[1] Paꞌin si Isa pe, “Sabennal akahante kaꞌam, niyaꞌ kaꞌam matuꞌu inin gaꞌi matey bang gaꞌi dahuꞌ takitebi pagbayaꞌ Tuhanin duk balakatan teꞌed pagbayaꞌnen.”
[2] Manjari, ennem bahangi puwas miyaꞌan, binoꞌo weꞌ si Isa si Petros, si Yakub duk si Yahiya pī diyataꞌ punu langkew siye-siye hadja. Sābude malaꞌihin, pinda teꞌed bantuk si Isahin si pagmatahande.
[3] Semmeknen ngillap teꞌed duk asal poteꞌ manamal. Gaꞌ niyaꞌ aꞌa tuꞌu si dunya makapapoteꞌ semmek kuweꞌ poteꞌan semmekne miyaꞌan.
[4] Manjari paguwaꞌ si siye laꞌi si Nabi Eliyas duk si Musa duk magbissā siye duk si Isa.
[5] Sābude magbissāhin, paꞌin si Petros pu si Isa, “Tuwan, hāp teꞌed peggeꞌ tiyaꞌ kami tuꞌu. Ngahinang kami tellu payad-payad. Dambuwaꞌ si kaꞌu, dambuwaꞌ pu si Musa duk dambuwaꞌ pu Nabi Eliyas.”
[6] Hangkan si Petros missā sa miyaꞌan, peggeꞌ gaꞌi iye magkataꞌu-taꞌu bang ine bissāne sabab tinalew teꞌed siye.
[7] Manjari niyaꞌ inalak paguwaꞌ duk kalandungan siye duk niyaꞌ suwala amban dem inalakin magpaꞌin, “Inin Anakku kalasahanku teꞌed. Pakalehun bi iye.”
[8] Manjari, pagpayamde paliput, bessuwang gaꞌ ne niyaꞌ seddili kitede laꞌi, luwal saꞌ si Isa.
[9] Manjari sasangde padurul amban diyataꞌ punu, sinessaꞌan siye weꞌ si Isa weꞌ subey siye gaꞌi magaka-aka bisan pu sine sabab bakas takiteden. Bang iye, Anak Manusiyaꞌin, ellum ne balik amban kamateynen, meke ne siye makajari magaka-aka si aꞌa.
[10] Tinuhut weꞌ de panessaꞌne miyaꞌan, saguwaꞌ magtilew-tinilew siye tellungan bang ine hāti pinaꞌinnen weꞌ ellum iye balik amban kamateynen.
[11] Na, tilewde si Isa, paꞌinde, “Weꞌey teꞌ magpaꞌin meꞌ guru si saraꞌ āgamahin weꞌ subey koꞌ pitu dehellu Nabi Eliyas meke Almasihin?”
[12] Nambung si Isa. “Bennal iyan,” paꞌinne, “Nabi Eliyas pitu dehellu amban Almasihin manyap kēmonin. Na, ine teꞌ paꞌin kitabin sabab aku, Anak Manusiyaꞌin? Paꞌin kitabin weꞌ subey ekka kabinasahan sandalanku duk diniyawaꞌan ku teꞌed.
[13] Saguwaꞌ akahante kaꞌam,” paꞌin si Isa, “bakas pitu ne Eliyas duk tahinang ne weꞌ meꞌ aꞌahin sasuku kabayaꞌanden si iye, kuweꞌ du tasulat dem kitab sabab iyehin.”
[14] Pagbalikde pī si meꞌ tindegne sinduwehin, banes teꞌed aꞌa kitede paliput si siye. Duk niyaꞌ meꞌ guru si saraꞌ āgama laꞌi magpasuweyan duk siye.
[15] Manjari pagkite weꞌ meꞌ aꞌa mabanesin si Isa, ulaliꞌ siye peggeꞌ gaꞌ ase-asede weꞌ pī laꞌi si Isa. Magubas siye pī nagina iye.
[16] Tinilew weꞌ si Isa meꞌ tindegnen, paꞌinne, “Ine pagpasuweyanbi duk siye miyaꞌan?”
[17] Niyaꞌ nambung amban meꞌ aꞌa mabanesin, paꞌinne, “Tuwan, binoꞌo weꞌ ku anakku inin pitu si kaꞌu peggeꞌ pasayedan iye seyitan maꞌumew iye.
[18] Duk kahabaꞌ iye usaꞌ seyitanin, hinantakan iye weꞌ ne. Magbukal behenen, magtageꞌot meꞌ impennen, duk ngoral iye. Manjari pināku weꞌ ku si meꞌ tindegnun pakipaluwasku seyitanin saguwaꞌ gaꞌ du tapaluwasde.”
[19] Paꞌin si Isa si meꞌ aꞌahin, “Oy, kaꞌam meꞌ aꞌa kuweꞌitu inin. Gaꞌ teꞌed niyaꞌ sandelbi si Tuhan. Taman sumiyan pe ku tuꞌu si kaꞌam? Taman sumiyan pe ku nandalan addatbin meke kaꞌam kahagad? Boꞌohun nakanakin pitu si aku.”
[20] Binoꞌo ne weꞌ de pī si iye. Pagkite seyitanin si Isa, magtawus pinapaspad weꞌ ne nakanakin. Pahantak nakanakin diyataꞌ bulak magligidan duk magbukal behenen.
[21] Tinilew weꞌ si Isa sama nakanakin, “Sumiyan pe iye sa inin?” Nambung iye, “Kemuwe dikiꞌ pe iye.
[22] Duk daran ne iye tineppadan weꞌ seyitanin pī dem ebbut duk dem boheꞌ supaya tapapateyne. Bang tahinangnu, andūꞌ Tuwan, maꞌaseꞌ ne kew si kami duk tabangun kami.”
[23] “Tilewnu bang tahinangku?” paꞌin si Isa. “Bang aꞌahin sandel si Tuhan,” paꞌinne, “kēmon tahinangne.”
[24] Magtawus sama nakanakin missā pinapales, paꞌinne, “Ngandel ne ku, Tuwan. Tabangun ku duk pasōng sandelkun.”
[25] Pagkite si Isa meꞌ aꞌa mabanesin hap pī patipun si iye, inamāhan weꞌ ne seyitanin. “Kaꞌu seyitan,” paꞌinne, “seyitan magpaꞌumew duk magpabisu, daꞌakte kew paluwas amban nakanak inin duk daꞌa ne kew teꞌed padiyalem balik si iye.”
[26] Manjari magkilahap seyitanin duk pinapaspad manamal weꞌ ne nakanakin. Ubus paluwas ne seyitanin amban iye. Nakanakin kuweꞌ ne aꞌa matey, hangkan kaꞌekkahan meꞌ aꞌahin magpaꞌin, “Matey ne iye.”
[27] Saguwaꞌ inantanan weꞌ si Isa tangan nakanakin duk pinadongaꞌ weꞌ ne. Manjari nengge ne nakanakin.
[28] Pagdiyalem si Isa si lumaꞌ, tinilew iye weꞌ meꞌ tindegnen, siye-siye hadja, paꞌinde, “Weꞌey teꞌ gaꞌ tapaluwas kami seyitanin?”
[29] Paꞌinne si siye, “Da bayuꞌ seyitan miyaꞌan gaꞌi tapaluwas weꞌ ine-ine luwal hadja bang pinākuhan si Tuhan.”
[30] Manjari palanjal ne disi Isa duk meꞌ tindegnen. Pabutas siye si lahat Jalil. Gaꞌi mabayaꞌ si Isa weꞌ niyaꞌ ngataꞌu bang tungan lengngannen,
[31] peggeꞌ magtoloꞌ iye si meꞌ tindegnen. Pagtoloꞌnen, paꞌinne si siye, “Aku, Anak Manusiyaꞌin, sinōngan du ku iyan si antanan meꞌ aꞌa. Papateyde du ku. Tellum bahangi puwas kamateykun, ellum du ku balik.”
[32] Saguwaꞌ gaꞌ tahātide bissāne miyaꞌan duk gaꞌ siye makatawakkal nilew iye.
[33] Manjari tekka siye si puweblo Kapernaum. Paglaꞌi ne siye dem lumaꞌ, tinilew weꞌ si Isa meꞌ tindegnen. “Ine teꞌ pagpasuweyanbi si lānin?” paꞌinne.
[34] Saguwaꞌ gaꞌ siye nambung peggeꞌ pagpasuweyanden sabab bang sine siye tamanan malangkewin.
[35] Manjari ningkoloꞌ si Isa duk ilinganan weꞌ ne sampūꞌ duk duwe tindegnen pī si bihingne. Paꞌinne si siye, “Sine-sine mabayaꞌ pinalangkew teꞌedin, subey iye magpadiyawaꞌ dine supaya iye madiyawaꞌ amban kēmonin, duk subey iye daraꞌakan kēmon aꞌa.”
[36] Manjari ngeddoꞌ si Isa dambuwaꞌ nakanak dikiꞌ duk pinatengge weꞌ ne si tengngaꞌde. Ubus kinekkepan weꞌ ne nakanakin duk paꞌinne si siye,
[37] “Bang niyaꞌ aꞌa bu sabab sandelne si akuhin ngaddatan dambuwaꞌ nakanak dikiꞌ kuweꞌ inin, aku inaddatannen. Duk bang niyaꞌ ngaddatan aku, dumaꞌin hadja aku inaddatannen, saguwaꞌ damikkiyan addatanne Tuhanin, mamapitu aku si dunyahin.”
[38] Paꞌin Yahiya si iye, “Tuwan, niyaꞌ takite kami dambuwaꞌ aꞌa sabbutne ēnnun pagpaluwasne seyitan amban meꞌ aꞌa. Pinages iye weꞌ kami peggeꞌ gaꞌi iye nuhut kite bi.”
[39] “Daꞌa iye pagesun bi,” paꞌin si Isa. “Peggeꞌ sine-sine nabbut ēnkun paghinangne hinangan balakatan, gaꞌi iye mura-mura makabissā laꞌatan sabab aku.
[40] Peggeꞌ aꞌa manggaꞌi manguntarahan kitehin bin,” paꞌinne, “bēbbeg amban kite bi.
[41] Sabennal akahante kaꞌam weꞌ sine-sine ngurungan kaꞌam bisan hadja da sawan boheꞌ pamaꞌinum kaꞌam peggeꞌ kaꞌam tindeg Almasi, asal katumbasan teꞌed iye hāp.”
[42] “Saguwaꞌ sine-sine makapaduse si dambuwaꞌ nakanak dikiꞌ kuweꞌ inin makahagad si akuhin, hāp pe siꞌ iye miyaꞌan tapatowengan batu hadje si kellongne bu ilaboꞌ pī dem tahik, duk hadja gaꞌi taboꞌone magduse.
[43] Bang tangannun mamoꞌo kaꞌu magdusehin, lebbahanun ne pagdusenun. Dalilnen, kuweꞌ du putukannu tangannun. Hāp pe kew paꞌasek dem surgaꞌ bisan kew putuk, amban duwe tangannun saguwaꞌ pī kew dem narkaꞌ, dem ebbut gaꞌ niyaꞌ kapalemne. (
[44] Laꞌi pangalegga Tuhan aꞌahin, gaꞌ niyaꞌ hāranne duk pagsandalin gaꞌ niyaꞌ tamananne.)
[45] Damikkiyan bang bettisnun mamoꞌo kaꞌu magdusehin, lebbahanun pagdusenun. Dalilnen, kuweꞌ du putukannu bettisnun. Hāp pe kew paꞌasek dem surgaꞌ bisan kew putuk, amban duwe bettisnun saguwaꞌ tinimanan kew pī dem narkaꞌ, dem ebbut gaꞌ niyaꞌ kapalemne. (
[46] Laꞌi pangalegga Tuhan aꞌahin, gaꞌ niyaꞌ hāranne duk pagsandalin gaꞌ niyaꞌ tamananne.)
[47] Duk bang matanun isab mamoꞌo kaꞌu magdusehin, lebbahanun pagdusenun. Dalilnen, kuweꞌ du ugitannu matanun. Hāp pe kew paꞌasek dem surgaꞌ bisan dambuwaꞌ saꞌ matanun, amban duwe matanun saguwaꞌ tinimanan kew pī dem narkaꞌ.
[48] Laꞌi pangalegga Tuhan aꞌahin gaꞌ niyaꞌ hāranne, duk pagsandalin gaꞌ niyaꞌ tamananne.”
[49] Paꞌin si Isa pe, “Kēmon aꞌahin subey palabey dem ebbut, hātinen dem katiksaꞌan, supaya ngabasag sandelden.”
[50] Paꞌinne isab, “Kataꞌuhanbi du weꞌ asinin asal hāp. Saguwaꞌ bang asinin gaꞌ ne niyaꞌ lessane, gaꞌi ne maꞌasin balik. Hangkan kaꞌam isab,” paꞌinne, “subey kaꞌam pahatul-hatul supaya gaꞌi lepas pagaddat-inaddatbin duk pagsulut-sulutbin.”