[1] Bang niyaꞌ aꞌa pineneꞌ hinang imam nakuraꞌ, pineneꞌ iye amban pagkasine manusiyaꞌ duk kawakilan iye maghinang si Tuhan para si kahāpan meꞌ aꞌahin. Sōnganne meꞌ pangurung meꞌ aꞌahin si Tuhan duk magkuluban iye supaya ampun Tuhanin duse meꞌ aꞌahin.
[2] Duk imam nakuraꞌin, peggeꞌ manusiyaꞌ du isab iye, niyaꞌ du isab kalammahanne hangkan taꞌu iye maꞌaseꞌ si meꞌ aꞌa masumapeꞌ amban Tuhanin sabab awam siye.
[3] Duk sabab kalammahannen, hangkan subey dahuꞌ iye magkuluban si Tuhan para si meꞌ dusenen, ubus bu magkuluban isab iye para si meꞌ aꞌahin.
[4] Gaꞌ niyaꞌ aꞌa makapagbayaꞌ mahadje dine duk ngahinang dine imam nakuraꞌ saguwaꞌ Tuhanin mameneꞌ aꞌa hinangne imam nakuraꞌin, kuweꞌ si Harun awwalley hininang iye weꞌ Tuhanin imam nakuraꞌ.
[5] Damikkiyan si Isa gaꞌ pahadjene dinen duk iye tahinang imam nakuraꞌ. Saguwaꞌ pinahadje iye weꞌ Tuhanin peggeꞌ missā Tuhanin si iye, paꞌinne, “Anakte kew; kuweꞌitu aku ne Samanun.”
[6] Dem ayat seddili paꞌin Tuhanin isab, “Kaꞌu ne mapagantiꞌin pu si Malkisadik imam masaley duk pagimamnun gaꞌ tamananne.”
[7] Katuꞌu si Isa si dunyahin magtangis iye duk māku-māku iye papales duk muyuꞌ-muyuꞌ si Tuhan, peggeꞌ Tuhanin hadja makatimbul iye amban kamateyin. Pinakale iye weꞌ Tuhanin peggeꞌ diyawaꞌ pagateynen duk tuhutne teꞌed meꞌ pangandaꞌakan Tuhanin.
[8] Bisan iye Anak Tuhanin, makalabey isab iye kabinasahan supaya iye makaꞌaya nuhut meꞌ pangandaꞌakan Tuhanin.
[9] Duk pagsakaliꞌ jukup ne weꞌ ne kēmon pangandaꞌakan Tuhan si iyehin, manjari ne iye manimbul meꞌ aꞌa makahagad si iyehin. Duk urunganne siye umul salama-lama.
[10] Duk hininang iye weꞌ Tuhanin imam nakuraꞌ kuweꞌ Malkisadikin awwalley.
[11] Na, pasal ininen, ekka pe batang bissāku saguwaꞌ hunit kaꞌam pinahātihan peggeꞌ iyuꞌ ne kaꞌam babbal, gaꞌi makahāti.
[12] Kaꞌam iyan subey ne siꞌ kuweꞌitu makapagusihat peggeꞌ tiggel ne panuhutbi Isa Almasihin. Saguwaꞌ sampay maꞌin subey pe kaꞌam inusihatan balik sabab meꞌ lapal Tuhan tagnaꞌ taꞌayabin. Kuweꞌ kaꞌam dalil meꞌ nakanak dikiꞌ subey pe kaꞌam nusu; gaꞌi pe kaꞌam mangan kinakan tuwas.
[13] Bang aꞌahin luwal ne hadja nginum gatas, hātinen, nakanak dikiꞌ pe iye, gaꞌi pe tagam nuhut mahāpin duk nayikutan malaꞌatin.
[14] Saguwaꞌ bang bahiꞌ ne aꞌahin, makajari ne iye mangan kinakan tuwas, hātinen tagam ne iye mikil duk kataꞌuhanne ne bang ine mahāpin duk ine malaꞌatin.