[1] sūr kā bādshāh hīrām hameshā dāūd kā achchhā dost rahā thā. jab use ḳhabar milī ki dāūd ke bād sulaimān ko masah karke bādshāh banāyā gayā hai to us ne apne safīroṅ ko use mubārakbād dene ke lie bhej diyā.
[2] tab sulaimān ne hīrām ko paiġhām bhejā,
[3] “āp jānte haiṅ ki mere bāp dāūd rab apne ḳhudā ke nām ke lie ghar tāmīr karnā chāhte the. lekin yih un ke bas kī bāt nahīṅ thī, kyūṅki un ke jīte jī irdgird ke mamālik un se jang karte rahe. go rab ne dāūd ko tamām dushmanoṅ par fath baḳhshī thī, lekin laṛte laṛte wuh rab kā ghar na banā sake.
[4] ab hālāt farq haiṅ: rab mere ḳhudā ne mujhe pūrā sukūn atā kiyā hai. chāroṅ taraf na koī muḳhālif nazar ātā hai, na koī ḳhatrā.
[5] is lie maiṅ rab apne ḳhudā ke nām ke lie ghar tāmīr karnā chāhtā hūṅ. kyūṅki mere bāp dāūd ke jīte jī rab ne un se wādā kiyā thā, ‘tere jis beṭe ko maiṅ tere bād taḳht par biṭhāūṅgā wuhī mere nām ke lie ghar banāegā.’
[6] ab guzārish hai ki āp ke lakaṛhāre lubnān meṅ mere lie deodār ke daraḳht kāṭ deṅ. mere log un ke sāth mil kar kām kareṅge. āp ke logoṅ kī mazdūrī maiṅ hī adā karūṅga. jo kuchh bhī āp kaheṅge maiṅ unheṅ dūṅgā. āp to ḳhūb jānte haiṅ ki hamāre hāṅ saidā ke lakkaṛhāroṅ jaise māhir nahīṅ haiṅ.”
[7] jab hīrām ko sulaimān kā paiġhām milā to wuh bahut ḳhush ho kar bol uṭhā, “āj rab kī hamd ho jis ne dāūd ko is baṛī qaum par hukūmat karne ke lie itnā dānishmand beṭā atā kiyā hai!”
[8] sulaimān ko hīrām ne jawāb bhejā, “mujhe āp kā paiġhām mil gayā hai, aur maiṅ āp kī zarūr madad karūṅga. deodār aur jūnīpar kī jitnī lakaṛī āp ko chāhie wuh maiṅ āp ke pās pahuṅchā dūṅgā.
[9] mere log daraḳhtoṅ ke tane lubnān ke pahāṛī ilāqe se nīche sāhil tak lāeṅge jahāṅ ham un ke beṛe bāndh kar samundar par us jagah pahuṅchā deṅge jo āp muqarrar kareṅge. wahāṅ ham tanoṅ ke rasse khol deṅge, aur āp unheṅ le jā sakeṅge. muāwaze meṅ āp mujhe itnī ḳhurāk muhayyā kareṅ ki mere darbār kī zarūriyāt pūrī ho jāeṅ.”
[10] chunāṅche hīrām ne sulaimān ko deodār aur jūnīpar kī utnī lakaṛī muhayyā kī jitnī use zarūrat thī.
[11] muāwaze meṅ sulaimān use sālānā taqrīban 32,50,000 kilogrām gandum aur taqrīban 4,40,000 liṭar zaitūn kā tel bhejtā rahā.
[12] is ke ilāwā sulaimān aur hīrām ne āpas meṅ sulah kā muāhadā kiyā. yūṅ rab ne sulaimān ko hikmat atā kī jis tarah us ne us se wādā kiyā thā.
[13] sulaimān bādshāh ne lubnān meṅ yih kām karne ke lie isrāīl meṅ se 30,000 ādmiyoṅ kī begār par bhartī kī. us ne adūnīrām ko un par muqarrar kiyā. har māh wuh bārī bārī 10,000 afrād ko lubnān meṅ bhejtā rahā. yūṅ har mazdūr ek māh lubnān meṅ aur do māh ghar meṅ rahtā.
[15] sulaimān ne 80,000 ādmiyoṅ ko kānoṅ meṅ lagāyā tāki wuh patthar nikāleṅ. 70,000 afrād yih patthar yarūshalam lāte the.
[16] un logoṅ par 3,300 nigarān muqarrar the.
[17] bādshāh ke hukm par wuh kānoṅ se behtarīn patthar ke baṛe baṛe ṭukṛe nikāl lāe aur unheṅ tarāsh kar rab ke ghar kī bunyād ke lie tayyār kiyā.
[18] jabal ke kārīgaroṅ ne sulaimān aur hīrām ke kārīgaroṅ kī madad kī. unhoṅ ne mil kar patthar ke baṛe baṛe ṭukṛe aur lakaṛī ko tarāsh kar rab ke ghar kī tāmīr ke lie tayyār kiyā.