[1] དེ་ནས་ཡང་གཙོ་བོ་ཡ་ཝཱེས་མོ་ཤེ་ལ་འདི་སྐད་དུ།
[2] ཁྱོད་ཀྱིས་ཡེས་ར་ཨེལ་པ་རྣམས་ལ་བཀའ་འདི་ལྟར་སྒོས་ཤིག ཁྱོད་རྣམས་ཀྱིས་ང་ལ་དབུལ་འོས་པའི་མཆོད་པ་སྟེ། ང་ལ་དྲི་བཟང་གི་མེ་མཆོད་དུ་འབུལ་བའི་ཞལ་ཟས་ནི། དུས་བཅད་ལྟར་གཟབ་གཟབ་བྱས་ནས་ང་ལ་དབུལ་དགོས་ཞེས་པའོ། །
[3] ཡང་ཁྱོད་ཀྱིས་དེ་རྣམས་ལ་འདི་ལྟར་སྨྲོས་ཤིག ཁྱོད་ཅག་གིས་གཙོ་བོ་ཡ་ཝཱེ་ལ་དབུལ་དགོས་པའི་མེ་མཆོད་ནི་འདི་ལྟ་སྟེ། ཉིན་རེར་སྐྱོན་མེད་པའི་ལུ་གུ་ལོ་གཅིག་ཅན་གཉིས་རེ་དུས་རྒྱུན་གྱི་སྦྱིན་སྲེག་ཏུ་དབུལ་དགོས་པ་ཡིན།
[4] ལུ་གུ་གཅིག་ནི་ཞོགས་པའི་དུས་སུ་འབུལ་བ་དང་། ཅིག་ཤོས་ནི་ས་སྲོས་ཀྱི་དུས་སུ་དབུལ་དགོས།
[5] གཞན་ཡང་འབྲུ་རིགས་ཀྱི་མཆོད་པའི་ཕྱིར་དུ་ཨེ་ཕཱ་བཅུ་ཆ་གཅིག་གི་ཕྱེ་བཟང་པོར་རྫ་བུམ་གྱི་བཞི་ཆ་གཅིག་གི་སྣུམ་བཙགས་མ་བསྲེས་དགོས།
[6] དེ་ནི་དུས་རྒྱུན་གྱི་སྦྱིན་སྲེག་ཡིན་ལ། རི་བོ་སི་ནཱ་ནས་གཏན་ལ་ཕབ་པ་སྟེ། གཙོ་བོ་ཡ་ཝཱེ་ལ་འབུལ་བའི་དྲི་བཟང་གི་མེ་མཆོད་ཡིན་ནོ། །
[7] ཡང་ལུ་གུ་རེའི་ཕྱིར་དུ་རྒུན་ཆང་རྫ་བུམ་གྱི་བཞི་ཆ་གཅིག་སྐྱེམས་མཆོད་དུ་དབུལ་དགོས། ཁྱོད་ཀྱིས་རྒུན་ཆང་བཙན་པོ་དེ་གནས་དམ་པ་རུ་གཙོ་བོ་ཡ་ཝཱེ་ལ་སྐྱེམས་མཆོད་དུ་དབུལ་དགོས་སོ། །
[8] ས་སྲོས་ཀྱི་དུས་སུ་ལུ་གུ་ཅིག་ཤོས་དེ་དབུལ་དགོས། ཞོགས་པའི་འབྲུ་རིགས་ཀྱི་མཆོད་པ་དང་། དེ་དང་མཉམ་དུ་འབུལ་བའི་སྐྱེམས་མཆོད་ནང་ལྟར། དྲི་བཟང་གི་མེ་མཆོད་དུ་གཙོ་བོ་ཡ་ཝཱེ་ལ་དབུལ་དགོས་སོ། །
[9] དེ་ནས་ངལ་གསོ་བའི་ཉིན་མོ་ལ། སྐྱོན་མེད་པའི་ལུ་གུ་ལོ་གཅིག་ཅན་གཉིས་དང་། འབྲུ་རིགས་ཀྱི་མཆོད་པའི་ཕྱིར་དུ་ཨེ་ཕཱ་བཅུ་ཆ་གཉིས་ཀྱི་ཕྱེ་བཟང་པོར་སྣུམ་བསྲེས་ནས། དེ་དང་མཉམ་དུ་འབུལ་བའི་སྐྱེམས་མཆོད་བཅས་དབུལ་དགོས།
[10] དེ་ནི་དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་སྐྱེམས་མཆོད་ཀྱི་ཕན་ཆོད་ནས་ངལ་གསོ་བའི་ཉིན་མོ་རེ་རེར་འབུལ་བའི་སྦྱིན་སྲེག་ཡིན་ནོ། །
[11] ཡང་ཟླ་རེའི་ཉིན་དང་པོར་ཁྱོད་ཅག་གིས་གཙོ་བོ་ཡ་ཝཱེ་ལ་སྦྱིན་སྲེག་དབུལ་དགོས་ཏེ། གླང་ཐུག་གཉིས་དང་། ལུག་ཐུག་གཅིག་དང་། སྐྱོན་མེད་པའི་ལུ་གུ་ལོ་གཅིག་ཅན་བདུན་བཅས་ཡིན།
[12] འབྲུ་རིགས་ཀྱི་མཆོད་པ་ལ་གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་གྱི་ཕྱེ་བཟང་པོར་སྣུམ་བསྲེས་ནས་འབུལ་བ་དང་། འབྲུ་རིགས་ཀྱི་མཆོད་པ་ལ་ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་ཀྱི་ཕྱེ་བཟང་པོར་སྣུམ་བསྲེས་ནས་དབུལ་དགོས།
[13] འབྲུ་རིགས་ཀྱི་མཆོད་པ་ལ་ལུ་གུ་རེའི་ཕྱིར་དུ་ཨེ་ཕཱ་བཅུ་ཆ་གཅིག་གི་ཕྱེ་བཟང་པོར་སྣུམ་བསྲེས་ནས་དབུལ་དགོས། དེ་ནི་དྲི་བཟང་གི་སྦྱིན་སྲེག་སྟེ། གཙོ་བོ་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །
[14] དེ་དག་གི་སྐྱེམས་མཆོད་ལ། གླང་ཐུག་རེའི་ཕྱིར་དུ་རྒུན་ཆང་རྫ་བུམ་ཕྱེད་ཀ་རེ་དང་། ལུག་ཐུག་རེའི་ཕྱིར་དུ་རྒུན་ཆང་རྫ་བུམ་གྱི་གསུམ་ཆ་གཅིག་རེ། ལུ་གུ་རེའི་ཕྱིར་དུ་རྒུན་ཆང་རྫ་བུམ་གྱི་བཞི་ཆ་གཅིག་རེ་བཅས་དབུལ་དགོས་ཤིང་། དེ་ནི་ཟླ་བ་རེ་རེའི་སྦྱིན་སྲེག་ཡིན་ལ། ལོ་འཁོར་གྱི་ཟླ་བ་རེ་རེར་ཡིན་ནོ། །
[15] ཡང་ར་ཕོ་གཅིག་གཙོ་བོ་ཡ་ཝཱེ་ལ་སྡིག་བཤགས་མཆོད་པ་རུ་དབུལ་དགོས་ལ། དེ་ནི་དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་སྐྱེམས་མཆོད་ཀྱི་ཕན་ཆོད་ནས་འབུལ་བར་བྱའོ། །
[16] ཟླ་བ་དང་པོའི་ཚེས་བཅུ་བཞི་ཉིན་ནི་གཙོ་བོ་ཡ་ཝཱེའི་པེ་སག་གི་དུས་ཆེན་ཡིན་ཏེ།
[17] ཟླ་བ་དེའི་ཚེས་བཅོ་ལྔ་ནི་དུས་ཆེན་ཡིན་པས། ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།
[18] ཉིན་དང་པོར་འདུ་འཛོམས་དམ་པ་ཡོད་དགོས་ཤིང་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
[19] འོན་ཀྱང་གཙོ་བོ་ཡ་ཝཱེ་ལ་སྦྱིན་སྲེག་ཏུ་མེ་མཆོད་དབུལ་དགོས་ཏེ། གླང་ཐུག་གཉིས་དང་། ལུག་ཐུག་གཅིག་དང་། ལུ་གུ་ལོ་གཅིག་ཅན་བདུན་བཅས་ཡིན་ལ། དེ་ཐམས་ཅད་སྐྱོན་མེད་པ་ཡིན་དགོས་སོ། །
[20] ཡང་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ལ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
[21] ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་དབུལ་དགོས།
[22] ཡང་ར་ཕོ་གཅིག་སྡིག་བཤགས་མཆོད་པར་ཕུལ་ནས་ཁྱོད་ཅག་གི་སྡིག་པ་བཤགས་དགོས།
[23] ཞོགས་པའི་སྦྱིན་སྲེག་སྟེ་དུས་རྒྱུན་གྱི་སྦྱིན་སྲེག་གི་ཕན་ཆོད་ནས་ཁྱོད་ཅག་གིས་དེ་དག་ཀྱང་དབུལ་དགོས།
[24] ཁྱོད་ཅག་གིས་ཉིན་རེ་བཞིན་ཉིན་བདུན་གྱི་རིང་ལ་མཆོད་པ་དེ་རྣམས་དབུལ་དགོས་ཏེ། གཙོ་བོ་ཡ་ཝཱེ་ལ་ཞལ་ཟས་སུ་དྲི་བཟང་གི་མེ་མཆོད་དུ་འབུལ་བར་བྱ། དེ་ནི་དུས་རྒྱུན་གྱི་སྦྱིན་སྲེག་དང་དེའི་སྐྱེམས་མཆོད་ཀྱི་ཕན་ཆོད་ནས་འབུལ་བའོ། །
[25] ཉིན་བདུན་པར་འདུ་འཛོམས་དམ་པ་ཡོད་དགོས་ཤིང་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
[26] ཐོག་ཕུད་ཀྱི་ཉིན་མོ་སྟེ་བདུན་ཕྲག་དུས་ཆེན་གྱི་ཉིན་དེར། ཁྱོད་ཅག་གིས་གཙོ་བོ་ཡ་ཝཱེ་ལ་འབྲུ་རིགས་ཀྱི་མཆོད་པ་གསར་པ་འབུལ་བའི་ཚེ་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
[27] འོན་ཀྱང་སྦྱིན་སྲེག་ནི་གཙོ་བོ་ཡ་ཝཱེ་ལ་དྲི་བཟང་གི་མཆོད་པར་དབུལ་དགོས་པ་སྟེ། གླང་ཐུག་གཉིས་དང་། ལུག་ཐུག་གཅིག་དང་། ལུ་གུ་ལོ་གཅིག་ཅན་བདུན་བཅས་ཡིན་ལ།
[28] དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ཏེ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
[29] ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་དབུལ་དགོས།
[30] ཡང་ར་ཕོ་གཅིག་ཕུལ་ནས་ཁྱོད་ཅག་གི་སྡིག་པ་བཤགས་དགོས།
[31] དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པའི་ཕན་ཆོད་ནས། ཁྱོད་ཅག་གིས་ད་དུང་མཆོད་པ་འདི་དག་དང་དེའི་སྐྱེམས་མཆོད་རྣམས་དབུལ་དགོས་ལ། དེ་རྣམས་སྐྱོན་མེད་པ་ཡིན་དགོས་སོ། །