[1] ལོ་བདུན་པར་ཡེ་ཧོ་ཡ་དཱས་བརྩོན་པ་ཆེར་བསྐྱེད་ནས། བརྒྱ་དཔོན་རྣམས་ཏེ་ཡེ་རོ་ཧམ་གྱི་བུ་ཨ་ཟར་ཡཱ་དང་། ཡེ་ཧོ་ཧ་ནན་གྱི་བུ་ཡེས་མ་ཨེལ་དང་། ཨོ་བེད་ཀྱི་བུ་ཨ་ཟར་ཡཱ་དང་། ཨ་དཱ་ཡའི་བུ་མ་ཨ་སེ་ཡཱ་དང་། ཟིག་རིའི་བུ་ཨེ་ལི་ཤ་ཕད་བཅས་བོས་འོངས་ནས་ཁོ་རྣམས་ལ་ཆད་དོན་བཞག་པ་དང་།
[2] ཁོ་རྣམས་ཡ་ཧུ་དཱ་ཡུལ་ཡོངས་ལ་ཕྱིན་ནས། ཡ་ཧུ་དཱའི་གྲོང་ཁྱེར་སོ་སོ་ནས་ལེ་ཝི་པ་དང་། ཡེས་ར་ཨེལ་གྱི་ཁྱིམ་རྒྱུད་ཀྱི་འགོ་དཔོན་རྣམས་བསྡུས་པ་དང་། དེ་དག་ཡེ་རུ་སཱ་ལེམ་དུ་འདུས་ནས།
[3] མི་ཚོགས་ཀུན་གྱིས་དཀོན་མཆོག་གི་མཆོད་ཁང་ནས་རྒྱལ་པོ་དང་ཆད་དོན་བཞག་ཅིང་། དེར་ཡེ་ཧོ་ཡཱ་དཱས་འདི་ལྟར་དུ། ལྟོས་ཤིག གཙོ་བོ་ཡ་ཝཱེས་དཱ་བིད་ཀྱི་བུ་རྒྱུད་རྣམས་ལ་ཞལ་བཞེས་གནང་བ་བཞིན་དུ། རྒྱལ་པོའི་སྲས་ནི་རྒྱལ་པོར་སྡོད་དགོས་པས།
[4] ཁྱོད་རྣམས་ཀྱིས་འདི་བཞིན་བྱེད་དགོས་ཏེ། ཁྱོད་རྣམས་ལས་ངལ་གསོ་བའི་ཉིན་མོར་འདིར་ལས་རེས་སུ་འོངས་པའི་མཆོད་དཔོན་དང་ལེ་ཝི་པའི་སུམ་ཆའི་གཅིག་གིས་སྒོ་སྲུངས་ཤིག
[5] སུམ་ཆའི་གཅིག་ཕོ་བྲང་དུ་སྡོད་ཅིག ཡང་སུམ་ཆའི་གཅིག་དེ་རྨང་གི་རྟ་སྒོར་སྡོད་ཅིག མི་རྒྱུད་ཐམས་ཅད་གཙོ་བོ་ཡ་ཝཱེའི་ཕོ་བྲང་གི་ར་སྐོར་ནང་དུ་འདུས་པར་གྱིས།
[6] མཆོད་དཔོན་དང་ཞབས་ཏོག་སྒྲུབ་པའི་ལེ་ཝི་པ་རྣམས་མ་གཏོགས་པར། གཞན་སུ་ཡང་གཙོ་བོ་ཡ་ཝཱེའི་ཕོ་བྲང་ནང་དུ་འགྲོ་མི་རུང་། དེ་རྣམས་དམ་པ་ཡིན་པས་དེ་རྣམས་འབའ་ཞིག་ནང་དུ་འགྲོ་འོས། མི་རྒྱུད་ཀུན་གྱིས་གཙོ་བོ་ཡ་ཝཱེའི་བཀའ་བསྲུང་དགོས།
[7] ཡང་ལེ་ཝི་པ་རྣམས་ཀྱིས་རང་རང་གི་མཚོན་ཆ་ལག་ཏུ་ཐོགས་ཏེ་ཕྱོགས་བཞི་ནས་རྒྱལ་པོ་བསྲུང་དགོས་ཏེ། གཞན་སུ་ཞིག་རང་དགར་མཆོད་ཁང་ནང་དུ་འོངས་ན་དེ་གསོད་དགོས། རྒྱལ་པོ་ཕྱི་ནང་གང་དུ་འགྲོ་སྐབས་སུ་ཁྱོད་ཅག་ཁོང་གི་རྗེས་སུ་འབྲང་དགོས་ཞེས་བསྒོས་པ་དང་།
[8] ལེ་ཝི་པ་དང་ཡ་ཧུ་དཱ་པ་ཀུན་གྱིས་མཆོད་དཔོན་ཡེ་ཧོ་ཡ་དཱའི་ཅི་གསུངས་ལྟར་བསྒྲུབས་ཏེ། ཁོ་ཚོ་མི་རེ་རེས་ངལ་གསོ་བའི་ཉིན་མོར་ཞབས་ཏོག་སྒྲུབ་པ་དང་ཡང་ན་ངལ་གསོ་བའི་ཉིན་མོར་ལས་མཚམས་འཇོག་པའི་མི་ཁྲིད་ནས་སླེབས་པ་སྟེ། རྒྱུ་མཚན་ནི་ཡེ་ཧོ་ཡཱ་དཱས་སྡེ་ཚན་གང་ལའང་ལས་མཚམས་འཇོག་ཏུ་མ་བཅུག་པའི་ཕྱིར་ཏོ། །
[9] དེ་ནས་མཆོད་དཔོན་ཡེ་ཧོ་ཡ་དཱས་དཀོན་མཆོག་གི་མཆོད་ཁང་དུ་ཡོད་པའི་དཱ་བིད་ཀྱི་མདུང་དང་། ཕུབ་ཆེ་ཆུང་རྣམས་ཀྱང་བརྒྱ་དཔོན་རྣམས་ལ་སྤྲད་ཅིང་།
[10] ཡང་མི་རྣམས་ལ་མཚོན་ཆ་འཛིན་དུ་བཅུག་ནས་རྒྱལ་པོའི་མཐའ་འཁོར་དུ། མཆོད་ཁང་གི་གཡས་ཕྱོགས་ནས་གཡོན་ཕྱོགས་ཀྱི་བར་དུ། མཆོད་ཁྲི་དང་མཆོད་ཁང་གི་ཕྱོགས་བཞི་རུ་བཞག་གོ །
[11] དེ་ནས་ཁོ་རྣམས་ཀྱིས་ཡོ་ཨ་སི་ཕྱི་རོལ་དུ་ཁྲིད་འོངས་ནས། ཁོང་གི་དབུ་ལ་ཅོད་པན་གསོལ་ཏེ། ཡང་ཁོང་ལ་བཀའ་ཁྲིམས་བཤུས་མ་ཞིག་ཕུལ་ནས་ཁོང་རྒྱལ་པོར་བསྐོས་ཤིང་། ཡེ་ཧོ་ཡ་དཱ་དང་དེའི་བུ་རྣམས་ཀྱིས་ཁོང་ལ་སྣུམ་གྱིས་བྱུགས་ནས། རྒྱལ་པོ་ཁྲི་ལོར་བརྟན་པར་ཤོག་ཅེས་འབོད་སྐད་བསྒྲགས་སོ། །
[12] དེའི་ཚེ་ཨ་ཐལ་ཡཱ་ཡིས་མི་རྒྱུད་རྒྱུག་པ་དང་རྒྱལ་པོར་བསྟོད་པའི་སྐད་སྒྲ་ཐོས་ནས། གཙོ་བོ་ཡ་ཝཱེའི་ཕོ་བྲང་དུ་མི་རྒྱུད་དྲུང་དུ་སླེབས་ནས།
[13] མོས་བལྟས་པ་ལ། རྒྱལ་པོ་ནི་མཆོད་ཁང་སྒོ་མདུན་གྱི་ཀ་བའི་རྩར་བཞེངས་འདུག་པ་དང་། འགོ་དཔོན་རྣམས་དང་རྒྱ་དུང་འབུད་མཁན་རྣམས་རྒྱལ་པོའི་མཐའ་འཁོར་དུ་ཡོད་པ་དང་། ཡུལ་མི་ཀུན་པོས་དགའ་མགུ་ཡི་རང་གིས་རྒྱ་དུང་འབུད་པ་དང་། གླུ་བ་རྣམས་ཀྱིས་རོལ་ཆས་སྣ་ཚོགས་ཐོགས་ཏེ་མི་རྣམས་ཀྱིས་བསྟོད་དབྱངས་འབུལ་བར་དབུ་མཛད་པ་མཐོང་ནས། མོས་གོས་ཧྲལ་ཏེ། ནང་དགྲ་ལངས། ནང་དགྲ་ལངས་ཞེས་བོས་པ་དང་།
[14] མཆོད་དཔོན་ཡེ་ཧོ་ཡ་དཱས་དམག་དཔུང་ལ་བཀོད་འདོམས་བྱེད་མཁན་བརྒྱ་དཔོན་རྣམས་ཕྱི་རོལ་དུ་ཁྲིད་དེ་ན་རེ། མོ་རང་སྡེ་ཚན་རྣམས་ཀྱི་གྲལ་ནས་ཕྱི་རོལ་དུ་ཕྱུང་ཞིག མོའི་རྗེས་སུ་འབྲང་མཁན་རྣམས་ནི་རལ་གྲིས་སོད་ཅིག་ཅེས་བསྒོས། གང་ལ་ཞེ་ན། གཙོ་བོ་ཡ་ཝཱེའི་ཕོ་བྲང་དུ་མོ་མ་སོད་ཅིག་ཅེས་མཆོད་དཔོན་ཀྱིས་བཀའ་བབས་པའོ། །
[15] དེ་ནས་མོ་རྒྱལ་པོའི་ཕོ་བྲང་གི་རྟ་སྒོ་རུ་སླེབས་པ་ཙམ་གྱིས་དམག་མི་རྣམས་ཀྱིས་མོ་བཟུང་ནས་དེར་བསད་དོ། །
[16] ཡང་ཡེ་ཧོ་ཡ་དཱས་མི་རྒྱུད་ཐམས་ཅད་དང་རྒྱལ་པོ་ལ་ཁོ་རྣམས་ནམ་ཡང་གཙོ་བོ་ཡ་ཝཱེའི་མི་རྒྱུད་བྱེད་པའི་ཆད་དོན་བཞག
[17] དེ་ནས་མི་རྒྱུད་ཐམས་ཅད་པཱ་ཨལ་གྱི་ལྷ་ཁང་དུ་སོང་ནས་དེ་བཤིགས་ཞིང་། དེའི་མཆོད་ཁྲི་རྣམས་དང་སྐུ་རྣམས་སིལ་བུར་བཅག་སྟེ། པཱ་ཨལ་གྱི་མཆོད་དཔོན་མད་ཐན་ཞེས་པ་མཆོད་ཁྲི་རྣམས་ཀྱི་མདུན་དུ་བསད།
[18] ཡང་ཡེ་ཧོ་ཡ་དཱས་གཙོ་བོ་ཡ་ཝཱེའི་ཕོ་བྲང་བསྲུང་བའི་ཁག་ནི་ལེ་ཝི་ཚོ་བའི་མཆོད་དཔོན་རྣམས་ཀྱི་ལག་ཏུ་གཏད་པ་སྟེ། དེ་དག་ནི་མོ་ཤེའི་བཀའ་ཁྲིམས་ལ་བྲིས་པ་ལྟར། དཱ་བིད་ཀྱིས་གཙོ་བོ་ཡ་ཝཱེའི་ཕོ་བྲང་དུ་སྦྱིན་སྲེག་གི་མཆོད་པ་དབུལ་བའི་ཕྱིར་བསྐོས་པ་དང་། ཡང་དཱ་བིད་ཀྱིས་བསྒོས་པ་ལྟར་དགའ་ཞིང་མགུར་ལེན་པ་ཡིན་ནོ། །
[19] ཡང་ཁོང་གིས་གཙོ་བོ་ཡ་ཝཱེའི་ཕོ་བྲང་གི་སྒོ་རྣམས་བསྲུང་བར་སྒོ་སྲུང་རྣམས་བཞག་པ་སྟེ། མི་གཙང་པ་སུ་ཡིན་ཡང་ནང་དུ་འཛུལ་མི་ཆོག་གོ །
[20] དེ་ནས་ཁོང་གིས་བརྒྱ་དཔོན་དང་། སྐུ་དྲག་དང་། མི་རྒྱུད་ཀྱི་འགོ་དཔོན་དང་། ཡུལ་མི་མཐའ་དག་ཁྲིད་ནས། གཙོ་བོ་ཡ་ཝཱེའི་ཕོ་བྲང་ལས་རྒྱལ་པོ་བཏོན་ཏེ། སྒོ་གོང་མ་བརྒྱུད་དེ་ཕོ་བྲང་དུ་ཕྱིན་པ་དང་། རྒྱལ་པོ་ཁྲི་སར་བཀོད་དོ། །
[21] དེར་རྒྱལ་ཁམས་ཡོངས་ཀྱི་ཡུལ་མི་ཐམས་ཅད་དགའ་ཞིང་། དེ་དག་གིས་ཨ་ཐལ་ཡཱ་རལ་གྲིས་བཀུམས་པས། རྒྱལ་ས་ལྷིང་འཇགས་སུ་གནས་སོ། །