[1] ང་རང་སོ་ལྟའི་ལྕགས་རི་སྟེང་དུ་ལངས་ཏེ། གཟབ་གཟབ་ངང་ཡེ་ཝཱེས་ངའི་ནང་དུ་ཅི་གསུང་པ་དང་། ངའི་སྡུག་སྐད་འདོན་པ་ལ་ཅི་ལྟར་ལན་འདེབས་པར་བལྟ་ཞིག་ཅེས་ཞུས་པ་ན།
[2] གཙོ་བོ་ཡ་ཝཱེས་ང་ལ་བཀའ་ལན་གནང་སྟེ་འདི་སྐད་དུ། ཞལ་གཟིགས་དེ་ཕྲིས་ཤིག་དང་། གསལ་བོར་ས་ངོས་སུ་བཀོད་ན། ཀློག་མཁན་རྣམས་ཀྱིས་རྟོགས་སླ་བར་འགྱུར།
[3] ཞལ་གཟིགས་འདི་ནི་དུས་ཚོད་ངེས་ཅན་ཞིག་དང་འབྲེལ་བས། དངོས་སུ་འགྲུབ་པས་དོན་མེད་དུ་མིན་ཞིང་། འགྱོར་འགྱངས་བྱེད་ཀྱང་ད་དུང་སྒུག་དགོས། དེ་ཅིའི་ཕྱིར་ཞེ་ན། དོན་དེ་ནི་བསླེབ་པར་འགྱུར་ཞིང་། འགོར་འགྱང་མི་བྱེད་དོ།།
[4] ཀལ་དི་པ་ནི་རང་རློམ་ཆེ་ཞིང་སེམས་དྲང་བདེན་མིན་པ་དང་། ཡིན་ཡང་མི་དྲང་བདེན་ཅན་ནི་རང་གི་དད་པའི་ཕྱིར་དུ་གསོན་པར་འགྱུར་ཞིང་།
[5] ཆང་གིས་མིའི་གཡོ་ཟོལ་དང་ང་རྒྱལ་བསྐྱེད་པས་དུས་བདེ་ཞོད་འཇགས་བྱེད་མི་ཐུབ་པར། གཤིན་རྗེའི་ཡུལ་བཞིན་དུ་འདོད་པ་བསྐྱེད་པ་དང་། ཡང་འཆི་བ་བཞིན་དུ་གཏན་དུ་ཡིད་མི་ཚིམ་པ་དང་། དེ་དག་གིས་རང་ཉིད་ལ་དབང་དུ་ཡུལ་ཁམས་ཀུན་བསྡུས་ཤིང་མི་སྡེ་ཀུན་བསྡུས་སོ།།
[6] མི་སྡེ་འདི་དག་གིས་དཔེ་བརྗོད་དང་། ཟུར་ཟ་དང་། ལྐོག་བརྡ་ཡིས་དེ་དག་ལ་སྟོན་ཞིང་ན་རེ། གང་བྱུང་དུ་མི་གཞན་པའི་རྒྱུ་ནོར་ཐོབ་པ་དང་། མི་གཞན་གྱིས་གཏའ་མར་བཞག་པའི་ནོར་ཁྱེར་འོངས་མཁན་དག་ནི་བཀྲ་མི་ཤིས་ཤིང་། ཁོ་ཚོས་དེ་བཞིན་དུ་དུས་ཡུན་ཇི་ཙམ་འཁྱོང་ངམ།
[7] ཁྱོད་ཀྱི་བུན་བདག་གིས་དོན་དེ་གློ་བུར་ཉིད་ལ་མི་དྲན་ནམ། ཁྱོད་ལ་ཟིང་ཆ་སློང་མཁན་གྱིས་ཁྱོད་རང་གཉིད་ལས་བསླང་བ་མ་ཡིན་ནམ། དེ་ནས་ཁྱོད་ནི་ཁོ་ཚོའི་བཅོམ་ནོར་དུ་འགྱུར་རོ།།
[8] དེ་ཅིའི་ཕྱིར་ཞེ་ན། ཁྱོད་ཀྱིས་ཡུལ་ཁམས་མང་པོར་བཅོམ་སྟེ་མི་བསད་དེ་ཁྲག་བཞུར་དུ་བཅུག་པ་དང་། ཡུལ་ཁམས་ཀུན་གྱི་གྲོང་ཁྱེར་རྣམས་དང་དེའི་ནང་དུ་སྡོད་པའི་མི་རྣམས་ལ་བཙན་ཤུགས་སྤྱད་པས། ལུས་པའི་མི་རྣམས་ཀྱིས་ཀྱང་ཁྱོད་གཞོམ་པར་འགྱུར་ཞེས་སྨྲས་སོ།།
[9] རང་གི་ཁྱིམ་གཞིའི་ཕྱིར་དུ་མི་འོས་པའི་ཐོབ་ནོར་བསགས་པ་དང་། མཐོ་ས་ནས་སྡོད་ཁང་ཕུབ་སྟེ་གནོད་འཚེ་ལ་བྲོས་བྱོལ་བྱེད་མཁན་ཁྱོད་རྣམས་བཀྲ་མི་ཤིས་ཤིང་།
[10] ཁྱོད་ཀྱིས་ཡུལ་ཁམས་མང་པོའི་མི་སྡེ་ཚར་དུ་བཅད་དེ་རང་ཉིད་ལ་འགལ་བའི་སྡིག་པ་བྱས་པ་དང་། ཁྱོད་ཀྱིས་ཇུས་གཞི་ངན་པས་རང་ཁྱིམ་བརླགས་སོ།།
[11] ཐ་ན་རྡོ་བས་རྩིག་པ་ནང་ནས་སྐད་རྒྱག་ཅིང་། ཀ་བས་སྡོང་པོ་ནང་ནས་ལན་སྤྲོད་པར་འགྱུར།
[12] མིའི་ཁྲག་གིས་མཁར་བརྩིགས་པ་དང་། ངན་པ་ཡིས་གྲོང་ཁྱེར་འཛུགས་མཁན་ཁྱོད་ནི་བཀྲ་མི་ཤིས་ལ།
[13] འབངས་མིས་ངལ་རྩོལ་ལས་ཐོབ་པ་དག་མིས་བསྲེག་པར་འགྱུར་ཏེ། ཡུལ་ཁམས་ཀུན་གྱིས་དཀའ་བ་སྤྱད་དེ་ཐོབ་པ་དག་ནི་སྟོང་བར་འགྱུར་ལ། དོན་འདི་ཐམས་ཅད་ནི་དཔུང་ཚོགས་ཀྱི་ཡ་ཝཱེའི་ལས་བྱུང་བ་མ་ཡིན་ནམ།
[14] ཇི་ལྟར་ཆུ་བོ་ཀུན་གྱིས་རྒྱ་མཚོར་བཀབ་པ་བཞིན་དུ། གཙོ་བོ་ཡ་ཝཱེའི་གཟི་བརྗིད་རྟོགས་པའི་ཤེས་བྱ་ནི་ས་གཞི་ཡོངས་སུ་ཁྱབ་པར་འགྱུར།
[15] ཁྱིམ་མཚེས་ལ་ཆང་གིས་མགྲོན་བྱས་ཏེ་དུག་རྫས་བཏབ་པ་དང་། དེའི་ལུས་པོ་གཅེར་བུ་མཐོང་བའི་ཚེ་བཟི་བར་བཅུག་པ་ཁྱོད་ནི་བཀྲ་མི་ཤིས་ལ།
[16] ཁྱོད་ལ་ངོ་ཚས་ཁེངས་པ་ལས་བཀུར་མི་འོས་ཏེ། ཁྱོད་ཀྱིས་ཀྱང་ཆང་འཐུང་ནས་བཟི་སྟེ་ལུས་སྨད་མངོན་པར་གྱུར་ཞིག དེ་ནས་གཙོ་བོ་ཡ་ཝཱེའི་ཕྱག་གཡས་པའི་ཕོར་བུ་ཕྱིར་ལོག་སྟེ་ཁྱོད་ལ་སྟེར་ཞིང་། དེ་ནས་ངོ་ཚ་ཆེན་པོ་ཡིས་ཁྱོད་ཀྱི་གཟི་བརྗིད་ཀྱི་ཚབ་བྱའོ།།
[17] དེ་ཅིའི་ཕྱིར་ཞེ་ན། ཁྱོད་ཀྱིས་ལེ་བ་ནོན་གྱི་ཕྱོགས་སུ་བཙན་ཤུགས་སྤྱད་པ་དང་། མེད་པར་བཟོས་ཏེ་རི་དྭགས་ལ་འཇིགས་སྐུལ་པ་དང་། ཡང་མིའི་སྲོག་བཅད་དེ་ཁྲག་བཞུར་དུ་བཅུག་སྟེ། ས་གཞི་ཡོངས་ཀྱི་གྲོང་ཁྱེར་རེ་རེའི་ནང་སྡོད་པའི་མི་སྡེ་ཀུན་ལ་དྲག་ཤུགས་སྤྱད་པས་ལན་འཇལ་ངེས་ཡིན།
[18] སྐུ་འདྲ་རྐོས་མ་ལ་ཕན་ཅི་ཞིག་ཡོད་དམ། དེ་ནི་བཟོ་པས་བརྐོས་པ་ཙམ་ཡིན་ཞིང་། སྐུ་འདྲ་བླུག་མ་དང་། དགེ་རྒན་རྫུས་མ་ལ་ཕན་ཅི་ཞིག་ཡོད་དམ། བཟོ་པས་རང་ཉིད་ལ་རྟེན་ནས་སྨྲ་བརྗོད་མི་ནུས་པའི་དཀོན་མཆོག་རྫུས་མ་དེ་ལས་པ་དང་།
[19] ཤིང་སྡོང་ལ་ཡར་ལོངས་ཞེས་སྨྲས་པ་དང་། རྡོ་ལ་སད་པར་གྱུར་ཞིག་ཅེས་སྨྲ་མཁན་ཁྱོད་ནི་བཀྲ་མི་ཤིས་ཤིང་། དེ་ཡིས་ཁྱོད་ལ་ཅི་ལྟར་བཀའ་སློབ་གནང་ངམ། ལྟོས་ཤིག དེའི་ཕྱི་ལ་གསེར་དངུལ་གྱིས་རྒྱན་ཡང་ནང་ནས་དབུགས་མེད་དོ།།
[20] ཡིན་ཡང་གཙོ་བོ་ཡ་ཝཱེ་ཁོང་གི་དམ་པའི་མཆོད་ཁང་ནང་དུ་བཞུགས་པས། ས་གཞི་ཡོངས་ནི་ཁོང་གི་དྲུང་དུ་ལྷང་འཇགས་ངང་འདུག་འོས་ཞེས་གསུངས་སོ།།