[1] Manjari tekka si Isa duk meꞌ tindegnen si dambiyaꞌ lamew Jalil, laꞌi si lahat meꞌ aꞌa Gerasa.
[2] Pagduwaꞌi si Isa amban dem bangkaꞌ, niyaꞌ pasampang si iye dambuwaꞌ aꞌa amban meꞌ kakubulan. Aꞌa inin pasayedan seyitan.
[3] Paglahatannen si meꞌ lingab pagkubulan duk gaꞌi teꞌed iye kaꞌingketan weꞌ aꞌa bisan pe karena pangingket iyehin.
[4] Daran iningketan tangannen duk bettisnen, saguwaꞌ ubus hadja bekkat-bekkatne karenahin. Gaꞌ niyaꞌ aꞌa basag makagapus iye.
[5] Ellew-sangem luwal iye magkolehak si meꞌ kakubulan duk si kakūdan duk ngehet dine duk batu.
[6] Pagkitene si Isa amban katalahan, magubas iye pī pasujud si iye.
[7] Manjari paꞌin si Isa si seyitanin, “Paluwas kew amban aꞌa iyan, seyitan.” Maggasud seyitanin papales, paꞌinne, “Gaꞌ niyaꞌ lamudnu si aku, Isa. Kaꞌu Anak Tuhanin, iye Tuhan Malangkewin. Iyuꞌ pakale Tuhanin, junjungku si kaꞌu, daꞌa ku binasahun.”
[9] Manjari tinilew iye weꞌ si Isa, paꞌinne, “Sine ēnnun?” Nambung iye, paꞌinne, “Ēnkun si Ibuhan peggeꞌ ekka kami inin.”
[10] Duk pabuyuꞌ-buyuꞌ teꞌed meꞌ seyitanin pu si Isa, gaꞌi siye makapatahalaꞌ amban lahat miyaꞌan.
[11] Manjari niyaꞌ magsungkal laꞌi diyataꞌ bīd panenan bawi, ekka manamal.
[12] Pabuyuꞌ-buyuꞌ meꞌ seyitanin pu si Isa, paꞌinde, “Daꞌakun kami pī si meꞌ bawi miyaꞌan duk padiyalemun kami magdem barande.”
[13] Na, dinaꞌak ne siye weꞌ si Isa. Manjari paluwas meꞌ seyitanin amban aꞌahin duk padiyalem ne siye pī magdem baran meꞌ bawihin. Magtawus panenan bawihin magubas padurul pī si pampang magdem lamew duk lambo siye kēmon. Meꞌ bawihin niyaꞌ kulang-labi duwe ngibu ekkahanden.
[14] Manjari meꞌ aꞌa magipat meꞌ bawi miyaꞌan, magubas duk magaka-aka siye laꞌi si puweblo duk si meꞌ lahat diyataꞌ. Manjari hap pī meꞌ aꞌahin mayaman bakas maꞌumantag miyaꞌan.
[15] Pagtekkade laꞌi pu si Isa, takitede aꞌa bakas pasayedan seyitan maꞌekkahin. Ningkoloꞌ iye laꞌi magsemmek ne duk hāp ne pikilannen. Manjari tinalew siye.
[16] Ubus inaka-akahan ne siye weꞌ meꞌ aꞌa bakas mangitehin sabab maꞌumantag si aꞌa pasayedan seyitanin, duk sabab meꞌ bawihin.
[17] Ubus pabuyuꞌ-buyuꞌ meꞌ aꞌa lahat miyaꞌan pu si Isa, dinaꞌak iye tahalaꞌ amban lahatde.
[18] Pagsakey si Isa magdem bangkaꞌ, aꞌa bakas pasayedan seyitanin pabuyuꞌ-buyuꞌ nuhut iye.
[19] Saguwaꞌ gaꞌ iye dinaꞌak weꞌ si Isa. Paꞌin si Isa si iye, “Moleꞌ ne kew pī si lahatnu. Akahanun meꞌ kaꞌusbahannun sabab hinangan hadje bakas tahinang Tuhan si kaꞌuhin duk sabab aseꞌne si kaꞌuhin.”
[20] Manjari lumengngan ne aꞌahin duk ilatag weꞌ ne lahat inēnan Sampūꞌ Puweblohin duk magaka-aka iye sabab hinangan hadje bakas tahinang si Isa si iyehin. Kēmon meꞌ aꞌa makakale inin, bengngangan teꞌed.
[21] Manjari palipag ne isab si Isa magbangkaꞌ pī si dambiyaꞌ lamew Jalil. Banes ne isab teꞌed aꞌa patipun pī si iye paglaꞌi iye si higad lamew.
[22] Niyaꞌ aꞌa pī si iye inēnan si Jairus. Aꞌa inin dambuwaꞌ nakuraꞌ si langgal meꞌ Yahudihin. Pagkitene si Isa, pī iye pasujud si antag bettisne.
[23] Duk pabuyuꞌ-buyuꞌ teꞌed iye pu si Isa, paꞌinne, “Tuwan, anakku dende-dendehin sōng ne matey. Dayiꞌ ne kew duk bettadun meꞌ tangannun si iye supaya du iye koleꞌ duk ellum du iye.”
[24] Manjari nuhut ne si Isa iye. Meꞌ aꞌa mabanes teꞌedin patuhut pu si Isa duk maglaray siye pī si iye.
[25] Manjari niyaꞌ isab laꞌi dende saki, luwal paguwaꞌan lahaꞌ. Sampūꞌ duk duwen tahun ne kemuwe kasakinen.
[26] Duk magsandal teꞌed iye si antanan meꞌ doktol maꞌekkahin duk ubus ne tagastune kēmon sīnnen. Saguwaꞌ gaꞌ du iye ngahāp. Nambahi hadja pasōng sakinen.
[27] Manjari takalene aka-aka sabab si Isahin. Hangkan pī iye patapit si bukutan si Isa palagumey si meꞌ aꞌahin.
[28] Paꞌinne dem pikilanne, “Bang hadja taꞌantanku badjuꞌnen, asal kawuliꞌan ku.”
[29] Pagantanne, magtawus padeheng paglahaꞌnen duk takalessane si baranne weꞌ kawuliꞌan ne sakinen.
[30] Magtawus isab takalessa si Isa weꞌ niyaꞌ balakat paluwas amban baranne. Manjari padeheng iye duk hinarap weꞌ ne meꞌ aꞌa si dambulihanin duk paꞌinne, “Sine bakas mangantan badjuꞌkun?”
[31] Paꞌin meꞌ tindegnen si iye, “Kitenu ne, Tuwan, meꞌ aꞌa mabanes mapalaray si kaꞌu inin, magtilew pe kew bang sine bakas mangantan kaꞌuhin?”
[32] Saguwaꞌ mayam iye paliput, mayaman bang sine bakas mangantan iyehin.
[33] Manjari dendehin, peggeꞌ kataꞌuhanne weꞌ kawuliꞌan ne sakinen, pī iye patapit pu si Isa migpid peggeꞌ tinalew iye. Pasujud iye si antag bettis si Isa duk magaka ne iye magsabennal.
[34] Paꞌin si Isa si iye, “Dende, kawuliꞌan ne kew peggeꞌ sandel kew si aku. Pī ne kew, daꞌa kew suse. Kawuliꞌan ne teꞌed sakinun.”
[35] Manjari, sasang si Isa pe mamissā si dendehin, niyaꞌ ne meꞌ aꞌa tekka pī amban lumaꞌ si Jairus. Paꞌinde pu si Jairus, “Anaknu dendehin gaꞌ ne. Daꞌa ne sasewun guruhin.”
[36] Saguwaꞌ gaꞌ inasip weꞌ si Isa inakade miyaꞌan. Paꞌinne pu si Jairus, “Daꞌa kew tinalew. Sandel kew hadja.”
[37] Gaꞌ niyaꞌ patuhut si Isa si iye seddili, luwal si Petros duk duwe magpungtinaꞌihin, si Yakub duk Yahiya.
[38] Pagtekkade laꞌi si lumaꞌ si Jairus, takitene meꞌ aꞌa malaꞌihin hewuhalaꞌ. Magtāring siye duk magmatey papales.
[39] Padiyalem si Isa duk paꞌinne si siye, “Weꞌey kaꞌam iyan hewuhalaꞌ duk magmatey? Dumaꞌin hep matey nakanakin saguwaꞌ tuli hadja.”
[40] Pinagsayehan iye weꞌ de. Saguwaꞌ pinaluwas siye kēmon weꞌ si Isa. Ubus bu binoꞌo weꞌ ne saꞌi-sama nakanakin duk tindegne tellunganin padiyalem pī si bilik palaꞌihan nakanakin.
[41] Inantanan weꞌ ne tangan nakanakin duk paꞌinne si iye, “Talita kumi.” Bang si bissāte bi hātinen, “Endeng, paꞌinku si kaꞌu, dongaꞌ kew.”
[42] Magtawus nakanakin dongaꞌ duk lumengngan ne dem lumaꞌ. Umulnen sampūꞌ duk duwen tahun. Bengngangan teꞌed siye.
[43] Manjari sinessaꞌan teꞌed siye weꞌ si Isa gaꞌi siye dinaꞌak magaka-aka si meꞌ aꞌa sabab inin. Duk dinaꞌak weꞌ ne pinakan nakanakin.