[1] Pagjanjiꞌan dehelluhin niyaꞌ meꞌ saraꞌ pasal pagsambahayang duk niyaꞌ isab lumaꞌ pagsambahayangan hininang weꞌ meꞌ aꞌahin.
[2] Lumaꞌ inin, lumaꞌ hininang duk kuwit hayep, duwe biliknen. Bilik tagnaꞌ paꞌasekanin inēnan Bilik Sutsi. Laꞌi diyalem niyaꞌ binettad tengenan payitaꞌan pituꞌ pangenen. Niyaꞌ isab laꞌi lamisahan pamettadan pan sinōngan si Tuhanin.
[3] Bilik dambuwaꞌin diyalem teꞌed duk inelligan duk semmek subuk binowet. Bilik inin inēnan Bilik Tamanan Masutsihin.
[4] Dem bilik diyalem teꞌed inin, niyaꞌ lamisahan bulawan panugtugan kamanyan. Duk niyaꞌ isab laꞌi baꞌul putus weꞌ bulawan magdiyalem-bukut. Inēnan baꞌul miyaꞌan Baꞌul Pagjanjiꞌanin. Laꞌi diyalem baꞌul niyaꞌ garul bulawan isihan kinakan inēnan “manna”. Laꞌi isab dem baꞌul miyaꞌan inennaꞌ tungkud si Harun bakas manumbuꞌin duk laꞌi isab inennaꞌ duwe batu papan panulatan meꞌ daꞌakan Tuhan pinangurungne pu si Musahin.
[5] Diyataꞌ baꞌul bulawanin niyaꞌ duwe limbagan kuweꞌ bantuk malaꞌikat peppikan, tandaꞌ weꞌ laꞌi si antag miyaꞌan Tuhanin. Meꞌ peppikden pabellat diyataꞌ baꞌul ngelligan antag pangampunan duse meꞌ aꞌahin. Saguwaꞌ taman inin ne hadja, peggeꞌ dumaꞌin inin waktu pamahāti meꞌ kēmon inin.
[6] Na, kuweꞌ inin bantuk dem lugal pagsambahayanganden masaley. Meꞌ imamin hap pī kahabaꞌ ellew dem bilik dehellu paꞌasekanin ngahinang meꞌ hinangden.
[7] Saguwaꞌ bang dem bilik diyalem teꞌedin, luwal hadja imam nakuraꞌin makajari paꞌasek laꞌi. Duk paꞌasek iye laꞌi mintedde hadja dan tahun. Duk bang iye paꞌasek pī, subey iye moꞌo lahaꞌ hayep pagkuluban sōnganne si Tuhan pamuwas dusenen duk duse meꞌ aꞌa manggaꞌi kinataꞌuhande weꞌ duse miyaꞌan.
[8] Sabab inin pastiꞌ panoloꞌ Niyawa Sutsi si kitehin bi weꞌ gaꞌ niyaꞌ aꞌa umasek pī dem Bilik Tamanan Masutsihin tiggelan laꞌi pe bilik tagnaꞌ paꞌasekanin.
[9] Inin pamintangante bi kuweꞌitu. Hātinen, bisan aꞌahin ngurung duk magkuluban si Tuhan, gaꞌi du inin makapabentel ateyde.
[10] Peggeꞌ iye du hadja hininangden nuhut meꞌ daꞌakan pasal pagkakan duk paginum duk meꞌ bayuꞌ-bayuꞌan pagsutsi baran. Saguwaꞌ meꞌ daꞌakan inin sabab baran hadja duk niyaꞌ hadja kagunahanne samantaꞌan gaꞌ pe ginantiꞌan weꞌ Tuhanin duk meꞌ daꞌakan baꞌahuhin.
[11] Saguwaꞌ bakas pitu ne Almasi duk imam nakuraꞌ iye si janjiꞌ baꞌahu matuꞌu si kitehin bi ne. Duk lugal pagimamannen pasōng hāp duk gaꞌ sallaꞌ-sallaꞌne peggeꞌ dumaꞌin lumaꞌ pagsambahayangan hinang manusiyaꞌ, peggeꞌ dumaꞌin lumaꞌ inin tuꞌu si dunya.
[12] Duk pagsakaliꞌ paꞌasek si Isa pī si lugal kuweꞌ dalil Bilik Tamanan Masutsihin, mintedde hadja iye paꞌasek, magjatu ne kēmon. Duk dumaꞌin binoꞌone padiyalemin lahaꞌ kambing duk sapiꞌ pagkuluban saguwaꞌ iye binoꞌonen di lahaꞌnen pamuwas duseten bi hangkan niyaꞌ katimbulante bi salama-lama.
[13] Si saraꞌ pagjanjiꞌan tagnaꞌin, bang meꞌ aꞌa mabatalin pinisikan duk lahaꞌ kambing atawa lahaꞌ sapiꞌ atawa anak sapiꞌ ineggas pinagsaget abunen duk boheꞌ, na, taꞌānan ne batal si baranden duk halal ne pagsambahayangden.
[14] Saguwaꞌ pasōng basag lahaꞌ Almasihin amban lahaꞌ hayepin. Peggeꞌ tinabangan iye weꞌ Niyawa Sutsi maꞌellum salama-lamahin, sinōngan weꞌ ne barannen gaꞌ tamak-tamakne pagkuluban si Tuhan. Lahaꞌnen iye manutsi meꞌ pikilanten duk ne kite gaꞌi maghinangan meꞌ bayuꞌ-bayuꞌan gaꞌi du makaboꞌo kite tudju Tuhan, supaya maghinang kite si Tuhan maꞌellum salama-lamahin.
[15] Hangkan hep si Isa mamatengge janjiꞌ baꞌahuhin supaya meꞌ aꞌa tapeneꞌ weꞌ Tuhanin tasangkade meꞌ pananggup Tuhan si siyehin, hātinen umul salama-lama. Peggeꞌ Almasi matey supaya meꞌ aꞌahin lumuwas amban meꞌ hinangan masalaꞌ hininangde masa panuhutde daꞌakan tagnaꞌin.
[16] Bang upama niyaꞌ aꞌa magpahinang sulat pangajanjiꞌne weꞌ alataꞌnen pamusakaꞌne si dambuwaꞌ aꞌa, saguwaꞌ subey ne iye matey meke tapī si aꞌahin pusakaꞌin.
[17] Peggeꞌ sulat miyaꞌan gaꞌ niyaꞌ kagunahanne samantaꞌan ellum pe dapuꞌ alataꞌin. Meke taga guna sulatin bang matey ne aꞌahin.
[18] Hangkan hep bisan janjiꞌ tagnaꞌ pinangurung weꞌ Tuhanin, niyaꞌ dahuꞌ lahaꞌ buꞌus, hātinen kuluban, bahu haget janjiꞌ miyaꞌan.
[19] Kuweꞌ inin kahalannen. Tagnaꞌ inaka dahuꞌ weꞌ si Musa si meꞌ aꞌahin kēmon daꞌakan Tuhan dem saraꞌin. Pagubus miyaꞌan ngeddoꞌ iye lahaꞌ sapiꞌ duk lahaꞌ kambing bu pinasaget weꞌ ne duk boheꞌ, ubus bu pinisikan weꞌ ne pī diyataꞌ kitab panulatan saraꞌ Tuhanin duk pinisikan isab weꞌ ne kēmon aꞌahin. Ginunane pagpisikin dam pange jambangan inēnan hisup duk bulu bili-bili inanjibinan peyat.
[20] Duk paꞌin si Musa, “Lahaꞌ inin, iye inin makapahaget janjiꞌ Tuhanin dem saraꞌ dinaꞌakne si kaꞌam tinuhutin.”
[21] Damikkiyan pinisikan lahaꞌ isab weꞌ si Musa lumaꞌ pagsambahayanganden duk kēmon meꞌ panyap ginunade si pagsambahayangden.
[22] Asal paꞌin saraꞌin hep weꞌ agen kēmon-kēmonin sutsi hadja weꞌ lahaꞌ. Duk taꞌampun hadja duse manusiyaꞌin bang niyaꞌ lahaꞌ buꞌus.
[23] Pagsambahayangan tuꞌu si dunyahin duk meꞌ panyapnen ilekkat hadja malaꞌi si surgaꞌin, duk subey ngangguna lahaꞌ meꞌ hayep supaya sutsi. Saguwaꞌ pasōng hāp malaꞌi si surgaꞌin hangkan subey isab pasōng hāp kulubanin.
[24] Peggeꞌ Almasi dumaꞌin papīhannen dem Bilik Sutsi hininang weꞌ manusiyaꞌin. Peggeꞌ lugal masutsi si dunyahin kuweꞌ limbagan hadja. Lugal teꞌedin malaꞌi si surgaꞌin. Saguwaꞌ papīhannen laꞌi teꞌed si surgaꞌ duk īꞌ iye laꞌi si panaꞌanan Tuhanin māku-māku para si kite bi.
[25] Imam nakuraꞌ Yahudihin pī dem Lugal Tamanan Masutsihin tahun-tahun moꞌo lahaꞌ hayep pagkuluban si Tuhanin. Saguwaꞌ Almasi gaꞌ daran pagkulubanne barannen.
[26] Peggeꞌ bang daran hinangne, hātinen daran iye magsandal duk matey kemuwe pinapanjari dunyahin. Saguwaꞌ iye hininangnen, pitu iye mintedde hadja magbaran manusiyaꞌ sakaliꞌ sōng magtamanan dunyahin duk inānan weꞌ ne duse manusiyaꞌin sabab pagkuluban weꞌ ne barannen.
[27] Manusiyaꞌin sukuꞌnen matey mintedde ubus bu hukum Tuhanin ne.
[28] Damikkiyan Almasi matey du isab mintedde hadja saguwaꞌ pagkulubanne barannen supaya tapuwasanne duse meꞌ aꞌahin. Duk balik du iye pitu dumaꞌin ne muwasan duse, saguwaꞌ pitu iye nimbul meꞌ mangagad-ngagadan iyehin.