[1] Mga belag, in kangay beet kanyo atawanan, in mibaloy tangona naw sa kantam mga kakoyayan in siro agyanggat kay Mowisis, in siro agipanaw, siro boo piyagkanlongan in libo, siro boo motol sa Dagat Mapola.
[2] Kataw ina siro boo kagwali biyaotismowan sa libo, osai sa dagat, angkataw siro boo agyanggat kay Mowisis.
[3] Siro boo mamangan in pamangnen batang sa Diyos.
[4] Siro boo minem sa sapa batang sa Diyos, kataw siro minem sapa batang sa Bato in agyanggat sa kansiro. Kiristo kagwali ina pag Bato.
[5] Kamayba kataw ina, siro aronaw in yewed makaanggay sa Diyos, matang siro mangatay sa moyod, mangibolalang.
[6] Ina pag mga mibaloy, ina agpamatoldo sa kantam, matang ayaw kitam kataw siro agkabeet sa mga daet.
[7] Ayaw agsamba sa mga yewed Diyos kataw in kalaati sa kansiro. Siyabi in Agisolat keyen, Tomokkaw in mga mangyan matang malpamangan, matang malpamarik. Paka lasing siro maypanggaraw.
[8] Na ayaw kitam manggaraw kataw in kalaati sa kansiro, kalbas dalwampo tolo ka libo osai waget ka ibeng matay.
[9] Ayaw kantam pagtepengen in Kapwan kataw in kalaati sa kansiro, kalbas siro matay piyangayat mga olay.
[10] Ayaw kitam agsolang kataw in kalaati sa kansiro, kalbas siro biyono in Angil in siyogo matang agpamono.
[11] Ina boo mibaloy sa kansiro matang agpatoldo sa kantam, boo siyolat matang kitam piyatoldo. Kitam ngona in mga aratengan in mga kalobosan pag mga dagon.
[12] Na in agremrem siyo marigen, na agingat, karam siyo malabo.
[13] Kitam idbatang kay piyagtepeng lampas sa tepeng boo mangyan. In Diyos maal, siyo idbatay pomayag kitam piyagtepeng labi kay sa kantam abaloyan. Dayem sa kabetek piyagtepeng kitam piyagpakan kabaloyan matang kitam mandaeg.
[14] Na ngani, kangay mga belag piyagmaal, ayaw agpansola.
[15] Kataw tai in kangay piyagsabi sa kanyo, angkataw kamo apo remrem. Kanyo remremen in kangay piyagsabi.
[16] Sa yapon in Kapwan, in kantam piyaginem, in kantam piyagpasalamat, no kitam aginem asin na kitam agpalbagiyan sa daya Kiristo. In pamangnen kantam piyagbagi na kitam agpalbagiyan sa kansiyo bilog.
[17] Kataw osai waget ka bilog in pamangnen, na kitam asin agpalbagiyan, kamayba kitam karowan, na osai waget ka bilog, kataw kitam agpalbagiyan sa osai waget ka bilog pamangnen.
[18] Kanyo remremen in mga kasokponan Israil, in mga agpalpamangan sa mga tiyaboy sa Diyos mibaloy wa osai waget osai in Diyos.
[19] Na nakay in galem kangay piyagsabi? Apo lames kabolowan in mga mamaw? Idapo. Apo lames kabolowan in ablasen batang piyasola? Idapo.
[20] In beet kangay siyabi keyen, in piyasola in mga yewed agpaniwala, kansiro piyagtaboy sa mga mamaw, yewed sa Diyos. Ako dayo kamo paagem sa mga mamaw.
[21] Yewed mayadi kitam manginem osai sa yapon in Kapwan osai sa batang wa piyasola. Yewed mayadi kitam mamangan osai sa pamangnen in Kapwan, osai sa pamangnen in mga mamaw.
[22] Nakay, kantam lames beet in Kapwan agkagalit? Sa kanyo lames remrem kitam kapandaeg sa Diyos?
[23] Apo mga agpaniwala keyen idapo piyagayaw kamayba nakay. Kamay in kalaati yewed maal, in kalaati yewed agpaistobo paniwala.
[24] Baatte mangyan ayaw agpatokawen in kansiyo sadiri mga piyagkailangan, no yewed in sa mga roma.
[25] Kalobante kitam mamangan in ablasen piyagpabili. Ayaw waget agtanong no saano batang, karam batang piyasola, na batay magolo in kantam remrem.
[26] Kataw in Agisolat keyen, In kobat, Diyos in Kapwan, in boo atai sa kobat, Diyos in Kapwan.
[27] No kitam piyagberya in yewed agpaniwala sa betek apo piyagkoman, kalbas kitam beet ista pataboy, na kantam komanen kamayba nakay in tiyaboy sa kantam. Ayaw waget agtanong no saano batang, karam batang piyasola, na batay magolo in kantam remrem.
[28] Kamay no apo agsabi sa kantam keyen, Anda pag ablasen batang piyasola, na ina ayaw agkomanen, panawen sa agsabi sa kantam, matang yewed magolo in remrem.
[29] In beet siyabi in kansiyo agbangen remrem, yewed kantam agbangen. Apo yangon agmatiwid keyen, Nakay batang ako piyagayaw mamangan panawen waget sa remrem in roma?
[30] Keyen kay, No ako agpasalamat sa Diyos panawen sa ablasen na nakay batang ako piyagsabiyan in roma panawen sa ablasen kangay piyasalamat?
[31] Na kangay sagot keyen, No kitam agpamangan, aginem, kamayba nakayte in kantam panawen, na in boo pangwaten gayed maal sa pangkit mga mangyan, matang siro batay agmaal sa Diyos.
[32] Kitam agingat sa kantam mga ogali, matang yewed atoksowan in roma, kamayba mga Odyo, kamayba mga yewed Odyo, kamayba mga paagem sa barkadaan mga bodang Diyos.
[33] Kataw daan ako, sa boote kangay ogali ako agpilit agpakaanggay sa boo mangyan. Kangay mga piyagkailangan yewed piyagpatokaw, dayem in sa mga roma piyagkailangan, matang siro din nges batay piyaboway.