[1] དེ་ཡང་ཏ་ཟིག་རྒྱལ་ཁབ་ཀྱི་རྒྱལ་པོ་ཀོ་རེས་ཀྱི་སྲིད་ལོ་དང་པོར། ཡ་ཝཱེས་ཁོང་ཉིད་ཀྱི་བཀའ་སྟེ་ཡེ་རེམ་ཡཱ་ཡི་ངག་བརྒྱུད་ནས་གསུངས་པ་དེ་འགྲུབ་པར་མཛད་པའི་ཕྱིར། ཏ་ཟིག་གི་རྒྱལ་པོ་ཀོ་རེས་ལ་ཡི་གེར་བཀོད་དེ་རང་གི་རྒྱལ་ཁམས་ཐམས་ཅད་དུ་ཁྱབ་བསྒྲགས་བྱེད་པར་སྐུལ་མ་གནང་བ་དང་།
[2] ཏ་ཟིག་གི་རྒྱལ་པོ་ཀོ་རེས་ཀྱིས་འདི་ལྟར་དུ། ནམ་མཁའི་དཀོན་མཆོག་ཡ་ཝཱེས་ས་གཞི་འདིའི་རྒྱལ་ཁམས་ཐམས་ཅད་ང་ལ་གནང་བ་དང་། ཁོང་གིས་ང་རང་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་གྲོང་ཁྱེར་དུ་ཁོང་གི་ཕྱིར་མཆོད་ཁང་ཞིག་བཞེངས་པར་བསྐོས་པས།
[3] ཁྱོད་ཅག་གི་ཁྲོད་དུ་ཁོང་གི་འབངས་མི་བྱེད་མཁན་དག་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕོ་བྲང་བཞེང་བར་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་སོང་ཆོག ཁོང་ནི་ཡེ་རུ་སཱ་ལེམ་ན་བཞུགས་པའི་དཀོན་མཆོག་ཡིན་པ་དང་། དཀོན་མཆོག་ཁྱོད་དང་མཉམ་དུ་བཞུགས་པར་ཤོག
[4] གནས་དེའི་མི་ཡིས་གསེར་དང་དངུལ། རྒྱུ་ནོར། ཕྱུགས་ཟོག་བཅས་ཀྱིས་གང་ས་གང་དུ་སྡོད་པའི་མི་ལྷག་ལུས་རྣམས་ལ་རོགས་རམ་བྱེད་དགོས། དེར་མ་ཟད་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་དུ་རང་འཐད་བཞིན་དུ་འབུལ་བ་འབུལ་དགོས་ཞེས་བཀའ་བསྩལ།
[5] དེ་ནས་ཡ་ཧུ་དཱ་དང་། པེན་ཡཱ་མེན་གྱི་ཚོ་དཔོན་དང་། མཆོད་དཔོན་རྣམས། ལེ་ཝི་པ་རྣམས་བཅས་ཏེ་དཀོན་མཆོག་གིས་སེམས་འགུལ་ཐེབས་པ་ཐམས་ཅད་ཡར་ཡེ་རུ་སཱ་ལེམ་དུ་ཡ་ཝཱེའི་ཕོ་བྲང་ཡང་བསྐྱར་བཞེང་བར་སོང་།
[6] ཡང་ཕྱོགས་བཞིར་གནས་པ་རྣམས་ཀྱིས་དངུལ་གྱི་ཡོ་བྱད་དང་གསེར། རྒྱུ་ནོར། ཕྱུགས་ཟོག རིན་པོ་ཆེ་བཅས་ཀྱིས་རྒྱབ་སྐྱོར་བྱས་པར་མ་ཟད། རང་འཐད་ཀྱིས་འབུལ་བ་སྣ་ཚོགས་ཀྱང་ཕུལ་ཞིང་།
[7] རྒྱལ་པོ་ཀོ་རེས་ཀྱིས་ཡ་ཝཱེའི་ཕོ་བྲང་གི་སྣོད་རྣམས་ཕྱིར་བཏོན་པ་དང་། ཡོ་བྱད་དེ་དག་ནི་སྔར་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་ནས་ཁྱེར་ཞིང་རང་གི་ལྷ་ཁང་དུ་བཞག་པ་རྣམས་ཡིན་ཏེ།
[8] ཏ་ཟིག་གི་རྒྱལ་པོ་ཀོ་རེས་ཀྱིས་ཕྱག་མཛོད་མིད་རེ་དད་མངགས་ནས་སྣོད་དེ་དག་ཕྱིར་བླངས་ནས། ཡ་ཧུ་དཱའི་དཔོན་པོ་ཤེ་སཱ་པ་ཙར་ལ་བརྩིས་སྤྲད།
[9] དེ་དག་གི་བསྡོམས་གྲངས་ནི་འདི་ལྟ་སྟེ། གསེར་གྱི་གསོལ་སྡེར་སུམ་ཅུ་དང་། དངུལ་གྱི་གསོལ་སྡེར་སྟོང་ཕྲག་གཅིག གྲི་ཉེར་དགུ།
[10] གསེར་གྱི་ཕོར་བ་སུམ་ཅུ། དངུལ་གྱི་ཕོར་བ་དམིགས་རྟེན་བཞི་བརྒྱ་དང་བཅུ། སྣོད་གཞན་སྟོང་ཕྲག་གཅིག་བཅས་ཡོད།
[11] གསེར་དང་དངུལ་རིགས་ཀྱི་སྣོད་ཐམས་ཅད་ཀྱི་བསྡོམས་གྲངས་ལྔ་སྟོང་བཞི་བརྒྱ་ཡོད། བཙོན་དུ་ཁྲིད་པའི་མི་རྣམས་པཱ་པིས་ལུན་ནས་ཡེ་རུ་སཱ་ལེམ་དུ་འོང་དུས། ཤེ་སཱ་པ་ཙར་གྱིས་སྣོད་འདི་ཐམས་ཅད་ཀྱང་ཁྱེར་འོངས་སོ། །