[1] Mga belag, panawen sa mga piyagtaboy in Betek pag Abyan. Kangay beet kanyo atawanan anda.
[2] Kamo katawan in kamo ikkay agpaniwala kamo piyaakay sa yewed betek, kamo agsamba sa mga yewed Diyos, mga yewed kaiplaong.
[3] In kangay beet kamo katawan, no siyo piyagpatoldo in Betek pag Abyan, na siyo idbatay kasabi keyen, Isos pamanesen. Osai in mangyan idbatay kasabi keyen, Isos in Kapwan, no siyo yewed piyagpatoldo in Betek pag Abyan.
[4] Osai waget in Abyan, kamay karowan in kansiyo piyagtaboy.
[5] Karowan in padalan agtolong kamay osai waget ka Kapwan in agsogo.
[6] Karowan din in mga kabaloyan agpanawen, kamay osai waget in Diyos in agpakan kabaloyan sa boo mga agpanawen.
[7] Kaya atawanan in Abyan agbalay sa baatte osai, angkataw siyo apo tiyaboy sa baatte osai matang piyagtolong in boo.
[8] In osai piyakan in Abyan in kabaloyan agsabi in beet Diyos. In osai wakay piyakan ina daan pag Abyan in atawanan batang sa Diyos.
[9] Ina daan pag Abyan in agtaboy sa osai in lakonaw pag agpaniwala. Kalbas sa osai wakay tiyaboy in kabaloyan agpaoraw mga maskit.
[10] In osai piyagpakan in Abyan in kabaloyan agpangwat in mga makasoyo. In osai piyagpakan in kabaloyan agsabi in batang sa Diyos. In osai wakay piyagpakan in atawanan no nakay pag kabaloyan in batang sa Abyan, no nakay din in batang sa mga mamaw. In osai piyagpakan kabaloyan miplaong sa makasoyo pag mga agiplaong. In osai wakay piyagpakan kabaloyan agpaaling ina pag mga agiplaong.
[11] Ina pag boo osai waget ka Abyan in agtaboy. Baatte mangyan piyagpakan kabaloyan no nakay pag kabaloyan in tiyaboy in Abyan.
[12] Kiristo kagwali osai waget ka bilog, karowan ngaro in sangkap. Kamayba karowan in kabaloyan sangkap osai waget in bilog.
[13] Na kitam kataw din ina. Kamayba Odyo, kamayba yewed, kamayba sogowan piyagalapet, kamayba idapo kapwan, kitam boo biyaotismowan osai waget ka Abyan, matang mibaloy wa osai waget ka bilog. Kitam boo piyainem sa osai waget ka Abyan.
[14] In bilog karowan in sangkap, yewed osai waget.
[15] No in siyabi in bitis keyen, Kataw ako yewed bakwaw ako yewed sa bilog, kamay siyo sa bilog daan, aon?
[16] No siyabi in talinga keyen, Kataw ako yewed mata ako yewed sa bilog, kamay siyo sa bilog daan, aon?
[17] No mata waget in bilog na siyo idbatay karengey. No in bilog talinga waget na siyo idbatay kaarek.
[18] Kamay piyangwat in Diyos in boo mga sangkap sa bilog no nangkataw in kansiyo beet.
[19] No siyo osai waget ka sangkap, na ikkay bilog ina.
[20] Kamay kataw ngani ina, karowan in sangkap kamay osai waget ka bilog.
[21] Na yewed mayadi in mata miplaong sa bakwaw keyen, Kao yewed kangay piyagkailangan. Yewed mayadi in olo miplaong sa bitis keyen, Kao yewed kangay piyagkailangan.
[22] Dayem in tomag idapo eyat pag mga sangkap piyagkailangan gayed ngani.
[23] Osai in mga yewed piyagpakalakonaw agbangen, ina kantam piyagpakayawte labi kay. In mga makarikoy agbangen kantam piyagalapet labi kay sa mga yewed makarikoy.
[24] Yewed kailangan agpangwat kataw ina sa mga maalen wa. In Diyos in agpangwat in kantam mga bilog kataw ina. Matang piyagmaal in mga yewed maalen.
[25] Matang in bilog idapo agpalawayan. Boo daan agpaytolongan.
[26] No in osai ka agbangen apo maskit, na maskit din in boo bilog. No in osai piyagmaal, na in boo bilog agkaanggay.
[27] Kitam boo osai waget ka bilog, kay Kiristo bilog. Baatte osai sa kantam, na sangkap sa bilog Kiristo.
[28] Na sa barkadaan mga bodang Diyos kansiyo tiyaboy mga apo kabaloyan. In lakonaw in mga sogowan agpamarita. Kadogay in mga poropita. Kadogay in mga agpatoldo in agiplaong Diyos. Tiyaboy din in mga kabaloy agpangwat mga makasoyo, osai in mga kabaloy agpaoraw sa mga maskit, anggan in mga agtolong, in mga agpakoyay, anggan din in mga kabaloy miplaong sa makasoyo pag mga agiplaong.
[29] Yewed in boo mga katiwala Isos. Yewed in boo agsabi in batang sa Diyos. Yewed in boo agpatoldo in agiplaong Diyos. Yewed in boo kapangwat in mga makasoyo.
[30] Yewed in boo kabaloy agpaoraw sa mga maskit. Yewed in boo kaiplaong sa makasoyo pag mga agiplaong. Yewed in boo kapaaling ina pag mga agiplaong.
[31] Kamay ayayen gayed in mga lakonaw pag kabaloyan piyagtaboy in Abyan. Kamay ngona kangay wa batay piyagpatoldo sa kanyo in maalen sa boo.