[1] དེ་ནས་ཡ་ཧུ་དཱའི་ཡུལ་མི་རྣམས་ཀྱིས་ཡོ་ཤི་ཡཱའི་སྲས་ཡེ་ཧོ་ཨ་ཧཱ་ཟི་ཁོའི་ཡབ་ཀྱི་ཚབ་ཏུ་ཡེ་རུ་སཱ་ལེམ་ནས་རྒྱལ་པོར་བསྐོས།
[2] ཡེ་ཧོ་ཨ་ཧཱ་ཟི་རྒྱལ་པོར་བཞུགས་དུས་སུ་དགུང་ལོ་ཉེར་གསུམ་ལ་ལོན་ཡོད་དེ། ཡེ་རུ་སཱ་ལེམ་དུ་ཟླ་གསུམ་གྱི་རིང་ལ་རྒྱལ་སྲིད་བསྐྱངས།
[3] དེ་ནས་ཨེ་ཅིབ་ཀྱི་རྒྱལ་པོ་ཡེ་རུ་སཱ་ལེམ་དུ་འོངས་ནས་ཁོང་ཁྲི་ལས་ཕབ་སྟེ། ཡུལ་དེར་དངུལ་གྱི་རྡོ་ཚད་བརྒྱ་དང་། གསེར་གྱི་རྡོ་ཚད་གཅིག་གི་དཔྱ་ཁྲལ་བཀལ།
[4] ཡང་ཨེ་ཅིབ་ཀྱི་རྒྱལ་པོ་ནེ་ཀོས་ཡེ་ཧོ་ཨ་ཧཱ་ཟིའི་གཅེན་པོ་ཨེལ་ཡ་ཀིམ་ཞེས་པ་ཡ་ཧུ་དཱ་དང་ཡེ་རུ་སཱ་ལེམ་གྱི་རྒྱལ་པོར་བསྐོས་ནས། དེའི་མིང་བརྗེས་ནས་ཡེ་ཧོ་ཡཱ་ཀིམ་ཞེས་བཏགས། ནེ་ཀོས་ཡེ་ཧོ་ཡཱ་ཀིམ་གྱི་གཅེན་པོ་ཡེ་ཧོ་ཨ་ཧཱ་ཟི་བཟུང་ནས་ཨེ་ཅིབ་དུ་ཁྲིད་དོ། །
[5] ཡེ་ཧོ་ཡཱ་ཀིམ་རྒྱལ་པོར་སྡོད་དུས་སུ་ལོ་ཉེར་ལྔ་ལ་ལོན་པ་དང་། ཁོས་ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས། ཁོས་རང་གི་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ཅིང་།
[6] པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་ཡར་འོངས་ནས་དེ་ལ་དམག་དྲངས་ཤིང་། ཁོ་རང་ལྕགས་སྒྲོག་བརྒྱབས་ནས་པཱ་པིས་ལུན་དུ་ཁྲིད།
[7] ནེ་བོ་ཀད་ནེ་ཙར་གྱིས་གཙོ་བོ་ཡ་ཝཱེའི་ཕོ་བྲང་ནང་གི་སྣོད་ཆས་འགའ་ཞིག་པཱ་པིས་ལུན་དུ་ཁྱེར་ནས་རང་གི་ལྷ་ཁང་དུ་བཞག ༼མཆན། འདིར་རང་གི་ལྷ་ཁང་ཞེས་པར་རང་གི་ཕོ་བྲང་ཞེས་བསྒྱུར་ཡང་རུང་བ་ཡིན།༽
[8] ཡང་ཡེ་ཧོ་ཡཱ་ཀིམ་གྱི་བྱས་རྗེས་གཞན་དག་དང་། ཞེན་ལོག་གི་སྤྱོད་པ་རྣམས་དང་ཁོའི་གསང་བ་རྣམས་ནི་ཐམས་ཅད་ཡེས་ར་ཨེལ་དང་ཡ་ཧུ་དཱའི་རྒྱལ་རབས་ཀྱི་ནང་དུ་བཀོད་ཡོད་དེ། ཡང་ཁོའི་སྲས་ཡེ་ཧོ་ཡཱ་ཀིན་ཁོའི་ཚབ་ཏུ་རྒྱལ་པོར་གྱུར།
[9] ཡེ་ཧོ་ཡཱ་ཀིན་རྒྱལ་པོར་སྡོད་དུས་སུ་ལོ་བརྒྱད་ལ་ལོན་ཏེ། ཡེ་རུ་སཱ་ལེམ་དུ་ཟླ་གསུམ་དང་ཞག་བཅུའི་རིང་ལ་རྒྱལ་སྲིད་བསྐྱངས། ཁོས་གཙོ་བོ་ཡ་ཝཱེའི་སྤྱན་སྔར་ངན་པ་གང་ཡིན་སྤྱད། ༼མཆན། འདིར་ལོ་བརྒྱད་ཅེས་པར་རྒྱལ་རབས་ཀྱི་མདོ་གཉིས་པའི་༢༤:༨ནང་དུ་ལོ་བཅོ་བརྒྱད་ཅེས་བཀོད་ཡོད།༽
[10] དཔྱིད་ཀའི་དུས་སུ། རྒྱལ་པོ་ནེ་བོ་ཀད་ནེ་ཙར་གྱིས་མི་བཏང་ནས། གཙོ་བོ་ཡ་ཝཱེའི་ཕོ་བྲང་ནང་གི་ཡོ་བྱད་རྩ་ཆེན་རྣམས་དང་བཅས་སུ་ཁོ་རང་པཱ་པིས་ལུན་དུ་ཁྲིད་དེ། དེའི་ཁུ་བོ་ཚིད་ཀི་ཡཱ་ནི་ཡ་ཧུ་དཱ་དང་ཡེ་རུ་སཱ་ལེམ་གྱི་རྒྱལ་པོར་བསྐོས། ༼མཆན། འདིར་ཁུ་བོ་ཞེས་པར་ཕྱི་མོའི་མ་ཡིག་ལས་སྤུན་མཆེད་ཅེས་མཐོང་སྟེ། ཉེ་འབྲེལ་གྱི་དོན་ལ་འཇུག༽
[11] ཚིད་ཀི་ཡཱ་རྒྱལ་པོར་སྡོད་དུས་སུ་ལོ་ཉེར་གཅིག་ལ་ལོན་ཏེ། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས།
[12] དེས་ཡ་ཝཱེ་རང་གི་དཀོན་མཆོག་གི་སྤྱན་སྔར་ངན་པ་གང་ཡིན་སྤྱད་དེ། ལུང་སྟོན་པ་ཡེ་རེམ་ཡཱ་ཡིས་གཙོ་བོ་ཡ་ཝཱེའི་བཀའ་ལ་བརྟེན་ནས་ཁོ་ལ་ཉེན་བརྡ་བཏང་ཡང་ཁོས་ཁེངས་སྐྱུང་མ་བྱས་ལ།
[13] རྒྱལ་པོ་ནེ་བོ་ཀད་ནེ་ཙར་གྱིས་དེ་སྔར་ཁོ་ལ་དཀོན་མཆོག་དཔང་དུ་བཙུགས་ནས་མནའ་སྐྱེལ་དུ་བཅུག་ཀྱང་། ཁོས་དེ་ལའང་ངོ་ལོག་བྱས། ཁོ་ནི་ཨུ་ཚུགས་ཆེ་ཞིང་གྱོང་པོ་ཡིན་ཏེ། ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱོགས་སུ་མ་འཁོར་ཏོ། །
[14] དེ་མིན་མཆོད་དཔོན་ཆེན་པོ་རྣམས་དང་མི་རྒྱུད་ཐམས་ཅད་ཀྱང་སྔར་ལས་ལྷག་པར་དཀོན་མཆོག་དང་འགལ་ནས། ཕྱི་རོལ་པའི་ཞེན་ལོག་གི་བྱ་བ་ཐམས་ཅད་ཀྱི་རྗེས་སུ་འབྲངས་ནས། སྡིག་པ་ཚབས་ཆེན་བྱས་ཏེ་ཡེ་རུ་སཱ་ལེམ་དུ་དམ་པར་མཛད་པའི་གཙོ་བོ་ཡ་ཝཱེའི་ཕོ་བྲང་དེ་མི་གཙང་པར་བྱས།
[15] ཁོ་ཚོའི་ཕ་མེས་ཀྱི་དཀོན་མཆོག་ཡ་ཝཱེས་ཉིད་ཀྱི་མི་རྒྱུད་དང་བཞུགས་གནས་ལ་ཐུགས་བརྩེ་བར་དགོངས་པས། རྟག་ཏུ་ཉིད་ཀྱི་ལུང་སྟོན་པ་རྣམས་དེ་དག་གི་རྩར་མངགས་ནས་ཉེན་བརྡ་བཏང་མོད།
[16] འོན་ཀྱང་དེ་དག་གིས་དཀོན་མཆོག་གི་ལུང་སྟོན་པ་རྣམས་ལ་འཕྱས་ཏེ། ཁོང་གི་བཀའ་སྣང་མེད་དུ་བཞག་ཅིང་། ཁོང་གི་ལུང་སྟོན་པ་དག་ལ་སྨད་པས། གཙོ་བོ་ཡ་ཝཱེའི་ཐུགས་ཁྲོ་ཁོང་གི་མི་རྒྱུད་ཀྱི་སྟེང་དུ་བབས་ནས་མཐར་སྐྱོབ་ཐབས་བྲལ་བའི་གནས་སུ་གྱུར།
[17] གཙོ་བོ་ཡ་ཝཱེས་ཀལ་དི་པའི་རྒྱལ་པོ་ཡར་འོངས་ནས་དེ་དག་ལ་རྒོལ་བར་མཛད་པ་དང་། རྒྱལ་པོས་ཀྱང་ཁོ་ཚོའི་གནས་མཆོག་ཏུ་དར་མ་རྣམས་རལ་གྲིས་བསད་དེ། ཕོ་མོ་ན་གཞོན་དང་རྒན་པ་རྣམས་ལ་ཡང་སྙིང་རྗེ་མ་བྱས་པར་། ཁོང་གིས་ཐམས་ཅད་དེའི་ལག་ཏུ་གཏད་པ་ཡིན།
[18] དེས་དཀོན་མཆོག་གི་མཆོད་ཁང་དུ་ཡོད་པའི་ཡོ་བྱད་ཆེ་ཆུང་གང་ཡིན་ཐམས་ཅད་དང་། གཙོ་བོ་ཡ་ཝཱེའི་ཕོ་བྲང་གི་ནོར་བུ་རྣམས་དང་། རྒྱལ་པོ་དང་དེའི་སྐུ་དྲག་རྣམས་ཀྱི་རྒྱུ་ནོར་ཐམས་ཅད་པཱ་པིས་ལུན་དུ་ཁྱེར་ཏེ།
[19] ཀལ་དི་པས་དཀོན་མཆོག་གི་མཆོད་ཁང་མེར་བསྲེགས་པ་དང་། ཡེ་རུ་སཱ་ལེམ་གྱི་ལྕགས་རི་བཤིགས་ཤིང་། གྲོང་ཁྱེར་ནང་དུ་ཡོད་པའི་ཕོ་བྲང་ཀུན་མེས་བསྲེགས་ནས། གྲོང་ཁྱེར་ནང་གི་སྣོད་ཆས་རྩ་ཆེན་ཐམས་ཅད་མེད་པར་བཟོས་པ་རེད།
[20] གྲི་ལས་ཐར་བ་རྣམས་བཟུང་སྟེ་ཀལ་དིའི་རྒྱལ་པོས་པཱ་པིས་ལུན་དུ་ཁྲིད་ནས། ཏ་ཟིག་གི་རྒྱལ་སྲིད་དར་རྒྱས་སུ་ཕྱིན་པའི་བར་དུ། དེ་དག་ནི་ཁོ་དང་ཁོའི་བུ་རྒྱུད་རྣམས་ཀྱི་བྲན་ཏུ་བཀོལ།
[21] འདི་ནི་གཙོ་བོ་ཡ་ཝཱེས་ཡེ་རེམ་ཡཱ་བརྒྱུད་ནས་གསུངས་པ་དེ་བཞིན་དུ། ལོ་བདུན་ཅུ་རྫོགས་རིང་བར་དུ། ཡུལ་ཁམས་ལ་ངལ་གསོ་ཐོབ་པ་སྟེ། ས་རྒོད་དུ་ལུས་པའི་དུས་ལ་ཡུལ་ཁམས་ལ་ངལ་གསོ་ཐོབ་པ་ཡིན་ཞེས་གསུངས་པས་སོ། །
[22] དེ་ནས་ཏ་ཟིག་རྒྱལ་པོ་ཀོ་རེས་ཀྱི་ལོ་དང་པོར། གཙོ་བོ་ཡ་ཝཱེས་ཡེ་རེམ་ཡཱ་བརྒྱུད་ནས་གསུངས་པ་དེ་བསྒྲུབ་པའི་ཆེད་དུ། ཏ་ཟིག་རྒྱལ་པོ་ཀོ་རེས་ཀྱི་སེམས་ལ་བསྐུལ་མ་མཛད་དེ། དེས་རང་གི་རྒྱལ་ཁབ་ཡོངས་ལ་དྲིལ་བསྒྲགས་བྱས་ནས་འདི་ལྟར་བྲིས་པ་སྟེ།
[23] ཏ་ཟིག་རྒྱལ་པོ་ཀོ་རེས་ཀྱིས་འདི་ལྟར་དུ། ནམ་མཁའི་དཀོན་མཆོག་ཡ་ཝཱེས་ས་གཞིའི་རྒྱལ་ཁམས་ཐམས་ཅད་བདག་ལ་གནང་བྱུང་། ཡང་ཁོང་གིས་བདག་ལ་ཡ་ཧུ་དཱའི་ཡེ་རུ་སཱ་ལེམ་དུ་ཁོང་གི་ཕྱིར་མཆོད་ཁང་ཞིག་བཞེང་བའི་བཀའ་གནང་བས། ཁྱོད་ཅག་གི་ཁྲོད་དུ་ཡོད་པའི་ཁོང་གི་མི་རྒྱུད་ཐམས་ཅད་དེར་སོང་ཆོག་སྟེ། ཁོའི་དཀོན་མཆོག་ཡ་ཝཱེ་ནི་ཁོ་དང་མཉམ་དུ་བཞུགས་པར་ཤོག་ཅེས་གསུངས་པའོ། །