[1] ek din ilyās nabī ne jo jiliād ke shahr tishbī kā thā aḳhiyab bādshāh se kahā, “rab isrāīl ke ḳhudā kī qasam jis kī ḳhidmat maiṅ kartā hūṅ, āne wāle sāloṅ meṅ na os, na bārish paṛegī jab tak maiṅ na kahūṅ.”
[2] phir rab ne ilyās se kahā,
[3] “yahāṅ se chalā jā! mashriq kī taraf safar karke wādī-e-karīt meṅ chhup jā jis kī nadī daryā-e-yardan meṅ bahtī hai.
[4] pānī tū nadī se pī saktā hai, aur maiṅ ne kawwoṅ ko tujhe wahāṅ khānā khilāne kā hukm diyā hai.”
[5] ilyās rab kī sun kar rawānā huā aur wādī-e-karīt meṅ rahne lagā jis kī nadī daryā-e-yardan meṅ bahtī hai.
[6] subho-shām kawwe use roṭī aur gosht pahuṅchāte rahe, aur pānī wuh nadī se pītā thā.
[7] is pūre arse meṅ bārish na huī, is lie nadī āhistā āhistā sūkh gaī. jab us kā pānī bilkul ḳhatm ho gayā
[8] to rab dubārā ilyās se hamkalām huā,
[9] “yahāṅ se rawānā ho kar saidā ke shahr sārpat meṅ jā bas. maiṅ ne wahāṅ kī ek bewā ko tujhe khānā khilāne kā hukm diyā hai.”
[10] chunāṅche ilyās sārpat ke lie rawānā huā. safar karte karte wuh shahr ke darwāze ke pās pahuṅch gayā. wahāṅ ek bewā jalāne ke lie lakaṛiyāṅ chun kar jamā kar rahī thī. use bulā kar ilyās ne kahā, “zarā kisī bartan meṅ pānī bhar kar mujhe thoṛā sā pilāeṅ.”
[11] wuh abhī pānī lāne jā rahī thī ki ilyās ne us ke pīchhe āwāz de kar kahā, “mere lie roṭī kā ṭukṛā bhī lānā!”
[12] yih sun kar bewā ruk gaī aur bolī, “rab āp ke ḳhudā kī qasam, mere pās kuchh nahīṅ hai. bas, ek bartan meṅ muṭṭhī bhar maidā aur dūsre meṅ thoṛā sā tel rah gayā hai. ab maiṅ jalāne ke lie chand ek lakaṛiyāṅ chun rahī hūṅ tāki apne aur apne beṭe ke lie āḳhirī khānā pakāūṅ. is ke bād hamārī maut yaqīnī hai.”
[13] ilyās ne use tasallī dī, “ḍareṅ mat! beshak wuh kuchh kareṅ jo āp ne kahā hai. lekin pahle mere lie chhoṭī sī roṭī banā kar mere pās le āeṅ. phir jo bāqī rah gayā ho us se apne aur apne beṭe ke lie roṭī banāeṅ.
[14] kyūṅki rab isrāīl kā ḳhudā farmātā hai, ‘jab tak rab bārish barasne na de tab tak maide aur tel ke bartan ḳhālī nahīṅ hoṅge’.”
[15] aurat ne jā kar waisā hī kiyā jaisā ilyās ne use kahā thā. wāqaī maidā aur tel kabhī ḳhatm na huā. roz-ba-roz ilyās, bewā aur us ke beṭe ke lie khānā dastyāb rahā. sab kuchh waisā hī huā jaisā rab ne ilyās kī mārifat farmāyā thā.
[17] ek din bewā kā beṭā bīmār ho gayā. us kī tabīat bahut ḳharāb huī, aur hote hote us kī jān nikal gaī.
[18] tab bewā ilyās se shikāyat karne lagī, “mard-e-ḳhudā, merā āp ke sāth kyā wāstā? āp to sirf is maqsad se yahāṅ āe haiṅ ki rab ko mere gunāh kī yād dilā kar mere beṭe ko mār ḍāleṅ!”
[19] ilyās ne jawāb meṅ kahā, “apne beṭe ko mujhe de deṅ.” wuh laṛke ko aurat kī god meṅ se uṭhā kar chhat par apne kamre meṅ le gayā aur wahāṅ use chārpāī par rakh kar
[20] duā karne lagā, “ai rab mere ḳhudā, tū ne is bewā ko jis kā mehmān maiṅ hūṅ aisī musībat meṅ kyūṅ ḍāl diyā hai? tū ne us ke beṭe ko marne kyūṅ diyā?”
[21] wuh tīn bār lāsh par darāz huā aur sāth sāth rab se iltimās kartā rahā, “ai rab mere ḳhudā, barāh-e-karm bachche kī jān ko us meṅ wāpas āne de!”
[22] rab ne ilyās kī sunī, aur laṛke kī jān us meṅ wāpas āī.
[23] ilyās use uṭhā kar nīche le āyā aur use us kī māṅ ko wāpas de kar bolā, “dekheṅ, āp kā beṭā zindā hai!”
[24] aurat ne jawāb diyā, “ab maiṅ ne jān liyā hai ki āp allāh ke paiġhambar haiṅ aur ki jo kuchh āp rab kī taraf se bolte haiṅ wuh sach hai.”