[1] དེ་ནས་ཡང་གཙོ་བོ་ཡ་ཝཱེས་མོ་ཤེ་ལ་འདི་སྐད་དུ།
[2] ཁྱོད་ཀྱིས་ཡེས་ར་ཨེལ་པ་རྣམས་ལ། མི་མཛེ་ནད་ཅན་དང་། འཛིར་ནད་ཅན་དང་། བེམ་པོ་ལ་རེག་ནས་མི་གཙང་བར་གྱུར་པ་ཐམས་ཅད་སྒར་གྱི་ཕྱི་རོལ་ཏུ་འདོན་པར་བཀའ་སྒོས་ཤིག
[3] སྐྱེས་པའམ་བུད་མེད་སུ་ཡིན་ཡང་ཕྱི་རུ་འདོན་པ་དང་། དེ་དག་གིས་རང་གི་སྒར་བཙོག་པར་མི་བྱེད་པའི་ཆེད་དུ། དེ་རྣམས་སྒར་གྱི་ཕྱི་རོལ་ཏུ་འདོན་དགོས་ལ། སྒར་དེ་ནི་བདག་གི་སྡོད་གནས་ཡིན་ཞེས་གསུངས་སོ། །
[4] ཡེས་ར་ཨེལ་པ་རྣམས་ཀྱིས་དེ་ལྟར་བྱས་ཤིང་། དེ་དག་སྒར་གྱི་ཕྱི་རོལ་ཏུ་བཏོན་པ་དང་། གཙོ་བོ་ཡ་ཝཱེས་མོ་ཤེ་ལ་བཀའ་ཇི་ལྟར་གསུངས་པ་བཞིན། ཡེས་ར་ཨེལ་པ་རྣམས་ཀྱིས་དེ་ལྟར་བྱས་སོ། །
[5] དེ་ནས་ཡང་གཙོ་བོ་ཡ་ཝཱེས་མོ་ཤེ་ལ་འདི་སྐད་དུ།
[6] ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། སྐྱེས་པའམ་བུད་མེད་སུ་ཡིན་ཡང་མི་ཡིས་བྱེད་པའི་སྡིག་པ་སྤྱད་ནས་གཙོ་བོ་ཡ་ཝཱེ་ལ་འགལ་བ་ཡིན་ན། མི་དེ་ལ་ཉེས་པ་ཡོད་ཅིང་།
[7] མི་དེས་རང་བྱས་ཀྱི་སྡིག་པ་མཐོལ་བཤགས་བགྱི་བ་དང་། མི་ལ་གྱོང་གུད་བཟོས་པ་ལ་སྐྱིན་ཚབ་འཇལ་བར་མ་ཟད། དེའི་ཁར་ལྔ་ཆའི་གཅིག་བསྣན་ཏེ་གྱོང་རག་པའི་མི་ལ་སྤྲོད་དགོས།
[8] གལ་སྲིད་མི་དེ་ལ་གྱོང་གུད་ཀྱི་སྐྱིན་ཚབ་འཇལ་སའི་གཉེན་ཉེ་མེད་ན། གྱོང་གུད་ཀྱི་སྐྱིན་ཚབ་ནི་གཙོ་བོ་ཡ་ཝཱེ་ལ་འཇལ་དགོས་ཤིང་། དེ་ནི་མཆོད་དཔོན་ལ་དབང་བ་དང་། དེའི་ཁར་ད་དུང་སྡིག་བཤགས་བྱེད་པའི་ལུག་ཐུག་ཀྱང་དབུལ་དགོས་སོ། །
[9] ཡེས་ར་ཨེལ་པ་རྣམས་ཀྱི་རྫས་དམ་པ་ཐམས་ཅད་ལས་མཆོད་དཔོན་ལ་འདེགས་མཆོད་དུ་ཕུལ་བ་ནི་གང་ཡིན་ཡང་མཆོད་དཔོན་ལ་དབང་དགོས།
[10] མི་རེ་རེས་ཕུལ་བའི་རྫས་དམ་པ་རྣམས་མཆོད་དཔོན་ལ་དབང་དགོས། མི་ཡིས་རྫས་གང་ཞིག་མཆོད་དཔོན་ལ་ཕུལ་ན། དེ་ནི་མཆོད་དཔོན་ལ་དབང་བ་ཡིན་ཞེས་པའོ་ཞེས་བཀའ་བསྩལ་ཏོ། །
[11] དེ་ནས་ཡང་གཙོ་བོ་ཡ་ཝཱེས་མོ་ཤེ་ལ་འདི་སྐད་དུ།
[12] ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། སུ་དང་སུ་ཡིན་ཡང་གལ་ཏེ་ཁོའི་ཆུང་མས་ཁྱོ་ག་ལ་རྒྱབ་འགལ་བྱས་ནས་རང་གི་ཁྱོ་ག་ལ་བློ་མི་དཀར་བ་དང་།
[13] སྐྱེས་པ་ཞིག་ཁོ་མོ་དང་ལུས་འབྲེལ་བྱས་ཏེ། རང་གི་ཁྱོ་ག་ལ་གསང་ནས་རྩད་མ་ཆོད་པ་དང་། ཁོ་མོས་རང་ཉིད་མི་གཙང་བར་བྱས་པ་ལ་བདེན་དཔང་བྱེད་མཁན་སུ་ཡང་མ་བྱུང་ཞིང་། ཉེས་པ་བྱེད་དུས་ཀྱང་གཞན་གྱིས་མ་ཟིན་ནའང་།
[14] གལ་སྲིད་ཁོ་མོའི་ཁྱོ་ག་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་པ་དང་། ཆུང་མ་དངོས་གནས་མི་གཙང་བར་བྱས་པའམ། ཡང་ན་ཁྱོ་ག་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་ནའང་། ཆུང་མ་མི་གཙང་བར་བྱས་མེད་ན།
[15] མི་དེས་རང་གི་ཆུང་མ་མཆོད་དཔོན་གྱི་མདུན་དུ་འཁྲིད་པ་དང་། ཡང་ཁོ་མོའི་ཆེད་དུ་ནས་ཕྱེ་ཨེ་ཕཱ་བཅུ་ཆའི་གཅིག་མཆོད་པར་དབུལ་དགོས་ཤིང་། དེའི་སྟེང་དུ་སྣུམ་བླུག་མི་རུང་ལ་སྤོས་དཀར་ཡང་སྒྲོན་མི་རིགས་སོ། །ཅིའི་ཕྱིར་ཞེ་ན། དེ་ནི་ཐེ་ཚོམ་གྱི་འབྲུ་མཆོད་དང་། དྲན་པའི་འབྲུ་མཆོད་དེ་ནག་ཉེས་དྲན་པའི་འབྲུ་མཆོད་ཡིན་པས་སོ། །
[16] དེ་ནས་མཆོད་དཔོན་གྱིས་བུད་མེད་དེ་འཁྲིས་སུ་ཁྲིད་ནས་གཙོ་བོ་ཡ་ཝཱེའི་སྤྱན་སྔར་བསླང་བར་བྱ་ཞིང་།
[17] ཆུ་དམ་པ་རྫ་བུམ་ཞིག་ཏུ་བླུག་པ་དང་། ཡང་གུར་མཆོག་གི་ས་ནས་ས་རྡུལ་བླངས་ཏེ་ཆུ་ནང་དུ་གདབ་དགོས།
[18] མཆོད་དཔོན་གྱིས་བུད་མེད་དེ་གཙོ་བོ་ཡ་ཝཱེའི་སྤྱན་སྔར་བསླངས་ནས་ཁོ་མོའི་སྐྲ་ལྷོད་པ་དང་། དྲན་པའི་འབྲུ་མཆོད་དེ་ཐེ་ཚོམ་གྱི་འབྲུ་མཆོད་ཡིན་པ་དེ་ནི་ཁོ་མོའི་ལག་ཏུ་འཇོག་དགོས། མཆོད་དཔོན་གྱི་ལག་ཏུ་དམོད་མོ་འགུག་པའི་ཆུ་ཁ་མོ་འཛིན་དགོས།
[19] མཆོད་དཔོན་གྱིས་བུད་མེད་དེ་ལ་མནའ་བོར་དུ་འཇུག་ཅིང་། ཁོ་མོར་འདི་ལྟར། གལ་སྲིད་སྐྱེས་པ་སུ་ཡང་ཁྱོད་དང་ལུས་འབྲེལ་མ་བྱས་པ་དང་། རང་གི་ཁྱོ་ག་ལ་དབང་བའི་དུས་སུ་ཁྱོད་ཀྱིས་ཁྱོ་གར་རྒྱབ་འགལ་བྱས་ནས་རང་ཉིད་མི་གཙང་བར་བྱས་མེད་ན། དམོད་མོ་འགུག་པའི་ཆུ་ཁ་མོ་འདི་ལས་ཐར་བར་གྱུར་ཅིག
[20] གལ་ཏེ་ཁྱོད་རང་ཁྱོ་ག་ལ་དབང་བའི་དུས་སུ་ཁྱོ་གར་རྒྱབ་འགལ་བྱས་ནས་རང་ཉིད་མི་གཙང་བར་བྱས་པ་དང་། ཁྱོད་ནི་རང་གི་ཁྱོ་ག་མིན་པའི་སྐྱེས་པ་གཞན་དང་ལུས་འབྲེལ་བྱས་པ་ཡིན་ན་ཞེས་སྨྲ་ཞིང་།
[21] མཆོད་དཔོན་གྱིས་བུད་མེད་ལ་མནའ་སྐྱེལ་དུ་བཅུག་ནས་མུ་མཐུད་དུ་ཁོ་མོར་འདི་ལྟར། གཙོ་བོ་ཡ་ཝཱེས་ཁྱོད་ཀྱི་བརླ་ནི་རིད་ཅིང་གསུས་པ་སྐྲང་བར་མཛད་པ་དང་། གཙོ་བོ་ཡ་ཝཱེས་ཁྱོད་ནི་ཁྱོད་ཀྱི་ཡུལ་མིའི་དཀྱིལ་དུ་དམོད་མོ་དང་མནའ་རུ་འགྱུར་བར་མཛོད་ཅིག
[22] དམོད་མོ་འགུག་པའི་ཆུ་འདི་ཁྱོད་ཀྱི་གྲོད་ཁོག་ཏུ་ཞུགས་ཏེ། ཁྱོད་ཀྱི་གསུས་པ་སྐྲང་ཞིང་བརླ་རིད་དུ་འཇུག་པར་མཛོད་ཅིག་ཅེས་སྨྲ་དགོས་ལ། དེ་ནས་བུད་མེད་དེས་ཨ་མེན་ཨ་མེན་ཞེས་ཞུ་དགོས་སོ། །
[23] དེ་ནས་མཆོད་དཔོན་གྱིས་དམོད་མོ་དེ་དག་ཤོག་དྲིལ་སྟེང་དུ་བྲིས་ནས་དེ་ཆུ་ཁ་མོའི་ནང་བཀྲུ་དགོས་ལ།
[24] ཡང་བུད་མེད་དེ་ལ་དམོད་མོ་འགུག་པའི་ཆུ་ཁ་མོ་དེ་འཐུང་དུ་བཅུག་ནས། དམོད་མོ་འགུག་པའི་ཆུ་དེ་ཁོ་མོའི་གྲོད་ཁོག་ཏུ་ཞུགས་ཏེ་ན་ཟུག་སློང་བ་ཡིན།
[25] མཆོད་དཔོན་གྱིས་བུད་མེད་དེའི་ལག་ནས་ཐེ་ཚོམ་གྱི་འབྲུ་མཆོད་བླངས་ནས། གཙོ་བོ་ཡ་ཝཱེའི་སྤྱན་སྔར་འབྲུ་རིགས་ཀྱི་མཆོད་པ་དེ་ཕར་གཡོ་ཚུར་གཡོ་བྱས་རྗེས་མཆོད་ཁྲིའི་སྟེང་དུ་དབུལ་དགོས།
[26] མཆོད་དཔོན་གྱིས་འབྲུ་རིགས་ཀྱི་མཆོད་པ་ལས། དྲན་རྟེན་གྱི་མཆོད་པ་ཁྱོར་བ་གང་བླངས་ནས་མཆོད་ཁྲིའི་ཁར་བསྲེག་པ་དང་། དེའི་རྗེས་སུ་ད་གཟོད་བུད་མེད་ལ་ཆུ་དེ་འཐུང་དུ་འཇུག་དགོས་སོ། །
[27] ཁོ་མོར་ཆུ་དེ་འཐུང་དུ་བཅུག་རྗེས། གལ་སྲིད་ཁོ་མོས་མི་གཙང་བ་སྤྱད་ཅིང་རང་གི་ཁྱོ་གར་བློ་མི་དཀར་ན། དམོད་མོ་འགུག་པའི་ཆུ་དེ་ཁོ་མོའི་གྲོད་ཁོག་ཏུ་ཞུགས་ནས་ན་ཟུག་སློང་བར་འགྱུར་བ་དང་། ཁོ་མོའི་གསུས་པ་སྐྲང་ཞིང་བརླ་ཡང་རིད་པར་འགྱུར་ལ། བུད་མེད་དེ་ནི་རང་གི་ཡུལ་མིའི་དཀྱིལ་དུ་དམོད་མོ་རུ་འགྱུར་རོ། །
[28] གལ་སྲིད་བུད་མེད་དེ་གཞན་གྱིས་མི་གཙང་བར་བྱས་མེད་པ་དང་གཙང་མ་ཡིན་ན། ཁོ་མོར་གནོད་པ་མི་འཕོག་ཅིང་མངལ་ཡང་སྦྲུམ་པར་འགྱུར་རོ། །
[29] འདི་ནི་ཐེ་ཚོམ་སྐོར་གྱི་བཀའ་ཁྲིམས་ཡིན་ཏེ། གལ་སྲིད་ཆུང་མ་ཞིག་གིས་རང་ཉིད་ཁྱོ་གར་དབང་བའི་དུས་སུ་ཁྱོ་ག་ལ་རྒྱབ་འགལ་བྱས་ནས་རང་མི་གཙང་བར་བྱས་པའམ།
[30] ཡང་ན་སྐྱེས་པ་ཞིག་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་ན། ཁོས་བུད་མེད་དེ་གཙོ་བོ་ཡ་ཝཱེའི་སྤྱན་སྔར་བསླང་དགོས་པ་དང་། མཆོད་དཔོན་གྱིས་བུད་མེད་དེ་ལ་བཀའ་ཁྲིམས་ཁ་ཚང་བཞིན་དུ་བྱའོ། །
[31] ཁྱོ་ག་དེར་ནག་ཉེས་མི་འཕོག་ཅིང་། བུད་མེད་ཀྱིས་རང་གི་ནག་ཉེས་འཁུར་དགོས་ཞེས་པའོ་ཞེས་བཀའ་བསྩལ་ཏོ། །