11] Mga belag kangay piyagmaal, kataw kitam mga agpakamalay waget atai sa kobat, na kangay piyagayaw in agpangwat in mga daeten pag piyagkabeet kanyo bilog, in mga aglaban sa kanyo abyan.
[12] Kamo agogali in maalno sa pangkit in mga yewed agpaniwala matang kamaybawa ngona kamo kansiro piyagbintangan in mga daeten, na dogayan sa Ibeng in Diyos agrateng siro batay agpakalakoy sa kansiyo, panawen sa kansiro ngani ngiitan in kanyo maalno pag panawen.
[13] Kitam pasakop sa boo mga apo kabaloyan piyangwat mangyan, matang kitam makaanggay sa Kapwan. Pasakop sa poon lakoy in mabwat pag apo kabaloyan sa kobat,
[14] osai sa mga gobirnador kansiyo sogo matang agparosa sa mga agpamangwat daet, osai agpakalakoy sa mga agpangwat maalno.
[15] Angkataw in beet in Diyos kitam agpangwat maal matang in mga mangyan idapo katawanan in aglibak sa kantam idapo wa batay masabi.
[16] Kitam yewed sakop sa mangyan, kamay ina ayaw agpangwaten dailan sa agpangwat daet, no yewed kitam agogali sakop sa Diyos.
[17] Kantam pagmaalen in boo mga mangyan, pagbelagen in mga belag kay Kiristo, agogali kitam in agkalimo sa Diyos, pagmaalen in poon lakoy.
[18] Kamo in mga sogowan in piyagalapet, kamo agmaal sa kanyo mga kapwan, maniwala sa kansiro, yewed waget sa mga mabait, kadayo sa mga matapang.
[19] No in mangyan, piyagparosa kamayba siyo idapo piyangwat daet, kamay panawen siyo agremrem sa Diyos siyo yewed aglaban sa parosa, na in Diyos agkaanggay sa kansiyo.
[20] Kamay no siyo agpangwat daet na betek in parosa, na kamayba siyo yewed aglaban sa parosa, idapo pakinabang sa Diyos. Kamay no kamo agpangwat maal kalbas yewed aglaban sa parosa na ina maal sa pangkit Diyos.
[21] Ina in osai ka dailan kaya kitam iidang Diyos. Angkataw Kiristo agbanta sa kaidapan panawen sa kantam, na kitam kansiyo piyakan alimbawa matang kantam pagtoladan.
[22] Kiristo idapo piyangwat daet, idapo din siyabi baribid.
[23] In siyo piyagidapo kabolowan siyo yewed gomanti. In siyo piyaidapan siyo yewed aglaban agsabi daet, dayem siyo paalapet sa Diyos in betek pag agparosa.
[24] In Kiristo matay sa kodos kansiyo biyaba in kantam mga daet matang biyono wa in kantam beet agpangwat daet, kamay piyaboway in kantam beet agpangwat maal. Panawen sa kansiyo mga sogat kitam piyakapya.
[25] Angkataw kitam kataw in mga topa malibangaw, kamay ngona tiipon wakay in Pastor, in Agalapet sa kantam.